Mat 6
6
Tva vla skwi ŋa pɗuha
1« Ɗasuwa ka kuni ta mag kuni ta skwi tɗukwa, yaha kuni da magay ŋa ghubaku ta wa ira mnduha. Ka mantsa tsi ná, mutsafta a kuni ta nisəla ghuni da Da ghuni ta nzakway ta luwa wa.
2« Ta vlə ka ta skwi ŋa pɗu ya, ma ghubu ka ta ghəŋa gha ta ghəŋa ni, manda ya ta mag gwal ta maga maɗgwirmaɗgwir ma həga tagha skwa la *Yahuda, nda ya ta pazlala, ŋa ghubaku da mnduha ya. Kahwathwata ka yu ta mnaghunata, mutsu mutsa həŋ ta nisəla taŋ. 3Ama kagha, ta mbəhu ka ta pɗu ya, ma snaŋ dzva zlaɓa gha ta skwi ta mag dzva zeghwa gha. 4Tsaya dzaʼa kəl tsa mbəha gha ya ka nzakway ka skwi nda ɗifa. Dzaʼa plagham pla Da gha Lazglafta ta ngha skwi ta mag ka ma ɗifa ya. »
Tva maga duʼa
Luk 11:2-4
5« Ta ndəɓu kuni ta dzvu, ma nza kuni manda ŋa gwal ta maga maɗgwirmaɗgwir zɗəgana maga duʼa ta həŋ ta sladu ta sladu ma həga tagha skwa la *Yahuda, nda ya ta wa madədga tvi#6:5 Ngha ta Lukwa 18:10-14. ŋa nghaŋta mnduha ta həŋ ya. Kahwathwata ka yu ta mnaghunata, mutsu mutsa həŋ ta nisəla taŋ. 6Ama kagha, ka ta maga duʼa ka, laghu la da dzuguva gha, ka hafta ka ta tgha gha ka ndəɓa ka ta dzvu. Dzaʼa plagham pla Da gha ta nzakway ta nghay ma ɗifa ya.
7« Ta ndəɓu kuni ta dzvu ya, ma gɗa kuni ta vrafta ta gwaɗa turtuk, manda ŋa gwal kul saŋtá Lazglafta ta ndanay kazlay: Vrafta ta gwaɗa dzaʼa kəl Lazglafta ka tsuʼaŋnafta kəʼa ya. 8Ma taghə kuni ta skala taŋ, kabga nda sna Da ghuni ta skwi ta kum kuni ma kɗaku kaghuni ka ɗaway da tsi. »
Da ta luwa
9Wya ka kuni da maga duʼa tama:
« Da ŋni ta nzakway ta luwa, ka snava sna
hga gha nda ghuɓa.
10Ka sagha sa fitika ga mghama gha, ka
maga ka ta skwi ta kum ka ta haɗik,
manda ya ta magaku ta luwa.
11Vlaŋna vla ta skwa zay prək zay ŋni gita.
12Plaŋna pla ta dmakuha ŋni, manda
ya ta plinista aŋni ta dmakwa gwal ta magaŋnata.
13Ma zlaŋna ka tawa skwi dzaʼa
dzəghaŋnata. Klap kla ta aŋni ma dzva
halaway, [kabga ŋa gha ga mgham, nda
mbraku, nda glaku, ŋa kɗekedzeŋ. Amin!]
14« Ka plinis pla kuni ta dmakwa mnduha ta magaghunata katsi, Da ghuni ta nzakway ta luwa ná, dzaʼa plighunis pla ta ŋa ghuni guli. 15Ama ka haɗ kaghuni ta plinistá dmakwa mnduha ta magaghunata wu katsi, haɗ Da ghuni dzaʼa plighunistá dmakuha kaghuni guli wa. »
Tva maga suma
16« Ka ta suma kuni, ma pslaf kuni ta kuma manda ya ta mag ghwaɗaka mnduha. Ta pslafpsla həŋ ta kuma, kabga ŋa nghay mnduha kazlay: Ta suma həŋ kəʼa. Kahwathwata ka yu ta mnaghunata, mutsu mutsa həŋ ta nisəla taŋ nda tsaya. 17Kagha, ka ta suma ka, masam masa ta rɗi ma ghəŋa gha ka payanata ka, mbaziŋ ka ta kuma gha guli. 18Tsaya dzaʼa kwal mnduha tsatsafta ta suma ka kəʼa. Ta ghəŋa Da gha hada ta nzaku ma ɗifa yeya nda ngha. Dzaʼa plagham pla tsa Da gha nda ngha ta skwi ta mag ka ma ɗifa ya. Psawa psa ta mutsaftá gadghəl da Lazglafta. »
Skwa gadghəl ta haɗik nda ya da Lazglafta
Luk 12:33-34
19« Ma tskana kuni ta gadghəla ghuni ta haɗik ma vli ya ta zuta zahar, ta ksuta mbəzlar, nda ya ma vli ta zlraghata ghaliha guli. 20Ama tskawa tska ta gadghəla ghuni ta luwa ma vli dzaʼa kwal zahar zuta, dzaʼa kwal mbəzlar ksuta, nda ya dzaʼa kwal ghaliha zlraghata. 21Ma vli hada gadghəla gha ya, hada ŋuɗufa gha guli. »
Nzaku ma tsuwaɗak
Luk 11:34-36
22« Iri ná, manda pitirla vgha gha nzakwa ni. Ka tsiɗiɗ ira gha, tsuwaɗak inda vgha gha. 23Ama ka nda badza ira gha, ma grum inda vgha gha. Ka si ma grum nzakwa tsa tsuwaɗak ma kagha ya katsi, kighkigh dzaʼa tɗikuta tsa grum ya tama! »
Zbaʼawa zba mataba i Lazglafta nda tsedi
Luk 16:13
24« Haɗ mndu dzaʼa laviŋta gwafta ksanatá slna ta mghamha his, ta magay magay ŋa ya, ta magay magay ŋa ya, ma va tsa fitik turtuk ya wa. Nda husaŋta sani, ta ɗvutá tsi ta sani. Nda ndiʼa nzakwa ni nda sani, ta wuɗiŋtá tsi ta sani. Laviŋ a kuni ta gwaftá maga slna ŋa Lazglafta, ta magay magay kuni ŋa tsedi wa. »
Zbawa zba ta ga mghama Lazglafta karaku
Luk 12:22-31
25« Tsaya ta kəl yu ka mnaghunata kazlay: Ma thə kuni ta heʼ, a nu dzaʼa mu zay? Nu dzaʼa mu say? A nu dzaʼa mu suɗay ta vgha na kəʼa? Malaghu mala a hafu ta skwa zay ra? Ari malaghu mala a wa a vgha ta lgut na? 26Nghawa ngha ta ɗyak ta ndaraku ta luwa ɓa. Haɗ həŋ ta sləgu wu, tska a həŋ ta skwi ta vwah wu, haɗ həŋ ta tskanatá skwi ma guvur guli wa. Da ghuni ta luwa ta zuŋtá skwi ta həŋ. Malaghu mala a kaghuni piw ka hahəŋ wu ra?
27« Wa ya mataba ghuni ma mnay ni ta heʼ, dzaʼa slranaghata dauʼ ta fitika hafa ni na? 28Ala, kabgawu ta kəl kuni ka mna heʼ ta ghəŋa lgut tama ɓa? Nghawa ngha ta vzlizla ta magaku ma vwah ɓa. Haɗ sana slna ta magata həŋ wu, haɗ həŋ ta ga lgut wa. 29Kulam nda tsa, ka yu ta mnaghunata na: Dər Salumuŋ nda va tsa nzakwa ni ka gadghəl#6:29 Ngha ta 1 Mghamha 10. ya tani ná, ta fava a ta lgut ta klaftá ɗinakwa ya dər turtuk ma tsa vzlizlaha ya wa. 30Ka si mantsa ya ta suɗanavata Lazglafta ta lgut ɗina ta kuzuŋ gita, ga mahtsima ni ŋa vzamta da vu ya ní, kaghuni yeya dzaʼa kwal tsi suɗavaghunata tama rki? Kay! Nda hta zlghay nda ŋuɗufa ghuni.
31« Ma walaŋ kuni ta mna heʼ tama, ma mnə kuni kazlay: A nu dzaʼa ŋni zay? A nu dzaʼa ŋni say? A nu dzaʼa ŋni suɗay ta vgha na kəʼa. 32Inda tsaha ya ná, gwal kul snaŋtá Lazglafta ta psay. Nda sna Da ghuni ta luwa ta skwiha ta raku ka ŋa ghuni. 33Zbawa zba ta ga mghama Lazglafta nda maga skwi tɗukwa ta wa ira ni karaku, dzaʼa vlaghuna vla lu ta inda tsa skwiha ya ta ghəŋa ni.
34« Ma mnə kuni kazlay: Heʼ, waká yu da magay ga mahtsima ni na kəʼa. Prək ga mahtsima ni ka ndananatá ghəŋa ni, prək dər wati ma vaghu nda ɗaŋwa ni. »
Currently Selected:
Mat 6: xed
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.