Mbs 22
22
Zbay Balak ta ksiʼaftá la Israʼila
1Ka vraghutá la Israʼila, ka fatá ghuɓa taŋ ma daɓiha Muwav ta ɓla Yardeŋ, mbəŋ nda Yeriku. 2Ka nghanatá Balak, zwaŋa Tsipur ta inda skwi magana la Israʼila ta la Amuru. 3Ka ghudzaku la Muwav ta ghudzaku nghanar həŋ ta ndəghatá tsa mnduha ya. Ka ksutá zləŋ katakata ta la Muwav ta kəma la Israʼila. 4Ka la Muwav nda galata mnduha la Midyaŋ mantsa: « Nana guyatá ghəŋa na mnduha na dzaʼa zutá vli ta wamafta, manda ya ta niʼavata sla ta kuzuŋ ma vwah, » ka həŋ.
Ma tsa fitik ya, Balak, zwaŋa Tsipur ná, tsatsi si mghama Muwav. 5Ka ghunaftá tsi ta gwal ghunay da Bilgham, zwaŋa Bəghur, ma Petur ta wa zala Yufratis ma haɗika la taŋ ŋa mnanata: « Wana sana mnduha hadna ta sliʼagapta ma Masar, ta ndəghanaftá haɗik dəɓaʼ. Wana həŋ ta nzata mbəŋ nda iʼi. 6Sawi, kdəkkdək, ka ksiʼiɗifta ka ta na mnduha na, kabga malaghu mala mbrakwa taŋ ta iʼi, kawayaka skwi dzaʼa za za yu ta ghwa, ka ghəzlaftá həŋ ta haɗika ɗa. Nda sna yu, mndu ya tfanagha ka ta wi ná, nda tfa wa ni, mndu ya ksiʼaf ka guli ná, nda ksiʼa, » kaʼa.
7Ka laghu la galata mnduha la Muwav, nda la galata mnduha la Midyaŋ tama nda klatá skwi ŋa vza mandaŋ. Ɓhadaghata taŋ da Bilgham, ka mnanaftá həŋ ta gwaɗaha Balak. 8Ka Bilgham nda həŋ mantsa: « Hanawa hadna, ŋa mnaghunata ɗa ta zlgha wa ni manda ya dzaʼa mnihata Yawe, » kaʼa. Ka nzatá tsa maliha la Muwav ya tama ga Bilgham. 9Ka lagha Lazglafta slanaghatá Bilgham, kaʼa nda tsi mantsa: « I wa na mnduha ga ghuni na na? » kaʼa. 10Ka Bilgham nda Lazglafta mantsa: « Balak, zwaŋa Tsipur mghama la Muwav ta ghunaktá həŋ, ka həŋ nda iʼi na: 11“Wana sana mnduha ta sab ma Masar, ka ndəghanaftá həŋ ta haɗik dəɓaʼ. Sawi da ksiʼiɗiftá həŋ, kawayaka skwi dzaʼa za za yu ta ghwa ta ghəŋa taŋ, ka ghəzlaftá həŋ,” » kaʼa. 12Ka Lazglafta nda Bilgham mantsa: « Ma sliʼaf ka mista taŋ, ma ksiʼi ka ta tsa mnduha ya, kabga nda tfa wi ta ghəŋa taŋ, » kaʼa. 13Ga sərɗək ga mahtsima ni, ka sliʼaftá Bilgham, kaʼa nda tsa maliha ghunaf Balak ya mantsa: « Vrawa vra ta haɗika ghuni, kabga kwalaghu kwala Yawe ta zliɗista ka dzaʼa mista ghuni, » kaʼa. 14Ka sliʼaftá tsa maliha la Muwav ya ka vradaghata da Balak, ka həŋ nda tsi mantsa: « Kwalaghu kwala Bilgham ta sagha mista ŋni, » ka həŋ.
15Ka ghunəglaftá Balak ta sanlaha ma maliha malaghu ndəghatá həŋ, malaghu sgita taŋ ka tsaha taŋtaŋ ya. 16Ɓhadaghata taŋ da Bilgham, ka həŋ nda tsi mantsa: « Wya ka Balak, zwaŋa Tsipur: “Kdəkkdək, ma kwalaghu ka ta sagha da ini! 17Dzaʼa vlagha vla yu ta glaku katakata, dzaʼa maga gha maga yu ta inda skwi dzaʼa mnihata ka. Kdəkkdək sawi, ka ksiʼiɗifta ka ta na mnduha na!” » kaʼa. 18Ama ka Bilgham nda kwalvaha Balak mantsa: « Dər má dzaʼa vliha vla Balak ta inda tsedi, nda inda dasu ma həga ni ná, laviŋta a yu ta ɓlanaptá zlaha Yawe, Lazglafta ɗa ka maga skwi dər má kiʼa tsi, dər má dagala a tsi wa. 19Kdəkwakdək hanawa hana hadna, kaghuni guli ta na rviɗik na manda ŋa tsaha ya, ka snanata yu ta skwi dzaʼa mniglihata Yawe, » kaʼa.
20Ka lagha Lazglafta slanaghatá Bilgham girviɗik. Kaʼa nda tsi mantsa: « Ka ŋa hga kagha sagha na mnduha na katsi, sliʼaf sliʼa ka dzaʼa ka kawadaga nda həŋ! Ama skwi ya dzaʼa mnaghata yu kweŋkweŋ dzaʼa ka magay, » kaʼa. 21Ga sərɗək ga mahtsima ni, ka sliʼaftá Bilgham, payafha ta kəɗiha ni, ka dzaʼa kawadaga nda maliha la Muwav.
Kəɗiha Bilgham nda duhwala Yawe
22Ama ka gufaftá ŋuɗufa Lazglafta nghər tsi ta sliʼa ni. Ka nzatá duhwala Yawe ghərndaŋ ta tvi ŋa kla wa ni ta lab tsi ta kəɗiha ni kawadaga nda kwalvaha ni his. 23Ka nghaŋtá tsa kəɗih ya ta duhwala Yawe ta nzata ghərndaŋ ta tvi, nda ŋatá kafay pit ma dzvu. Ka zluŋtá tsi ta tvi, ka dzaʼa nda ma vwah. Lagha Bilgham ka dza kəɗih ŋa vranakta ta tvi. 24Ka laghu duhwala Yawe da nzata ta tvi ma zlərɗa vli mataba matsakha his ka pala ta labi nda ma vwaha inabi. 25Ka nghəglaŋtá tsa kəɗih ya ta tsa duhwala Yawe ya, ka ɓisl tsi ta vgha ta vata matsak. Ta ɓisl tsi ta vgha ya, ka nzihatá tsi ta səla Bilgham, ka dzəgəltá tsi. 26Ka sliʼiglaftá duhwala Yawe ka laghwi da klatá wa ni ma sana vli slrehwa kul haɗ sana vli ŋa mbəɗaŋtá vgha dər nda ga zeghwi dər nda ga zlaɓa. 27Ka nghaŋtá tsa kəɗih ya ta tsa duhwala Yawe ya, ka hnatá tsi, tata nzaku Bilgham tida. Ka gufaftá ŋuɗufa Bilgham, ka dzuŋtá tsi ta tsa kəɗih ya nda dafa ni.
28Ka gunanatá Yawe ta wi ta tsa kəɗih ya, ka gwaɗ tsi ta gwaɗa. Kaʼa nda Bilgham mantsa: « Nya maga gha yu ta kəl ka ka dza iʼi mahkəna səla na na? » kaʼa. 29Ka Bilgham nda tsa kəɗih ya mantsa: « Kabga ta gatsuwa gha ka nda iʼi! Ka má mamu kafay ma dzva ɗa katsi, má ta dzagha dza yu ndana ndana! » kaʼa. 30Ka tsa kəɗih ya nda Bilgham mantsa: « Kəɗiha gha ya ta gɗata ka ta ŋlu tida ha ka sagha ta gita a yu wu ra? Manda nana si ta gɗata yu ta magay nda kagha ra? » kaʼa. « Mandana a wu, » kaʼa.
31Ka gunanatá Yawe ta iri ta Bilgham, ka nghaŋtá tsi ta duhwala Yawe ta sladu ghərndaŋa ma tvi, nda ŋatá kafay ma dzvu. Ka dzagatá Bilgham ta ghəŋ, ka zləmbata zlumbruh ta haɗik. 32Ka duhwala Yawe nda tsi mantsa: « Kabgawu kəl ka ka dzuŋtá kəɗiha gha hkən səla na? Nda ngha ka, iʼi ta sagha zləŋaghaftá tvi, kabga da iʼi ná, ɗina a na mbaɗa gha na wa. 33Nda ngha kəɗih ta iʼi, hkən tsaghuta ni ta wara ta vata iʼi. Ka má tsaghu a tsi ta wara ta vata iʼi wu, má dzagha dza yu hada hada, má ŋa zlanaŋta ɗa ta hafu ta tsatsi, » kaʼa.
34Ka Bilgham nda tsa duhwala Yawe ya mantsa: « Gaga yu ta dmaku, kabga sna a yu kazlay kagha ya ta nzata ka zləŋiɗiftá tvi kəʼa wa. Ndanana, ka zɗəgagha a na mbaɗa ɗa na wu, ka vra yu, » kaʼa. 35Ama ka duhwala Yawe nda tsi mantsa: « La nda na mnduha na, ama gwaɗa dzaʼa mnaghata yu dzaʼa ka da mnay, » kaʼa. Ka laghu Bilgham kawadaga nda tsa maliha Balak ya.
36Snaŋta Balak kazlay waʼa Bilgham ta sagha kəʼa, ka sagha tsi da gumay ha da luwa Muwav ta mukuma Arnuŋ ta kɗavakta kwakwara ni. 37Ka Balak nda Bilgham mantsa: « Kidaghi ghwanadapta ɗa ta mnduha da hga kagha! Kabgawu kwal ka sagha na? Slaghu a yu ka vlaghatá glaku wu ra? » kaʼa. 38Ka Bilgham nda Balak mantsa: « Mantsa nzakwa ni, sagha sa yu da kagha, ndanana dzaʼa laviŋ lava yu ta mna dər nahgani tsi ra? Gwaɗa dzaʼa fiɗimta Lazglafta ma wa ɗa, dzaʼa mnə yu, » kaʼa.
39Ka laghu i Bilgham nda Balak. Ka ɓhadaghatá həŋ da Kiriyatʼhutsut. 40Ka vlatá Balak ta pla ghəŋ nda sla, nda rina fisik, ka tsghafta tsi ta mayaka Bilgham, nda tsa maliha ta pghafta ya. 41Ga sərɗək ga mahtsima ni, ka klaftá Balak ta Bilgham, ka kladafta ta Bamut Baghal, ma vli ya ta nghaku kɗavakta mnduha.
Currently Selected:
Mbs 22: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
