Mbs 32
32
Mndəra mnduha hkən ta sana ɓla Yardeŋ
1Da la Rubeŋ nda la Gat ná, mamu bra rini ta ndəghuta ka malaghutá mbraku. Nghanata taŋ ta haɗikha Yaghzer, nda kwakwara Gilghat ná, dzaʼa ɗina tsa kwakwar ya ŋa ngha rini. 2Tsaya kəl la Gat nda la Rubeŋ ka lagha slanaghatá i Musa, nda Ilghazar, mnda dra skwi ŋa Lazglafta, nda maliha ta ghəŋa guyatá ghəŋ. Ka həŋ mantsa: 3« Luwaha Ghatarut, nda Divuŋ, nda Yaghzer, nda Nimra, nda Hesbuŋ, nda Ilghale, nda Svam, nda Nevu, nda Beghuŋ, 4tsa kwakwar dzuŋ Yawe ta kəma guyatá ghəŋa la Israʼila ya ná, nda ra ŋa ngha braha inda rina aŋni kwalvaha gha. 5Ka ta zɗaŋnaŋ zɗa ka ta huɗi, ka nza tsa kwakwar ya ŋa aŋni kwalvaha gha. Ma tsughwaɗaŋnap ka ta Yardeŋ, » ka həŋ.
6Ama ka Musa nda la Gat, nda ya nda la Rubeŋ mantsa: « Nu! Ta dzaʼa zwana ma ghuni da vulu ná, ta nzaghutá kaghuni hadna? 7Kabgawu ta kəl kuni ka rwa vgha ŋa la Israʼila ta dzaʼa tsughwaɗadamta da haɗik ya vlaŋ Yawe ta həŋ na? 8Ɗina tsa skwi maga dzidzíha ghuni ma ghunaghata ɗa ta həŋ da Kadesbarnegha ŋa vitsanatá tsa haɗik ya ra? 9Ka ŋladaftá həŋ da didiŋa Iskul. Manda vitsapta taŋ ta tsa haɗik ya, ka rwanatá həŋ ta vgha ta la Israʼila ŋa kwala taŋ lami da tsa haɗik vlaŋ Yawe ta həŋ ya. 10Ka sliʼavafta gufatá ŋuɗufa Yawe baɗ tsa, ka waɗata tsi: 11“Kadzeŋkadzeŋ, na mnduha ta safi ma Masar, gwal sliʼafta ni ta imi hisambsak ka laghwi ta kəma, haɗ həŋ dzaʼa nghaŋtá tsa haɗik tanaf yu ta imi ta sləməŋ ta i Abraham nda Izak, nda Yakubu ya wu, kabga dgaŋ dga həŋ ta ghəŋ ka dzaʼa mista ɗa! 12Ba Kalep, zwaŋa Yəfune, mnda la Kənaz, nda Yəhusuwa zwaŋa Nuŋ, kabga ta dzaʼa hahəŋ mista Yawe kul dgaŋtá ghəŋ,” kaʼa. 13Ka sliʼavaftá gufatá ŋuɗufa Yawe ta ghəŋa la Israʼila, ka mblaftá tsi ta həŋ ŋa zatá vaku fwaɗ mbsak ma mtak, ha ka zaɗatá inda zivira tsa gwal ta maga ghwaɗaka skwi ŋa Yawe ya. 14Kaghuni mndəra la ka dmaku, wya kuni ta kla saɗa dzidzíha ghuni, ŋa sliʼiglanafta katakata ta gufatá ŋuɗufa Yawe ta ghəŋa la Israʼila! 15Ka mbəɗaghu mbəɗa kuni ta vgha ka zlanatá mista ni wu katsi, tsatsi guli, dzaʼa mbəɗava mbəɗa ka zləglanatá la Israʼila ma mtak. Kaghuni dzaʼa klaktá zaɗakwa inda mnduha nda tsa tama, » kaʼa.
16Ta gavadaghatá həŋ da tsi, ka həŋ mantsa: « Dzaʼa babaftá ŋni hadna ta kalakalaha ŋa braha rina fisika ŋni, nda luwaha ŋa zwana ŋni. 17Vərɗa aŋni, dzaʼa gi hlaftá huzla vulu ŋni, ŋa dzaʼa ta kəma la Israʼila, ha ka hladamta ŋni ta həŋ da vla taŋ. Dzaʼa nzata hadna zwana ŋni ma luwaha nda matsaka huzlu, ma vli ya dzaʼa kataku həŋ dabga mnduha na haɗik na. 18Haɗ aŋni dzaʼa vragaghuta da həga ŋni ma kɗaku inda la Israʼila mutsaftá haɗika za həga taŋ wa. 19Ama haɗ aŋni dzaʼa mutsaftá haɗika za həga ŋni kawadaga nda hahəŋ ta sana ɓla Yardeŋ wu, kabga ŋa aŋni ma haɗika za həga ná, nda ta na təv na, ta ɓla Yardeŋ təv safa fitik, » ka həŋ.
20Ka Musa nda həŋ mantsa: « Ka maga maga kuni mantsa, ka hlaf hla kuni ta huzla vulu ta kəma Yawe ŋa ŋlu da vulu, 21ka tsughwaɗadap tsughwaɗa inda mnduha ghuni ta vulu ta Yardeŋ ta kəma Yawe, ha ka ghəzlafta ni ta ghumaha ni ta kəma ni, 22ka vraghu a kuni ta kul hanagatá tsa haɗik ya ta ghəŋ ta kəma Yawe wu katsi, dzaʼa nzakway kuni flaʼu da Yawe, nda ya da la Israʼila, dzaʼa nzakway na haɗik na ŋa ŋa ghuni ta kəma Yawe. 23Ama ka maga a kuni mantsa wu, gana ga kuni ta dmaku ta Yawe, ka snaŋta kuni kazlay dzaʼa mista ghuni dmakwa ghuni kəʼa. 24Babawa luwaha ŋa zwana ghuni, nda kalakalaha ŋa rina fisika ghuni, ama ta ta imi ta sləməŋ ta sab ta wa ghuni ya, ka ŋanata kuni, » kaʼa.
25Ka la Gat, nda la Rubeŋ nda Musa mantsa: « Dzaʼa magay aŋni kwalvaha gha manda ya mnaf ka mghama ɗa. 26Zwana ŋni, nda miʼa ŋni, nda bra rina ŋni, nda inda rina ŋni, dzaʼa nzata hadna həŋ ma luwaha Gilghat, 27ama inda aŋni kwalvaha gha, dzaʼa tsughwaɗadap tsughwaɗa inda aŋni nda hbatá vgha nda huzla ŋa ŋlu da vulu ta kəma Yawe, manda ya mna mghama ŋni, » ka həŋ.
28Ka mnanaftá Musa ta zlahu ta ghəŋa taŋ ta i Ilghazar, mnda dra skwi ŋa Lazglafta, nda Yəhusuwa zwaŋa Nuŋ, nda ya ŋa zəʼala həgaha ma mndəra la Israʼila. 29Ka Musa nda həŋ mantsa: « Ka tsughwaɗadap tsughwaɗa la Gat, nda la Rubeŋ ta Yardeŋ kawadaga nda kaghuni, inda taŋ nda hbatá vgha nda huzla vulu ŋa ŋlu da vulu ta kəma Yawe, ha ka hanagata tsa haɗik ya mista ghuni katsi, ka vlaŋta kuni ta həŋ ta kwakwara Gilghat ŋa haɗika za həga taŋ. 30Ama ka tsughwaɗadap a həŋ mista ghuni nda hbatá vgha nda huzla vulu wu, dzaʼa mutsu ma takataka ghuni həŋ ta haɗika za həga taŋ ta haɗika Kanʼana, » kaʼa.
31Ka i la Gat, nda la Rubeŋ zlghafta wa ni mantsa: « Skwi ya mnana Yawe ta kwalvaha gha ná, dzaʼa magay ŋni. 32Vərɗa aŋni, nda hbatá vgha nda huzla ŋa vulu ta kəma Yawe dzaʼa laba ŋni da haɗika Kanʼana, ama ŋa aŋni, kwakwar ya ka haɗika za həga ŋni ná, təv na ɓla Yardeŋ na, » ka həŋ.
33Ka vlaŋtá Musa ta la Gat nda la Rubeŋ, nda rita mndəra la Mənase, zwaŋa Yusufu ta kwakwara Sihuŋ, mghama la Amuru, nda kwakwara Ghug, mghama Basaŋ ta tsa haɗik ya nda luwaha ni, nda kwakwarha taŋ ta wanafta. 34Ka bəglaftá la Gat ta Divuŋ, nda Ghatarut, nda Gharugher, 35nda Ghatrutʼsufaŋ, nda Yaghzer, nda Yugbuha, 36nda Betʼnimra, nda Betʼharaŋ, ka bəglaftá həŋ ta tsa luwaha ya nda matsaka huzlu, nda kalakalaha ŋa rina fisika taŋ. 37Ka babəglaftá la Rubeŋ ta Hesbuŋ, nda Ilghale, nda Kiriyatayim, 38nda Nevu, nda Baghalʼmeghuŋ mbaɗanaf lu ta hga taŋ, nda Sivma. Ka tsatsanaftá həŋ ta lfiɗa hgu ta tsa luwaha babəglaf həŋ ya.
39Ka laghu la Mahir, zwaŋa Mənase da Gilghat, ka klaghutá həŋ ta tsa haɗik ya, ka ghəzlaftá tsi ta la Amuru ta nzaku hada ya. 40Mantsa tama, ka vlaŋtá Musa ta Gilghat, ŋa Mahir zwaŋa Mənase, ka nzatá tsi hada. 41Ka laghu Yaʼir, sana zwaŋa Mənase klaghutá zwana luwaha taŋ, ka hgə tsi ka luwaha Yaʼir. 42Ka laghu Nuva da klaghutá Kenat nda zwana luwaha ta wanafta. Ka hgə tsi ta Nuvah nda hga ni.
Currently Selected:
Mbs 32: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
