Mat 26

Dzra wi ŋa dzatá Yesu

Mak 14:1-2, Luk 22:1-2, Yuh 11:45-53

1Manda kɗiŋta *Yesu ta inda tsa gwaɗaha ya, kaʼa nda duhwalha ni mantsa: 2« Nda sna kuni kazlay: Ta his fitik ka skala *Pak kəʼa, ŋa vlatá *Zwaŋa mndu ŋa zləŋafta, » kaʼa.

3Ka tskavatá la mali ta ghəŋa gwal dra skwi ŋa Lazglafta, nda la galata mndu mataba mnduha ma daɓa həga ga mali ta ghəŋa gwal dra skwi ŋa Lazglafta ta hgə lu *Kayifa ya. 4Ka dzraftá həŋ ta ksaftá Yesu ma ɗifa ma ɗifa ŋa dzata. 5Ama ka həŋ mantsa: « Yaha da nzakway baɗu fitika skala Pak tama, kabga yaha da sliʼanaftá ŋuɗufa mnduha, » ka həŋ.

Pghəganata sana marakw ta rɗi ta Yesu ma ghəŋ

Mak 14:3-9, Yuh 12:1-8

6Ta nzaku *Yesu ma həga ga Simuŋ, sana mndu nda rɗa mndu tida ma luwa Betani, 7ta za skwa zay həŋ, ka lagha sana marakw ta vata Yesu nda klatá hwaraka albastra nda ndəghata ni nda urdi ya nda bla dzva ni. Ka pghəganatá tsi ma ghəŋ. 8Nghay duhwalha ni ta tsa skwi ta mag tsa marakw ya, zɗəgana a ta həŋ wa. « Kabgawu ta kəl lu ka ɓadza skwi manda na na? 9Skwi ma ŋa skwapta na urdi na ka tsedi dagala, ka daganaftá la ka pɗu ná, » ka həŋ. 10Snaŋta Yesu ta tsa gwaɗa taŋ ya, kaʼa nda həŋ mantsa: « Kabgawu ta kəl kuni ka ghuya ɗaŋwa ŋa na marakw na na? Ɗina skwi magiha tsi ta iʼi. 11Kawadaga a kaghuni#26:11 Ngha ta Vrafta ta Zlahu 15:11. nda la ka pɗu inda fitik wu ra? Ama iʼi ná, gɗavata a yu kawadaga nda kaghuni inda fitik wa. 12Nana pghata urdi pghaɗigha tsi na ná, paya iʼi ŋa dzaʼa da kulu#26:12 Ngha ta Markus 14:8. ya. 13Kahwathwata ka yu ta mnaghunata, ma inda vli dzaʼa mnə lu ta na *Lfiɗa Gwaɗa na ta ghəŋa haɗik tender ná, dzaʼa gɗa gɗa lu ta rusa skwi maga na marakw na ŋa havay, » kaʼa.

Kurata Zudas ta dzaʼa skwaptá Yesu

Mak 14:10-11, Luk 22:3-6

14Ka gi sliʼafta sani mataba duhwalha ni ta hgə lu ka Zudas Iskaryut, ka laghu slanaghata la mali ta ghəŋa gwal dra skwi ŋa Lazglafta. 15Kaʼa nda həŋ mantsa: « Nu dzaʼa vlihata kuni ka vlaghuna vla yu ta *Yesu na? » kaʼa. Ka vlaŋtá həŋ ta sulay hkən mbsak.#26:15 Ngha ta Zakari 11:12. 16Daga ma tsa fitik ya, ka zbə tsi ta tvi ya nda ra ŋa vlata ni ta Yesu.

Payafta Yesu ta skwa zaya skala Pak

Mak 14:12-21, Luk 22:7-14, 21-23, Yuh 13:21-30

17Baɗu taŋtaŋa fitika skala buradi kul haɗ is mida, ka duhwalha ni nda *Yesu mantsa: « Ga ta kuma ka ta payaghafta ŋni ta vla skwa zaya skala *Pak na? » ka həŋ. 18Kaʼa nda həŋ mantsa: « Lawa la da huɗa luwa, ka lagha kuni da sana mndu. Ka kuni dzaʼazlay nda tsi na: “Wana ndusak ndusa fitika ɗa, ga ghuni dzaʼa za yu ta skwa skala Pak kawadaga nda duhwalha ɗa, ka Mghama ŋni, ka kuni dzaʼazlay,” » kaʼa. 19Ka laghu duhwalha ni magata manda va ya mnana Yesu ta həŋ. Ka payaftá həŋ ta skwa zaya skala Pak.

Mamu sani ma kaghuni dzaʼa skwaptá iʼi, ka Yesu

20Gahawani, ka nzata *Yesu kawadaga nda duhwalha ni ghwaŋpəɗ his ka za skwa zay. 21Ta zə həŋ ta tsa skwa zay ya, kaʼa mantsa: « Kahwathwata ka yu ta mnaghunata, mamu sani mataba ghuni dzaʼa vlatá iʼi ma dzva mnduha, » kaʼa nda həŋ. 22Rmasas ka vgha inda taŋ. « Iʼi a wu suʼu ní Mghama ɗa! Iʼi a wa suʼu ní Mghama ɗa! » ka inda hahəŋ. 23Kaʼa nda həŋ mantsa: « Tsa mndu tsghada ŋni da hliba#26:23 Ngha ta Markus 14:20. ka guram nda tsi ya, tsa mndu ya dzaʼa vlatá iʼi ma dzva mnduha. 24Dzaʼa laghulani *Zwaŋa mndu manda ya nda vinda ma gwaɗa Lazglafta ta ghəŋa ni#26:24 Ngha ta Zabura 22:2-19, nda Isaya 53.. Ama ɗaŋwa ŋa mndu dzaʼa vlatá Zwaŋa mndu ma dzvu ŋa mnduha. Ta draŋ ya má kwal lu kul yatá tsa mndu ya, » kaʼa. 25Ka Zudas dzaʼa vlata ma dzva mnduha ya guli mantsa: « Ari iʼi a ní Mghama ɗa? » kaʼa. « Manda va ya mna kagha nda wa gha, » ka Yesu nda tsi.

Skwa zay na sluʼuvgha ɗa, ka Yesu

Mak 14:22-26, Luk 22:14-20, 1 La Kwareŋt 11:23-35

26Ta za skwa zay həŋ, ka klafta *Yesu ta buradi. Tahula rfanaghatani ta Lazglafta, ka ɓlanaptá tsi ka vlaŋtá duhwalha ni. Kaʼa mantsa: « Zlghawazlgha ka za kuni. Nana na ná, sluʼuvgha ɗa ya, » kaʼa. 27Ka klafta tsi ta leghwa ima inabi guli. Tahula rfanaghatani ta Lazglafta, ka vlaŋtá tsi ta həŋ. Kaʼa mantsa: « Sasaʼawasasa kaghuni demdem, 28kabga nana na ná, usa ɗa ya, usa slərɓa zughu#26:28 Ngha ta Sabi 24:8, nda Yirməya 31:31-34. dzaʼa pghiŋta lu ŋa pla dmakwa ndəghata mndu. 29Ka yu ta mnaghunata ná, haɗ yu dzaʼa səglaŋtá na ima inabi na wu, ha ka sagha fitik ya dzaʼa kəl yu ka səgəltá lfiɗa ni kawadaga nda kaghuni ma ga mghama Da ɗa, » kaʼa.

Dzaʼa zliɗiva zla ka, ka Yesu nda Piyer

Mak 14:27-31, Luk 22:31-34, Yuh 13:36-38

30Tahula fafanafta taŋ ta laha#26:30 Ngha ta Zabura 113–118. skala Pak, ka laghu həŋ ta ghwá Zaytuŋ. 31Ka *Yesu nda həŋ mantsa: « Ta na rviɗik gitaʼuna, dzaʼa hwayaghu hwaya kuni ka zlihata. Ka lu vindafta ma defteri Lazglafta na:

Dzaʼa dza dza lu ta mnda ngha tuwak,

ŋa gazlata tuwakha demdem ta bra#26:31 Ngha ta Zakari 13:7.. 32Ama tahula sliʼagapta ɗa ma mtaku, dzaʼa tiŋlaghu tiŋla yu ta ɓhata ma Galili ka kaghuni, » kaʼa.

33Ka *Piyer nda tsi mantsa: « Dər ma dzaʼa hwayaghu hwaya lamndu ka zlavaghata ná, haɗ iʼi dzaʼa walaŋta hwayaghuta ka zlavaghata wu, » kaʼa. 34« Kahwathwata ka yu ta mnaghata, ta va na rviɗik gita u na, ma kɗaku vazak ka wahata, dzaʼa mna mna ka hkən səla kazlay: Sna a yu ta na mndu na wu kəʼa, » ka Yesu nda tsi. 35« Dər ŋa mtuta ɗa kawadaga nda kagha tsi, haɗ yu dzaʼa mnay kazlay: Sna a yu ta kagha wu kəʼa wu, » ka Piyer. Manda va tsaya ka inda sanlaha ma duhwalha ni mnata guli.

Maga duʼa Yesu ma Getsemene

Mak 14:32-42, Luk 22:39-46

36Ma va tsaya, ka ɓhadaghatá i *Yesu nda duhwalha ni da sana vli ta hgə lu ka Getsemene. Kaʼa nda duhwalha ni mantsa: « Nzawa nza hadna ta lab yu da maga duʼa hada a, » kaʼa.

37Ka klanaʼata tsi i *Piyer nda tsa zwana Zebedi his ya mista ni. Ka tɗata ŋuɗufa ni ka ksay ka zləŋ. 38Kaʼa nda həŋ tama mantsa: « Tɗatɗa ŋuɗufa ɗa manda skwi dzaʼa dzihata. Nzawa nza hadna, ka nzata kuni ndiri kawadaga nda iʼi, » kaʼa. 39Zadaptani dawʼ ta kəma, ka zləmbatá tsi ka mbumba, ka maga duʼa. Kaʼa mantsa: « Da ɗa, ka ta magaku tsi, diʼiŋiŋ diʼiŋa ta na leghwa ghuya ɗaŋwa na nda iʼi. Nziya nza tsi ná, manda ya ta kum iʼi a wu, manda ya ta kum kagha, » kaʼa.

40Ka sliʼafta tsi ka vradaghata slanaghatá duhwalha ni, psla psla hani ta həŋ. Kaʼa nda Piyer mantsa: « Trapta ghuni ta nzata ndiri kawadaga nda iʼi dər ka awa turtuk tsa ra? 41Nzawa nza ndiri ka ndəɓa kuni ta dzvu, kada ŋaŋta kuni ta skwi dzaʼa dzəghaghunata. Ta kumay kuni ta maga skwi ɗina mndani, ama haɗ mbrakwa sluʼuvgha ghuni wu, » kaʼa.

42Ka zəgladaptá tsi dawʼ ka mahis, ka ndəɓəgəltá dzvu, kaʼa mantsa: « Da ɗa, ka va a ka ta diʼiŋaghuta na leghwa ghuya ɗaŋwa na nda iʼi wu katsi, ka nda nza tsi ŋa say ɗa ná, ka maga tsi manda ya kumaŋ ka, » kaʼa.

43Ka vrəglagaghatá tsi ka sləglanaghatá həŋ ta hani, nda ghərɓa həŋ da hani.

44Ka zləglaŋtá tsi ta həŋ ka zəgladapta dawʼ, ka ndəɓgəltá tsi ta dzvu ka mahkən, ka vrəgliŋtá tsi ta va tsa gwaɗaha mna tsi ya. 45Ka vrəgladaghatá tsi da tsa duhwalha ni ya, kaʼa nda həŋ mantsa: « Tata hana ghuni kuni ta mbiʼa vgha ghuni ɓa? Ɗaswa ka kuni tama tsa, wana nda maga fitik dzaʼa kəl lu ka vlata *Zwaŋa mndu ma dzva gwal dmaku. 46Sliʼafwa sliʼa mbaɗma. Waʼa tsa mndu ta vlatá iʼi ŋa dzata ya ta sagha, » kaʼa.

Ksaftá Yesu ŋa dzaʼa dzata

Mak 14:43-50, Luk 22:47-53, Yuh 18:3-12

47Tata tsa gwaɗa ya i *Yesu, nda ɓhakta Zudas ta nzakway tekw mataba duhwalha ghwaŋpəɗ his ya. Kawadaga həŋ nda ndəghata mnduha nda kafay nda kafay, nda sarak nda sarak, ghunaf la mali ta ghəŋa gwal dra skwi ŋa Lazglafta nda la galata mndu mataba mnduha. 48Mnanaf mna Yuda ta nzakway dzaʼa vlata ya kəʼa dzaʼa magay nda tsi, ta həŋ. « Tsa mndu dzaʼa yu brusata ya ná, ya va ni tsaya, ka ksa kuni. » 49Na gi ndusadaghatani ta vata Yesu, kaʼa mantsa: « Zgu tsa ŋa gha Mghama ɗa, » kaʼa ka gi brusay. 50« Gra ɗa, maga ta skwi sagha ka magay, » ka Yesu nda tsi.

Ka gi sliʼadaghata tsa mnduha ya, ka pghaftá vgha tida ka ksafta. 51Gi fay, tshagaptsha sani ma duhwalha Yesu ta kafaya ni, gi tay, tsaghuta sləməŋa#26:51 Ngha ta Yuhwana 18:26. sani ma kwalva mali ta ghəŋa gwal dra skwi ŋa Lazglafta. 52Ka Yesu nda tsi mantsa: « Vradanam vra ta kafaya gha da kupaka ni. Inda gwal ta kla huzla vulu ná, tsa huzla vulu ya dzaʼa zaɗanata həŋ guli. 53Ka kagha ta gray ná, laviŋ a yu ta hgaŋtá Da ɗa, ŋa gi ghunigihatani ta bra sludza duhwalha Lazglafta ta malaghuta ghwaŋpəɗ his ra? 54Kinawu tama dzaʼa nzakwa dzata ghəŋa skwi ya nda vinda ma deftera Lazglafta ta mnay kazlay: Mantsa ya dzaʼa magakwa tsi kəʼa ya? » kaʼa.

55Ma va tsa fitik ya, ka Yesu nda tsa mnduha ya mantsa: « Nya ŋa sagha ghuni da ksa iʼi nda kafay nda kafay, nda sarak nda sarak, manda skwi ŋa ksa gənda na? Inda fitik yu ta nzaku kawadaga nda kaghuni ta tagha skwi ma həga Lazglafta, ksaf a kuni ta iʼi wa. 56Kəl na skwiha na ka magaku ná, nda nza ŋa dzanaghata ghəŋa skwi ya vindaf la anabi ma deftera Lazglafta, » kaʼa. Ka gi hwayaghutá#26:56 Ngha ta 26:31. inda duhwalha Yesu krawats ka zlanavata.

Yesu ta kəma guma

Mak 14:53-65, Luk 22:54-55, 63-71, Yuh 18:13-14, 19-24

57Ka klaghatá tsa gwal ta ksafta ya ta *Yesu da mali ta ghəŋa gwal dra skwi ŋa Lazglafta ta nzakway ka *Kayifa, ma vla tskatá vgha gwal tagha zlahu ŋa mnduha nda la galata mndu ya tani. 58Mbaɗa *Piyer ka dzaʼa ta hula ni ta hula ni, ha ka lami da daɓa həga ga tsa mali ta ghəŋa gwal dra skwi ŋa Lazglafta ya. Ka nzamtá tsi mataba la kwalva ka nghay ka kinawu kɗavakta ni.

59Ka zbə la mali ta ghəŋa gwal dra skwi ŋa Lazglafta, nda inda gwal tsa guma, ta tsanavatá ghwaɗaka gwaɗa ta Yesu prək ka dzata. 60Triɗ, mutsaf a həŋ wa. Aŋ mndani, nda ndəgha tsakalawiha ya hladagha#26:60 Ngha ta Zabura 27:12, nda 35:11. lu. Ma kɗavakta ni, ka lagha sana mnduha his da mnay: 61Ka na mndu na ná, laviŋ lava yu ta tasiŋtá na həga Lazglafta na, ka bəgladafta ɗa baɗu mahkən#26:61 Ngha ta Yuhwana 2:19., kaʼa. 62Ka sliʼafta mali ta ghəŋa gwal dra skwi ŋa Lazglafta, kaʼa nda Yesu mantsa: « Zlgha a ka ta wa ni ra? Nu ta mnə na mnduha na ta kagha na na? » kaʼa. 63Pslaf a Yesu ta wa ni wa. Ka mali ta ghəŋa gwal dra skwi ŋa Lazglafta nda tsi mantsa: « Nda həga Lazglafta nda hafu mida, ta ɗawa yu da kagha, zlghiɗif zlgha ta wa ni. Kagha *Kristi ta nzakway ka Zwaŋa Lazglafta ra? » kaʼa. 64Ka Yesu nda tsi mantsa: « Manda va ya mna kagha nda wa gha. Ka yu ta sgaghunaghata ta ghəŋa ni ná, daga ndanana, dzaʼa nda ngha kuni ta *Zwaŋa mndu ta nzaku nda ga zeghwa Lazglafta ta mbruta, dzaʼa nda ngha kuni ta saha ni ma kusay ta luwa#26:64 Ngha ta Zabura 110:1 nda Danyel 7:13. guli, » kaʼa.

65Lagha tsa mali ta ghəŋa gwal dra skwi ya ka kuhiŋtá lgut ta vgha ni. Kaʼa mantsa: « Ya wana kwara ta kwara kwara ta ghəŋa Lazglafta. Mndəra wati gwaɗa ya ta psəgəlta mu, ya wana nda sna sləməŋa ghuni ta kwara kwara ya kwara tsi na? 66Kinawu ka kaghuni ta gray na? » kaʼa. « Nda ra ka dzata#26:66 Ngha ta Zlahu 24:16. na mndu na, » ka həŋ hlafta wi.

67Ka gi taf həŋ ta sərɗək ma kuma ŋa Yesu, ka dəŋəzl sanlaha, ta dgharu#26:67 Ngha ta Isaya 50:6. ya laha. 68« Ka si Kristi ka ná, tsatsaf tsatsa ka wa ya ta dza kagha, » ka həŋ.

Waɗutá vla Piyer

Mak 14:66-72, Luk 22:56-62, Yuh 18:25-27

69Ma tsa fitik ya, ta nzaku *Piyer mabli ma daɓa tsa həga ya. Ka lagha sana kwalva ka marakw slanaghata. « Kagha guli ná, si ka kawadaga kagha nda tsa *Yesu mnda la Galili ya, » kaʼa nda tsi. 70Əŋ, yaʼ! « Sna a yu ta skwi ta kum ka ta mnay wu, » kaʼa ta kəma mnduha demdem.

71Tahula tsa, ka sliʼafta tsi ka nzata ma dzuguva wa tgha. Ka nghaŋtá sana kwalva ka marakw guli. « Si ka kawadaga na mndu na nda Yesu mnda la Nazaret, » kaʼa nda tsa gwal hada ya. 72Əŋ, yaʼ! « Sna a yu ta tsa mndu ya wu, » kaʼa ka waɗgəlta.

73Ɓats nzɗa, ka gavanavatá tsa gwal ma tsa vli ya ta Piyer, ka həŋ nda tsi mantsa: « Dər ki tsi, tekw kagha mataba tsa mnduha ya, ta tsatsaku ta lwa gha, » ka həŋ nda tsi. 74« Kusekw! » ka Piyer ka waɗay. « Ka ksiʼaf ksiʼa Lazglafta ta iʼi ka tsakalawa ɗa tsi. Sna a yu ta na mndu na wu, » kaʼa. Gi ka wahatá vazak. 75Ka gi havaktá Piyer ka gwaɗa ya si mnana Yesu kazlay: Ma kɗaku vazak wahata ná, dzaʼa mnay ka hkən səla kazlay: Sna#26:75 Ngha ta 26:34. a yu ta tsa mndu ya wu kəʼa ya. Ka gi sliʼafta tsi ka laghu dzibil ka hərɓa taw.

Currently Selected:

Mat 26: xed

Highlight

Copy

Compare