Mak 4

Mahdihdi nda mnda wutsa hulfa

Mat 13:1-9, Luk 8:4-8

1Ma sana fitik, ka nzəglatá *Yesu ka tagha skwi ŋa mnduha ta wa drəfa Galili. Ka tskadaghatá mnduha ta vgha ŋərɓisl ta vata ni, kəl tsi ka laghu nzagapta ma kwambalu ta wa tsa drəf ya, ta nzatá inda tsa mnduha ya rpaʼ ta wa ni. 2Ka taghə tsi ta ndəghata skwi ŋa taŋ nda mahdihdi. Wya kaʼa nda həŋ ma tsa tagha skwa ni ya: 3« Snawa ka mnaghunata yu ɓa! Mbaɗa sana mndu ka sliʼaftá ka laghu da wutsa hulfa ma vwaha ni. 4Tata wutsaywutsay mantsa, ka rkatá sanlaha ta tvi ka sliʼadaghatá ɗyakha da ɗaguta. 5Ka rkatá sanlaha ta kluluh ma vli kul slaghutá haɗik, ka gi ɗyaftá tsi misimmisim kabga sira a haɗik ta ghəŋa ni wa. 6Na safa fitik dzafta tida, ka zlghutá tsi həw ka ghwaluta, kabga slaghu a slrəŋ mista ni wa. 7Ma teki sanlaha, ka glanaghatá teki ka raghwanata pghaf a ta ghəŋ wa. 8Ta gənək sanlaha, ka ɗayafta tsaha ya, ka galafta, ka pghaftá ghəŋ ka zwaŋ dzeʼdzeʼ. Miɗiɗa ghəŋa sanlaha, selela ghəŋa sanlaha, ɓərzləzla ghəŋa sanlaha. 9Mndu nda sləməŋa snay, ka sna tsi, » kaʼa nda həŋ.

Kabgawu ta kəl Yesu ka gwaɗa nda mahdihdi na?

Mat 13:10-17, Luk 8:9-10

10Manda dgaghuta i *Yesu nda duhwalha ni kawadaga nda sanlaha ma mnduha ta vgha, ka ɗawaŋtá həŋ ta ghəŋa tsa mahdihdi ya da tsi. 11« Kaghuni, vlaghuna vla lu ta snaŋtá ɗifa ta gwaɗa ta ghəŋa ga mghama Lazglafta, ama ŋa sanlaha ná, ba nda mahdihdi dzaʼa mnanaŋta lu ta həŋ, 12kabga ŋa nghay taŋ, nghaŋta a həŋ wa. Ŋa snay taŋ, snaŋta a həŋ ɗekɗek wa. Ka má nda sna həŋ katsi ná, má dzaʼa mbəɗakmbəɗa həŋ ta vgha da Lazglafta ŋa plinistani ta dmakuha taŋ#4:12 Ngha ta Isaya 6:9, 10., » kaʼa nda həŋ.

Klatá ghəŋa tsa mahdihdi ya

Mat 13:18-23, Luk 11-15

13Tahula tsa, kaʼa nda həŋ guli mantsa: « Sna a kuni ta tsa mahdihdi ya ra? Ka sna a kuni ta tsaya wu katsi ná, waká kuni dzaʼa snaŋtá inda mahdihdi tama? 14Tsa hulfa ta wutsə tsa mndu mnə yu ya ná, gwaɗa Lazglafta ya ta wutsə tsi. 15Sanlaha ma mnduha ná, manda tvi rkaf hulfa tida nzakwa taŋ. Na gi snaŋta taŋ ta gwaɗa Lazglafta ma ŋuɗufa taŋ, ndadaghata halaway hlugudunustá həŋ, manda ɗagay ta ɗaguta ɗyak ta hulfa ta tvi. 16Sanlaha ma mnduha guli ná, manda kluluh wutsaf lu ta hulfa tida həŋ. Ka snaŋ sna həŋ ta gwaɗa Lazglafta gi misimmisim ka həŋ ta tsuʼafta nda rfu, 17ama haɗ həŋ ta zlaŋtá vli ŋa dzugwamta tsa gwaɗa ya ta slrəŋ ma ŋuɗufa taŋ wa. Ka gruŋgra ghuya ɗaŋwa nda giri ta həŋ kabga tsa gwaɗa ya katsi, gi suwak zlanavata taŋ ta zlghay nda ŋuɗufa taŋ. 18Sanlaha ma mnduha guli ná, manda vli ma teki rkam hulfa mida həŋ. Snaŋ sna həŋ ta gwaɗa Lazglafta 19ama ta laghu la həŋ da ndana nzaku ma ghəŋa haɗik, nda ndana zba gadghəl, nda ndana sana skwiha ta haraʼuwa iri. Mantsa tama, mbaɗa tsa skwiha ya ka raghwa tsa gwaɗa ya, ka niŋtá həŋ ka ksubaŋ. 20Sanlaha ma mnduha ná, manda haɗik ka gənək həŋ. Ta snaŋ sna həŋ ta gwaɗa Lazglafta, ta zlghaf zlgha həŋ nda ŋuɗufa taŋ, ta magay həŋ ta skwi ta kum Lazglafta. Sanlaha ma tsa mnduha ya ná, kiʼa kiʼa magata həŋ, ka gratani magata sanlaha, Sanlaha ma mnduha guli ná, va ŋulum ŋulum magatá ŋa taŋ, » kaʼa.

Mahdihdi graf lu nda pitirla

Luk 8:16-18

21Ka *Yesu nda həŋ guli: « Ta klaf kla lu ta pitirla ŋa dzuɓamta ma tughba ra? Ari ta klaf kla a lu ŋa fiŋta mista ghəzləŋ na? Ta klafta ŋa fafta ta vəl tskala#4:21 Gray nda Mata 5:15 Lukwa 11:33. lu kasiʼi kiʼe. 22Haɗ skwi nda ɗifa dzaʼa kwal kul sabi ta daɓi wa. Haɗ skwi kɗekkɗek dzaʼa kwal kul maravata baŋluwa guli wa. 23Mndu nda sləməŋa snay ka sna tsi, » kaʼa. 24Kaʼa nda həŋ guli: « Ɗaswa ka kuni nda skwi ta snaŋta kuni. Nda tsa daram ta kəl kuni ka gra skwi ya, nda tsi guli dzaʼa graghunafta Lazglafta ta ŋa ghuni, ŋa sgaghunaghatá ŋa ghuni guli. 25Tsaya tama, mndu ta fata sləməŋa ni ɗina ka sna gwaɗa ná, dzaʼa sganagha sga Lazglafta ta snaŋta ni. Ama mndu ta dərzlaftá sləməŋa ni ná, dzaʼa sganagha sga ta dərzlanafta guli, » ka Yesu.

Hulfa ma haɗik graf lu nda ga mghama Lazglafta

26Kaʼa nda həŋ guli: « Ka gragra nda hulfa ta pghamta mndu da haɗik ya ga mghama Lazglafta. 27Dər ta han ta hana ni tsa mndu ya girviɗik, dər ta vaghə ta nzakwa ni tsi gifitik, ta ɗyutá ɗyakwani, ka glakwa ni hulfa sna a kəʼa ta magaku wa. 28Haɗik ta ɗygiŋtá hulfa ŋa nzakwa ni ka kuzuŋ. Tahula tsa, ŋa pghafta ni ta ghəŋ ŋa ksayni ta zwaŋ. 29Ka nda ndəha tsi vərzləŋ tama, nda maga fitik ŋa tsay, sagha fitika kla vɗu ŋa tsay#4:29 Zuwel 4:13. tsa, » kaʼa.

Ga mghama Lazglafta graf lu nda hya kramasa

Mat 13:31-32, 34, Luk 13:18-19

30Wya kaʼa nda həŋ guli: « Ndaw dzaʼa gra mu ta ga mghama Lazglafta, nda wati ma skwi dzaʼa grafta mu? 31Tsa ga mghama Lazglafta ya ná, dzaʼa gray lu nda hya kramasa. Tsa hya kramasa ya ná, ndərzikw nzakwa ni mataba hulfaha ta ghəŋa haɗik, ama ka sləgam slga lu, 32ta glaf gla gdiz ka malaghutá hamata sluhwaha niɗali. Ta pghay ta sləma dagala ha ka laviŋta ɗyakha ta baba həga taŋ tida, » kaʼa.

33Nda ndəghata mndərga tsa mahdihdiha ya mnanaŋta tsi ta gwaɗa ta həŋ prək ka snaŋta taŋ. 34Inda ŋa ni ma gwaɗa nda həŋ ná, ba nda mahdihdi. Ama nzata taŋ nda ghəŋa taŋ nda duhwalha ni ya ná, tsislanaptani ta həŋ.

Lɓanata Yesu ta mativiraʼu

Mat 8:23-27, Luk 8:22-25

35Ga hawu baɗu va tsa, « mbaɗma ta a ɓlu a, » ka *Yesu nda duhwalha ni. 36Ka sliʼafta həŋ ka zlanavatá tskata mnduha, ka lam həŋ da tsa kwambalu nzamə Yesu mida ya ka laghu, kawadaga nda sanlaha ma kwambalu guli mista ni. 37Tata ndru həŋ ma kwambalu, ka sliʼafta mghama mativiraʼu, ka kapatsaʼuwaku imi ka lami ka kuma ndəghanafta kwambalu. 38Ta hana ni Yesu ma mndəra kwambalu, nda fatá ghəŋa ni ta skwa fa ghəŋ. Ka sliʼanaftá həŋ. « Mghama ɗa! Ndana a kagha ta na zwaɗuta dzaʼa zwaɗuta mu na ra? » ka həŋ nda tsi. 39Sliʼavata ni mantsa, ka dvanaghatá tsi ta falak. « Lɓa lɓa ka nzata ka tɓekw! » kaʼa nda drəf. Ka lɓatá falak, ka nzatá vli tɓekw. 40Ka mbəɗavatá tsi təv duhwalha ni. Kaʼa nda həŋ mantsa: « Nu ta kəl kuni ka zləŋ manda na na, kulam ndana, haɗ zlghay nda ŋuɗuf da kaghuni ɗekɗek katək ra? » kaʼa nda həŋ. 41Ka ksaftá zləŋ ta həŋ katakata. « Wa va na ma mndu katək na? Nduk nda falak nda drəf tani ta snanatá gwaɗa!#4:41 Gray nda Zabura 65:8, 89:10, 107:23-32. » ka həŋ.

Currently Selected:

Mak 4: xed

Highlight

Copy

Compare