Mbs 27
27
Gwaɗa ta zay makwa ta həga
1Ka lagha kwagha Tsəlufahat zwaŋa Hefer, zigha Gilghat, zigha ndindliŋa Mahir, zigha papaha Mənase, ta uʼa la Mənase zwaŋa Yusufu həŋ. Hga taŋ na: I Mahla, nda Nugha, nda Hugla, nda Milka, nda Tirtsa həŋ. 2Ka lagha həŋ ta kəma i Musa, nda Ilghazar mnda dra skwi ŋa Lazglafta, nda la maliha, nda inda guyatá ghəŋ ta wa tgha tumpula guyaku. Ka həŋ mantsa: 3« Mtu mta da ŋni ma mtak. Tekw a tsatsi mataba bakwa Kurah ta ganavata sidi ta Yawe ya wa. Mtu mta dabga dmakwa ghəŋa ni, ama haɗ zwaŋa zguna ni wa. 4Ka hərɗuta hga da ŋni ta uʼa taŋ dabga kwala zwaŋa zguna ni kul haɗ rki na? Vlaŋnawa vla ta aŋni ta ŋa ni ma mayak manda ŋa zwana ma ni ma da ŋni, » ka həŋ.
5Ka kladaghatá Musa ta tsa gwaɗa taŋ ya ta kəma Yawe. 6Ka Yawe nda Musa mantsa: 7« Ta ŋa tsa kwagha Tsəlufahat ya. Vlaŋ vla ta həŋ ta mayak ka haɗika za həga mataba ŋa zwana ma ni ma da taŋ. Ka vlaŋta ka ta həŋ ta haɗika za həga da taŋ. 8Ka mnanata ka ta la Israʼila kazlay na: “Ka mtu mta mndu kul zlanatá zwaŋa zgun katsi, vlaŋta ghuni ta za həga ni ta makwa ni. 9Ka haɗ makwa ni wu, vlaŋta ghuni ta za həga ni ta zwana ma ni. 10Ka haɗ zwana ma ni wu, vlaŋta ghuni ta za həga ni ta zwana ma ni ma da ni. 11Ka haɗ zwana ma ni ma da ni wu, vlaŋta ghuni ta za həga ni ta la taŋ hɗeka ta uʼa taŋ. Tsa mndu ya dzaʼa vlaŋta lu ŋa ŋa ni,” kəʼa. Dzaʼa nzakway tsaya ŋa la Israʼila ka skwi ŋa magay taŋ, ka skwi ta raku, ka guram nda zlaha Yawe ta mnanaftá Musa, » kaʼa.
Zbapta Yawe ta Yəhusuwa
12Ka Yawe nda Musa mantsa: « Laf la ta ghəŋa na ghwáha Ghavarim na, ka nghanata ka ta tsa haɗik vlaŋ yu ta la Israʼila ya. 13Nghanata gha ya, dzaʼa laghu la kagha ŋa dzaʼa gha guya vgha nda dzidzíha gha manda ŋa zwaŋama gha Haruna. 14Tsaya ná, kabga ma fitika zbafta guyatá ghəŋ ta zlərɗa wi ta mtaka Tsiŋ, ganava ga kuni ta sidi ta lwa ɗa, ma mnaghunata ɗa ta maraŋtá nzakwa ɗa nda ghuɓa ta wa iri taŋ nda ma mbəzagaptá imi, » kaʼa. Tsaya ima Meriva ma Kades ta mtaka Tsiŋ.
15Ka Musa nda Yawe mantsa: 16« Ka zɗəgana zɗa tsi ta Yawe, Lazglafta ta ŋanatá hafa inda skwi ta hafu, zbaf zba ta mndu ka ghəŋ ta ghəŋa guyatá ghəŋ, 17ta laviŋta klanatá kəma ta həŋ ma vulu dər dzaʼa diga həŋ, kada kwala guyatá ghəŋa mnduha Yawe nzata manda bra rini kul haɗ mnda nghay, » kaʼa.
18Ka Yawe zlghanaftá wi ta Musa mantsa: « Klaf kla ta Yəhusuwa zwaŋa Nuŋ, mndu ya mamu sulkum mida ya. Ka fanaghata ka ta dzvu. 19Ka sladanata ka ta kəma Ilghazar, mnda dra skwi ŋa Lazglafta, nda ya ta kəma inda guyatá ghəŋ. Ka famta ka ma slna ni ta wa ira taŋ. 20Ka vlaŋta ka ta faway ma mbrakwa gha, kada sna inda guyatá ghəŋa la Israʼila ta gwaɗa ni. 21Ka sladata tsi ta kəma Ilghazar mnda dra skwi ŋa Lazglafta, ya dzaʼa ɗawafta ŋa ni ta tsata guma Urim ta kəma Yawe. Dzaʼa sna sna i Yəhusuwa nda inda guyatá ghəŋa la Israʼila ta skwiha dzaʼa mnafta tsi dər yawu tsi, » kaʼa.
22Ka magatá Musa manda ya mnanaf Yawe. Ka klaftá tsi ta Yəhusuwa, ka sladanata ta kəma Ilghazar, mnda dra skwi ŋa Lazglafta, nda ya ta kəma inda guyatá ghəŋ. 23Ka fanaghatá tsi ta dzvu, ka famta ma slna ni, manda ya mnaf Yawe nda ma wa Musa.
Currently Selected:
Mbs 27: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
