Rum 7

Grafta nda nzakwa i marakw nda zəʼal

1Zwana ma ɗa, nda sna kaghuni ta zlahu. Ŋa kaghuni nda sna ta zlahu ya, ta mna yu ta na gwaɗa na kazlay: Ta ma nzakwa mndu ta ndiri ta ga zlahu ta mgham ta ghəŋa mndu kəʼa. 2Ka graghunaf gra yu ɓa! Marakw ga mndu ná, hbaf hba zlahu ta zəʼala taŋ ka ta ndiri zəʼala taŋ. Ala, ka mtu mta zəʼala taŋ katsi, flaʼu vgha ni ma tsa zlahu ta hbafta ta zəʼala taŋ ya. 3Ka ta ndiri zəʼala taŋ, ka sliʼafta tsi ka laghu da sana mndu katsi, hliri ta mag tsa marakw ya nda tsa. Ala ka mtu mta zəʼala taŋ katsi, flaʼu vgha ni ma tsa zlahu ya, dər sliʼafha tsi ka laghu wuma ta sana mndu ná, hla a ta iri nda tsa wa. 4Manda va tsaya nzakwa ni nda kaghuni guli zwana ma. Ma mtuta *Kristi ta udza zləŋay ná, mtu mta kaghuni guli kawadaga nda tsi, nda dga vgha ghuni nda zlahu. Nda nza kuni ka ŋa sana mndu, ka ŋa tsa mndu ta sliʼagapta ma mtaku ya, ŋa magay mu ta skwi ɗina ŋa Lazglafta. 5Ghalya, ma fitika nzakwa mu ta maga skwi ta kum maya mu ná, dmaku tsa skwi ya ka zlahu ta mnay ŋa mu. Na tsa snaŋta mu mantsa ya, ka mamaftá mu ta maga tsa skwi lmaf lu ya. Ka ksə tsa ghwaɗaka skwiha ya ta slna ma amu, ka kla amu da mtaku. 6Ndanana tama ná, flaʼu vgha mu da zlahu, mtuguduŋmta mu ta tsa zlahu ya si ta hbamata ya. Laviŋ lava mu ta maganatá slna ta Lazglafta ma lfiɗa nzaku ta maramaŋta Sulkum. Manda tsa vindaf lu ma zlahu ghalya ya a ta magəgəlta mu wa.

Nzakwa zlahu nda dmaku

7Nu ŋa mnay tama? Zlahu ná, dmaku ya ra? Dmaku a wa. Ama ka má haɗ ka zlahu wu ná, ma sna a yu ta dmaku wa. Ka má mniha a zlahu kazlay: Ma haraʼu ka ta iri ta skwa mndu kəʼa ná, ma sna a yu kazlay: Dmaku#7:7 Ngha ta Sabi 20:17 nda Vrafta ta Zlahu 5:21. ya kəʼa wa. 8Mantsa ya tama, ka mutsaftá dmaku ta gaganaftá inda haraʼuwa skwiha ma iʼi nda ma zlahu. Ka má haɗ ka zlahu wu ná, gratá skwi nda mta na dmaku. 9Ghalya, ma kwala ɗa ta kul snaŋtá zlahu ná, ta nzutá nzakwa ɗa yu. Manda snaŋta ɗa ta zlahu, ka nzatá dmaku nda hafu, 10ta mtutá iʼi. Lazglafta ná, vla vla tsatsi ta zlahu ŋa mutsa hafu, ama ka klaghatá tsi ta iʼi da dmaku. 11Mutsaf mutsa dmaku ta tvi, ka klaftá tsi ta zlahu ŋa nana iʼi ka ga dmaku, ka dzihatá.

12Tsaw zlahu ná, sagha daga da Lazglafta. Inda gwaɗa ya mna tsi ná, nda ghuɓa, tɗukwa nzakwa ni, ɗina guli. 13Tsaya tama ní, laviŋ lava skwi ɗina ta dzihata ra? Laviŋ a wu, dmaku katək ta dzihata. Tsa dmaku ya ta klaftá tsa ŋərma skwi ya, ka dzihata nda tsi, kabga ŋa snaŋtá kɗavakta nzakwa dmaku. Nda ma zlahu saba dmaku dəɗay ta daɓi, nda kɗavakta ɓadzatani tani.

Mnda səla ná, ŋurɗika dmaku ya

14Nda sna amu kazlay: Sagha daga da Lazglafta na zlahu kəʼa. Tsaw iʼi ná, mnda səla yu habu dmaku. 15Kahwathwata ná, sna a yu ta skwi ta mag yu wu, haɗ yu ta maga skwi ta kum yu wu, tsa skwi ta husihata ya katək ta mag yu. 16Tsaw ka tsa skwi kul kum yu ya ta mag yu katsi, tsaya kəl yu ka grafta kazlay: Skwi ɗina zlahu kəʼa. 17Tsa ghwaɗaka skwi ta mag yu ya ná, iʼi a ta gay wa, tsa dmaku ma iʼi ya ta gay. 18Nda sna yu kazlay: Haɗ skwi ɗina ma iʼi, ma na sluʼuvgha iʼi na wu kəʼa, na skwi ta kum yu ta mnay. Ta kumay yu má ta maga skwi ɗina, triɗ laviŋ a yu wa. 19Haɗ yu ta maga skwi ɗina má ta kum yu wu, skwi kul ɗinaku kul kum yu, ta mag yu. 20Ka ta magay yu ta skwi kul kum yu katsi ná, iʼi a ta gay wu, tsa dmaku ma iʼi ya ta gay.

21Wya skwi ta tapafta yu tazlay ma vgha ɗa: Ka maga yu ta skwi ɗina ka yu ya ná, gi ka ghwaɗaka skwi kəʼa ta nuta. 22Ma hya hya ŋuɗufa ɗa ya ná, zɗəgiha zɗa zlaha Lazglafta. 23Ama ma vgha ɗa, ta tapaf tapa yu ta sana ghwaɗaka skwi ta lmu nda vərɗa skwi ɗina ya ta ndanu yu. Tsa ghwaɗaka skwi ma iʼi ya, ta na iʼi ka vuʼa dmaku. 24Ɗaŋwa ɗa ŋa ɗa gra! Wa dzaʼa dgihata nda na vgha ta kla iʼi da dmaku na na? 25Ta rfay yu katakata ta Lazglafta ta mbiɗifta nda ma *Yesu *Kristi.

Tsaya tama ná, ma ghəŋa ɗa ya ná, ta kumay yu ta sna zlaha Lazglafta, ama ma vgha ɗa ya, zlaha dmaku ta laghu yu da snay.

Currently Selected:

Rum 7: xed

Highlight

Copy