Mak 9

1Kaʼa nda həŋ guli mantsa: « Kahwathwata ka yu ta mnaghunata, mamu sanlaha ma mnduha mataba gwal hadna, dzaʼa kwal kul rwuta ta saha ga mghama Lazglafta nda mbraku, ŋa nghaŋta taŋ nda ira taŋ, » kaʼa.

Mbəɗavafta Yesu

Mat 17:1-13, Luk 9:28-36

2Tahula fitik mkuʼ, ka hlaftá *Yesu ta i *Piyer nda Yakubu, nda Yuhwana mista ni, ka ŋlaghatá həŋ ta sana ghwá nda slra. Lafa taŋ ta tsa ghwá ya, ka mbəɗavaftá tsi ta kəma taŋ. 3Ka wuɗaku lgutha ni tilil katakata. Haɗ mndu ta na ghəŋa haɗik na dzaʼa laviŋtá ghuɓaptá skwi ŋa ɓanafta ŋa laf taɓta tsaya wa.#9:3 Gray nda 2 Piyer 1:16-18. 4Ta wa ira tsa duhwalha ni ya, ka zlagaptá i Iliya nda Musa, ka ghwa yiva nda Yesu. 5-6Ka ksafta zləŋ ta tsa duhwalha ya katakata. Sna a Piyer ta skwi ŋa mnay wa. Gi ka Piyer nda Yesu mantsa: « Maləma ɗa, ɗina ka nzata mu hadna. Magafma maga ta həgaha tumpul hkən. Pal ŋa gha, pal ŋa Musa, pal ŋa Iliya guli, » kaʼa. 7Ka saha kusay tɗik bukwamtá həŋ. Ka gwaɗagaptá lwi ma tsa kusay ya. Kaʼa mantsa: « Nana na zwaŋa ɗa ta ɗvu yu nda ŋuɗufa ɗa. Snawa ta gwaɗa da tsi,#9:7 Ngha ta 1:11. » kaʼa. 8Gi zləwaɗ zləwaɗ zləwaɗ, ka duhwalha ni ka nanagha vli ta wanaftá həŋ. Kəʼa ka həŋ ná, Yesu turtukwa ni yeya nghaŋ həŋ kawadaga nda həŋ. 9Ka sliʼaftá həŋ ka saha ta tsa ghwá ya. Ta saha həŋ, ka zlahanaghatá Yesu ta tsa duhwalha ya. Kaʼa mantsa: « Yaha yaha kuni da mnaŋtá skwi nghaŋ kuni ŋa mndu ha ka sagha fitik ya dzaʼa sliʼagabta *Zwaŋa mndu mataba gwal nda rwa, » kaʼa. 10Ka snatá həŋ ta tsa gwaɗa ya, ama ka laghu həŋ da ɗaɗawaku mataba taŋ « nahgani sliʼagabta mataba gwal nda rwa? » ka həŋ. 11Mantsa tama, ka ɗawaŋtá duhwalha ni da Yesu. Ka həŋ mantsa: « Kabgawu ta kəl gwal tagha zlahu ŋa mnduha ka mnay kazlay: Tiŋəl Iliya dzaʼa saha karaku#9:11 Gray nda Malatsi 3:23. kəʼa na? » ka həŋ. 12Ka Yesu nda həŋ mantsa: « Aŋi, dzaʼa tiŋlaghu tiŋla Iliya ta saha ŋa payanatá inda skwiha. Ama kabgawu vindafta lu ta ghəŋa Zwaŋa mndu kazlay: Dzaʼa ghuyay ta ɗaŋwa katakata, ɗvəta a lu wu kəʼa? 13Ama ka yu ta mnaghunata ná, ghada ghada Iliya ta saha ka ghuyanaptá həŋ ta ɗaŋwa manda ya kumaŋ həŋ. Mantsa ya ka gwaɗa Lazglafta mnata ta ghəŋa ni, » kaʼa nda həŋ.

Mbanafta Yesu ta sana zwaŋ ksu seteni

Mat 17:14-21, Luk 9:37-43

14Manda vradaghata i *Yesu ta vata tsa duhwalha ni si zlana həŋ ya, ka nghaŋtá həŋ ta tskata mnduha ta wanaftá tsa duhwalha ya nda gwal tagha zlahu ŋa mnduha ta zlərɗutawi nda həŋ. 15Na ghur, nghay tsa tskatá mnduha ya ta Yesu ná, nda ghada ndusadaghatani da həŋ. Ka sliʼafta həŋ nda hwaya ka dzaʼa ga zgu ŋa ni. 16Ka Yesu ɗawaŋta da həŋ mantsa: « Ta ghəŋa wu ta zlərɗa kuni ta wi nda həŋ na? » kaʼa. 17Ka sana mndu mataba tsa mnduha ya zlghanaftá wi mantsa: « Maləma ɗa, zwaŋa ɗa ksu seteni, vlaŋ a ta tva gwaɗa wu kəl yu ka kladaghata da kagha. 18Ka ta kumay tsa skwi ya ta slanapta katsi, gi slanatani ta haɗik. Gi pghay tsa zwaŋ ya ta mahupak ma wi, dzislayni ta sliʼiŋ ka hpaɗay, gi dzəŋ vgha ni. Tsaya kəl yu ka ndəɓa dzvu da duhwalha gha, kambəl ka ghəzligiŋtá həŋ ta tsa seteni ya ma tsa zwaŋa ɗa ya mazlay, ama ka traptá həŋ, » kaʼa nda tsi. 19Ka Yesu nda həŋ mantsa: « Ghwaɗaka mndəra mnduha kul haɗ zlghay nda ŋuɗuf da həŋ! Ŋa kulam yawu dzaʼa nzata yu ta vata kaghuni? Ŋa kulam yawu dzaʼa nzata yu ka suʼuwaghunata? Klagaɗighawa tsa zwaŋ ya, » kaʼa nda həŋ. Ka klədanaghatá lu. 20Gi ghur nghay tsa zwaŋ ya ta Yesu ná, ka gi slanaptá tsa seteni ya nda mbraku, ka slanata ta haɗik, ka kwatambal tsi ta vgha ta haɗik, ka pgha mahupak ma wi. 21Ka ɗawaŋtá Yesu da da ni ma tsa zwaŋ ya: « Daga Yawu zlrafta na skwi na ta na zwaŋ na na? » kaʼa nda tsi. « Daga ma ga zwaŋa ni ksafta tsi. 22Baɗu ma sani, klafta ni wuɗamta da vu, dər da imi tsi, gi wuɗamtani ma ŋa dzata ni, kəʼa ta magay tazlay. Ka laviŋ lava ka, kdəkkdək kataŋna kata, tawa ta hiɗahiɗa ta aŋni! » ka tsa mndu ya. 23« Ka laviŋ lava ka ri waká ka? Nu dzaʼa kwal lu laviŋta magata ka zlghaf zlgha mndu nda ŋuɗuf na? » ka Yesu nda tsi. 24Gi ka kapaŋtá da ni ma tsa zwaŋ ya ta lwi, « Zlghaf zlgha yu, sawi katihata ma hta ta zlghay ɗa, » kaʼa nda tsi. 25Nghay Yesu ta gazladaghata mnduha nda hwaya, ka davanaghatá tsi ta tsa seteni ya. « Ghwaɗaka Sulkum ta pya mndu ka gwaɗa nda ya ka snaŋtá sləməŋ. Sab sa ma na zwaŋ na, ka yu ta mnaghata. Yaha ka vrəgladamta ɗekɗek dida, » kaʼa. 26Ka wahata tsa seteni ya ka ghudzanaftá tsa zwaŋ ya nda mbraku, ka sab tsi mida. Ka niŋtá tsi ta tsa zwaŋ ya gzəmblaʼ manda mndu nda mta, ha ka mnay ndəghata mnduha kazlay: Nda mta kəʼa. 27Ama ka ŋanatá Yesu ta dzvu, ka sliʼanafta, ka sliʼaftá tsi ka sladata. 28Manda lama Yesu kawadaga nda duhwalha ni da həga nda ghəŋa taŋ, ka ɗaw həŋ da tsi. Ka həŋ mantsa: « Kabgawu kəl aŋni ka traptá ghəzligiŋtá tsa seteni ya katək na? » ka həŋ. 29« Mndərga tsa Sulkum ya ná, ba nda maga duʼa kada saba tsi, » kaʼa nda həŋ.

Mnəglaŋta Yesu ta dzaʼa ni mtaku nda sliʼagaptani

Mat 17:22-23, Luk 9:43-45

30Ka sliʼaftá həŋ hada ka taghatá haɗika Galili. Va a *Yesu si ta nghaŋta mndu wu, 31kabga ta tagha skwi ŋa duhwalha ni. Wya skwi ta mnə tsi ŋa taŋ: « Dzaʼa ksaf ksa lu ta *Zwaŋa mndu ka vlata ma dzva mnduha ŋa dzata taŋ. Baɗu mahkən, ŋa sliʼafta ni nda hafu. » 32Ama sna a duhwalha ni ta tsa gwaɗa ya wa. Ta zləŋ həŋ guli nda ɗawaŋta da tsi.

Wa dzaʼa nzaku ka mali

Mat 18:1-5, Luk 9:46-48

33Ka ɓhadaghatá həŋ da luwa Kafarnahum. Ta nzaku həŋ ma həga, ka ɗawaŋtá *Yesu da həŋ: « Nahgani tsa skwi ta uwaʼuwal kaghuni ta tvi ya na? » kaʼa nda həŋ. 34Sriw nza nza həŋ, pslaf a həŋ ta wa taŋ wa, kabga si ta zba snaŋtá mali mataba taŋ həŋ, na skwi si ta uwaʼuwal həŋ ta tvi. 35Ka nzadatá Yesu, « saghawa sa » kaʼa nda həŋ. « Ka ta kumay mndu ta nzaku ka mali ta wa ira Lazglafta katsi, vraganatani ta ghəŋa ni ka sagəŋ gudzekw mista lamndu, ka nzakwa ni ka kwalva taŋ guli. » 36Ka hgaftá tsi ta sana zwaŋ kwitikw, ka sladanata mataba taŋ. Ka tskwaftá tsi ma ghuva ni, kaʼa nda həŋ mantsa: 37« Dər wati ma mndu ta tsuʼaftá sani turtuk mataba na zwani na, kabga iʼi, vərɗa iʼi tsuʼaf tsa mndu ya nda tsa. Dər wati ma mndu ta tsuʼaftá iʼi guli, vərɗa iʼi a tsuʼaf tsi wa, ama mndu ya ta ghunigihata tsuʼaf tsi, » kaʼa.

Mndu ta vla zɗaku ŋa amu ná, ŋa amu tsa

Luk 9:49-50

38Ka Yuhwana nda tsi mantsa: « Maləma ɗa, nda ngha ŋni ta sana mndu ta ghəzla duhwalha halaway ma mndu. Ka tsa mndu ya na: “Yesu ta vlihatá mbraku,” kaʼa. Ka lmu ŋni, kabga haɗ ta dzaʼa mista amu wu, » kaʼa. 39Ka *Yesu mantsa: « Ma lmu kuni ta mndu, kabga haɗ mndu ta maga mazəmzəm nda hga ɗa, dzaʼa vza rutsak ta iʼi wa. 40Mndu kul haɗ ta raza amu guli ná, ŋa amu tsa mndu ya. 41Dər wati ma mndu ta taghunaftá imi rauʼ ŋa say, kabga nzakwa ghuni ka ŋa *Kristi, kahwathwata ka yu ta mnaghunata, haɗ nisəla tsa mndu ya dzaʼa zwaɗuta ɗekɗek wu, » ka Yesu.

Ɗaswa ka mndu nda vzamta mndu ma dmaku

Mat 18:6-9, Luk 17:1-2

42« Ka vzam vza mndu ta sani turtuk mataba na zwani ta zlghafta iʼi na ma dmaku katsi, dzaʼa ghuyay ta ɗaŋwa katakata da Lazglafta. Ta dər má ya hbanam lu ta dughura buna dagala ma ŋurzluŋ, ka vzaghata da drəf, kaʼa. 43Ka si dzva gha ta famta kagha kəl ka ka zləmbamta ma dmaku katsi, tsiŋ tsa gha ta tsa dzvu ya. Ta dər mutsafta gha ta hafu nda dzva gha ka buɗuduŋ, ka lama gha nda dzvuha gha yipaʼ his his da həga vu kul haɗ ta mtavata ɗekɗek. 44[Hada, mamu mtarakha ta yamta ma vgha ŋəɗməts, rwava a həŋ wa. Haɗ tsa vu ya ta mtaku ɗekɗek guli wa.] 45Ka səla gha ta famta kagha kəl ka zləmbamta ma dmaku katsi, tsiŋ tsa ta tsa səla ya. Ta dər mutsafta gha ta hafu nda səla gha sluŋ turtuk, ka nzakwa gha nda səlaha gha yipaʼ his his, ŋa wuɗamtá kagha da həga vu. 46[Hada, mamu mtarakha ta yamta ma vgha ŋəɗməts, rwava a həŋ wa. Haɗ tsa vu ya ta mtaku ɗekɗek guli wa.] 47Ka ira gha turtuk, ta famta kagha kəl ka ka dəɗamta da dmaku katsi, tsakwasliŋ tsakwasla ta tsa iri ya. Ta dər lama ka nda ira gha guzliŋ turtuk da ga mghama Lazglafta, ka nzakwa gha nda ira gha his his, ŋa wuɗamtá kagha da həga vu. 48Hada, mamu mtarakha ta yamta ma vgha ŋəɗməts, rwava a həŋ wa. Haɗ tsa vu ya ta mtaku ɗekɗek guli wa.#9:48 Ngha ta Isaya 66:24. 49Inda mndu dzaʼa nəmanaf nəma vu manda slughul. [Inda skwi ta drə lu ŋa Lazglafta ta kuktaf kukta lu ta slughul tida] 50Slughul ná, skwi ɗina ya, ama ka ta haɗ zɗaku mida ɗekɗek wu katsi, nu dzaʼa magəglamta kuni mida ŋa vranamtá si tsa nəmatani ya na? Mamu ka slughul ma kaghuni. Nzawa nza nda zɗaku mataba ghuni, sanlaha nda sanlaha, » kaʼa.

Currently Selected:

Mak 9: xed

Highlight

Copy

Compare