Mbs 16
16
Gatá sida Kurah
1Mamu sana mndu Kurah hga ni, zwaŋa Yitshar zigha Kehat zwaŋa Levi kawadaga nda i Dataŋ nda Aviram zwana Iliʼav, nda Une zwaŋa Pelet ma mndəra la Rubeŋ, 2ka sliʼavaftá həŋ ta ghəŋa Musa kawadaga nda sanlaha ma la Israʼila his dərmək nda hutaf mbsak. Hahəŋ maliha mataba guyatá ghəŋa mnduha, hahəŋ gwal ta hgadaghata lu da vla tska vgha, hahəŋ gwal laghu hga taŋ da zərwa. 3Ka tskadaghatá həŋ ta vgha slanaghatá i Musa nda Haruna, ka həŋ nda həŋ mantsa: « Prək tsa tama! Inda na guyatá ghəŋa mnduha na ná, nda ghuɓa həŋ, mataba taŋ Yawe guli. Kabgawu ta kəl kaghuni ka gla ghəŋ ta ghəŋa guyatá ghəŋa mnduha Yawe na? » ka həŋ.
4Na snanata Musa ta tsa gwaɗa ya, ka zləmbatá tsi zlumbruh ta haɗik. 5Kaʼa nda Kurah nda ya nda bakwa ni mantsa: « Ga sərɗək mahtsim, dzaʼa snamam sna Yawe ta ya ka ŋa ni, ta ya nda ghuɓa ta laviŋtá ɓhadaghata da tsi. Tsa mndu dzaʼa zbapta tsi ya, dzaʼa zlanaŋ zla ta tvi ŋa gavadaghata da tsi. 6Kagha Kurah, nda inda gwal mista gha tani, wya skwi ŋa magay ghuni: Ka hlafta kuni ta gədzehha dra urdi. 7Mahtsim, ka vavafta kuni ta vu ta həŋ, ka pghanaghata kuni ta urdi ta drə lu nda dra ta ghəŋa ni ta kəma Yawe. Tsa mndu dzaʼa zbapta Yawe ya ná, tsaya mndu nda ghuɓa. Kaghuni la Levi, kaghuni katək ta fərtiŋta! » kaʼa.
8Ka Musa nda Kurah guli mantsa: « Snawa sna, kaghuni la Levi! 9Slaghu a ka ŋa ghuni na fata Lazglafta la Israʼila ta kaghuni ka ŋa ni mataba guyatá ghəŋa la Israʼila, ŋa mutsafta ghuni ta gavadaghata da tsi, ŋa magay ghuni ta slna ma həga tumpula Yawe, nda ya ŋa nzakway ta kəma guyatá ghəŋ ka maga slna ma vla taŋ ya wu ra? 10Vlaghuna vla ta tvi ŋa gavadaghata ghuni ta vata ni, kagha, nda inda zwana ma gha la Levi. Ta ghəŋa tsaya guli ta zbəgəlta kuni ta slna dra skwi ŋa Lazglafta! 11Dabga tsaya kəl kagha kawadaga nda gwal mista gha ka tskanavatá vgha ta Yawe! Wa Haruna kəl kuni ka ruruŋwaku ta ghəŋa ni? » kaʼa.
12Ka ghunaftá Musa ta mndu ŋa hganaktá i Dataŋ nda Aviram zwana Iliʼav, ama ka tsaha ya nda tsi mantsa: « Haɗ aŋni ta lagha wa! 13Ta slaghu a tsa hlagapta gha ta aŋni ma haɗik ya ta mbəzaku uʼa nda zuɗum mida, ŋa rwaŋnata ma mtak ya wu ra? Ta kumay ka ta nzəglaku ka mgham ta ghəŋa aŋni ra? 14Kay! Kahwathwata ná, da haɗik ta mbəzaku uʼa nda zuɗum mida a ta kla ka ta aŋni wa! Haɗ vwaha za həga, dər vwaha inabiha vlaŋna ka wa! Ka ghulpata mnduha hlafta kagha ta na mnduha na ra? Haɗ ŋni ta lagha wa! » ka həŋ. 15Ka gufaftá ŋuɗufa Musa katakata, kaʼa nda Yawe mantsa: « Ma tsuʼaf ka ta mbəhuha taŋ. Klaghu a yu ta kəɗih dər turtuk da həŋ wu, haɗ dmaku gana yu ta mndu dər turtuk mataba taŋ wu, » kaʼa.
Tsanaghatá guma ta Kurah nda mnduha ni
16Ka Musa nda Kurah mantsa: « Kagha nda inda gwal mista gha, ka sagha kuni mahtsim ta kəma Yawe, kagha, nda hahəŋ, nda Haruna. 17Ka hlafta inda kaghuni ta gədzehha ghuni, ka pghafta kuni ta urdi ŋa dray nda dra tida, ka kladaghata inda mndu ta gədzeha ni ta kəma Yawe, tsaya gwagwata gədzehha his dərmək nda hutaf mbsak. Ka klafta kagha ta ŋa gha gədzeh, mantsa ya Haruna guli, » kaʼa. 18Ka hlaftá inda taŋ ta gədzehha taŋ, ka tsatsaftá həŋ ta vu tida, ka paghanaghatá həŋ ta urdi ta ghəŋa ni. Ka sladatá həŋ ta tva lami da tumpula guyaku kawadaga nda i Musa nda Haruna. 19Ka tskanatá Kurah mbəŋ nda i Musa nda Haruna ta inda guyatá ghəŋa mnduha ta wa tgha lami da tumpula guyaku.
Ka maravatá glakwa Yawe da inda guyatá ghəŋa mnduha. 20Ka Yawe nda i Musa nda Haruna mantsa: 21« Dgaghuwa vgha nda guyatá ghəŋa na mnduha na, ka zaɗanata yu ta həŋ nda va nana, » kaʼa.
22Ka zlambatá i Musa nda Haruna zluzlumbruh ta haɗik, ka həŋ mantsa: « Lazglafta ɗa, Lazglafta ta ŋanatá hafa inda skwi ta hafu. Mndu turtuk ta gatá dmaku ná, ka dzaʼa ka da ɓasanavatá ŋuɗuf ta inda guyatá ghəŋa mnduha rki! » ka həŋ.
23Ka Yawe nda Musa mantsa: 24« Mnana mna ta guyatá ghəŋa mnduha, ka diʼiŋaghuta həŋ nda kuraghwa vla tumpula i Kurah, nda Dataŋ, nda Aviram, » kaʼa.
25Ka sliʼaftá Musa ŋa dzaʼa slanaghatá i Dataŋ nda Aviram. Ka sliʼaftá galata mnduha Israʼila mista ni. 26Kaʼa nda guyatá ghəŋa mnduha mantsa: « Wyawa dzvu! Gavaghuwa gava ta vata tumpulha na ghwaɗaka mnduha na, ma ksaŋ kuni ta inda skwa taŋ, da zwaɗuta kaghuni dabga inda dmakuha taŋ! » kaʼa. 27Ka diʼiŋaghutá həŋ nda kuraghwa vla tumpula i Kurah, nda Dataŋ, nda Aviram. Ka sab i Dataŋ nda Aviram, ka sladata həŋ ta wa tgha tumpulha taŋ kawadaga nda miʼa taŋ, nda zwana taŋ, nda zighiha taŋ. 28Ka Musa mantsa: « Ma nana dzaʼa snaŋta kuni kazlay Yawe ta ghunaftá iʼi ŋa hɗanamtá inda na slnaha na kəʼa. Iʼi gaghəŋ gaghəŋa ɗa a ta tsaʼatá wa. 29Ka lagha na mnduha na ka rwuta manda va ya ta rwaku inda mnduha, ka manda ŋa inda mndu kɗavakta hafa na mnduha na katsi, ba Yawe a ta ghunaktá iʼi wa. 30Ama ka skwa mandərmimi zlaganap Yawe katsi, ka guna guna haɗik ta wi ka ndutá həŋ nda inda skwiha taŋ katsi, ka nda hafu nda hafu laha həŋ da haɗik katsi, mantsa tama, dzaʼa nda sna kuni kazlay si hərtəta hərtəta na mnduha na ta Yawe kəʼa, » kaʼa.
31Tata kɗay kɗay ta mna inda tsa gwaɗaha ya, ka tavaptá haɗik mista səlaha taŋ. 32Ka gunatá haɗik ta wa ni ka ndutá həŋ, nda gwal ga taŋ tani, mantsa ya inda mnduha Kurah, nda inda skwiha taŋ tani. 33Ka laha həŋ nda hafu nda hafu, nda inda skwiha ka ŋa taŋ, da haɗik, ka bukwanaghatá haɗik ta həŋ. Mantsa ya ka həŋ zwaɗuta mataba guyatá ghəŋa mnduha la Israʼila. 34Inda la Israʼila ta wanaftá həŋ, ka hwayaghutá həŋ snər həŋ ta waha taŋ, kabga ka həŋ na: « Hwayama! Da ndaghatá haɗik ta amu guli! » ka həŋ. 35Ka sab vu da Yawe, ka dəghaɗutá tsa mnduha his dərmək nda hutaf mbsak ta vla urdi ŋa dray nda dra ya.
Currently Selected:
Mbs 16: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
