Mat 17

Nghaŋta i Piyer, nda Yakubu, nda Yuhwana ta Yesu ma glakwa Lazglafta

Mak 9:2-13, Luk 9:28-36

1Tahula fitik mkuʼ, ka hlaftá *Yesu ta i *Piyer nda Yakubu nda zwaŋama ni Yuhwana nda ghəŋa taŋ, ka laghu həŋ ta sana ghwá nda slra. 2Ka mbəɗavaftá Yesu ta wa ira taŋ, ka wuɗaku kuma ni manda fitik. Ka navaftá lguta ni tilil ka ŋusliŋ manda slker. 3Ka gi zlagaptá i Musa nda Iliya ta wa ira taŋ ka ghwa yiva nda tsi. 4Gi ka Piyer nda Yesu mantsa: « Mghama ɗa! Ɗina ka nzata mu hadna. Ka ta kumay ka, dzaʼa magaf maga yu ta dumbiha hkən hadna: Pal ŋa gha, pal ŋa Musa, pal ŋa Iliya, » kaʼa.

5Tata tsa gwaɗa ya Piyer, gi ka saha kusay ka ŋusliŋ tilil bukwamtá həŋ. Gi ka snaŋtá lu ta sana lwi ta gwaɗagapta ma tsa kusay ya: « Nana na Zwaŋa ɗa ya ɗvu yu katakata Tsatsi zbap yu, ta rfu yu ta ghəŋa ni. Snawa sna ta gwaɗa ni, » kaʼa.

6Na gi snaŋta tsa duhwalha ya ta tsa lwi ya, gi ka zləmbatá həŋ zluzlumbruh ta haɗik. Ka ksutá zləŋ ta həŋ katakata. 7Ka gavadaghatá Yesu ta vata həŋ, ka ksaŋtá həŋ. Kaʼa mantsa: « sliʼafwa sliʼa, ma zləŋ kuni ta zləŋ! » kaʼa nda həŋ. 8Kəʼa ka həŋ nghagafta ná, Yesu turtukwa ni yeya nghaŋ həŋ hada.

9Ta vragatá həŋ ta tsa ghwá ya tama, ka zlahanaghatá Yesu ta həŋ: « Yaha yaha kuni mnanaŋtá dər wati ma mndu ta skwi ya nghaŋ kuni, ha ka sagha fitika sliʼagapta *Zwaŋa mndu nda hafu ma mtaku, » kaʼa. 10Ka duhwalha ni ɗawaŋta da tsi mantsa: « Kabgawu kəl gwal tagha zlahu ŋa mnduha ka mnay kazlay: Tiŋəl Iliya dzaʼa sagha karaku#17:10 Ngha ta Malatsi 3:23. kəʼa katək na? » ka həŋ. 11« Manda va tsaya nzakwa ni, tiŋəl Iliya dzaʼa sagha ŋa payanatá inda skwi karaku. 12Ama ka yu ta mnaghunata ná, ghada ghada Iliya ta sagha. Tsaw tama tsatsaf a mnduha wu, ka ghuyanaptá həŋ ta ɗaŋwa manda ya kumaŋ həŋ. Manda va tsaya dzaʼa ghuyanapta həŋ ta ɗaŋwa ta Zwaŋa mndu guli, » kaʼa nda həŋ. 13Mantsa ya tama, ka graftá tsa duhwalha ya kazlay: Ta gwaɗ ta ghəŋa Yuhwana mnda maga batem ta tsa gwaɗa ya kəʼa.

Mbanafta Yesu ta sana zwaŋ ksu seteni

Mak 9:14-29, Luk 9:37-43

14Ndusadaghata taŋ ta vata dəmga, ka gi ndadaghatá sana mndu tsəlɓata ma ghuva *Yesu, 15kaʼa mantsa: « Mghama ɗa! Tawatá hiɗahiɗa ta zwaŋa ɗa ksu seteni#17:15 Ngha ta 4:24., ta ghuya ɗaŋwa ŋa ni katakata. Da vu kəʼa ta dəɗamta baɗu ma sani, da imi baɗu ma sani. 16Si ka kləganaghatá yu ta duhwalha ná, ka traptá həŋ ta mbanafta, » kaʼa. 17Ka Yesu mantsa: « Kaghuni mnduha ta na fitik na, haɗ zlghay nda ŋuɗuf da kaghuni wa. Ta maga ghwaɗaka skwi kuni. Ha ŋa yawu dzaʼa gɗavata yu ta vata kaghuni na? Klagaɗighawa tsa zwaŋ ya da hadna, » kaʼa. 18Ka kladanaghatá lu. Ka davanaghatá Yesu ta tsa seteni ya katakata. Ka saghu tsi ma tsa zwaŋ ya, gi ka mbaftá tsa zwaŋ ya hada hada.

19Ma nzata duhwalha ni kawadaga nda Yesu nda ghəŋa taŋ, ka gavadaghatá həŋ da ɗawaŋta da tsi: « Kabgawu kəl aŋni ka traptá ghəzligiŋtá tsa seteni ya katək na? » ka həŋ. 20« Hta ta zlghay nda ŋuɗufa ghuni ta magay, » ka Yesu nda həŋ. « Kahwathwata ka yu ta mnaghunata ná, ka mamu zlghay nda ŋuɗuf kiʼa da kaghuni manda hya kramasa#17:20 Ngha ta 13:32. katsi ná, laviŋ lava kuni ta mnanatá ya ghwá ya kazlay: Sliʼaf sliʼa hadna ka dzaʼa ka da hada a kəʼa na, dzaʼa sliʼaf sliʼa. Haɗ sana skwi dzaʼa trəgadaghunaghuta wa. 21[Ama mndərga tsa ghwaɗaka sulkum ya ná, ba nda maga duʼa kawadaga nda suma ta ghəzligiŋtá lu,] » kaʼa nda həŋ.

Mnəglaŋta Yesu ta dzaʼa ni mtaku nda sliʼagaptani

Mak 9:30-32, Luk 9:42-45

22Ma sana fitik ka tskavatá duhwalha *Yesu ma Galili. Ka Yesu nda həŋ mantsa: « Dzaʼa vla vla lu ta *Zwaŋa mndu ma dzva mnduha. 23Ŋa dzata taŋ, baɗu mahkəna fitik ŋa sliʼagaptani nda hafu ma mtaku, » kaʼa. Ka nzata duhwalha ni sasuʼanak katakata ta ghəŋa ni.

Plata i Yesu nda Piyer ta dzumna

24Manda ɓhadaghata taŋ da luwa Kafarnahum, ka gwal tska dzumna həga Lazglafta nda *Piyer mantsa: « Ta plər pla a waʼa Mghama ghuni ta dzumna həga#17:24 Ngha ta Sabi 30:11-16. Lazglafta katək na? » ka həŋ nda tsi. 25« Ta play, » kaʼa.

Ka sliʼaftá tsi ka lami da həga. Gi ka Yesu nda Piyer mantsa: « Simuŋ, kinawu ndana kagha ta ghəŋa tsa gwaɗa taŋ ya na? I wa raŋ pla dzumna nda dzumna luma ŋa mghamha ta na ghəŋa haɗik na na? Zwana haɗik re, ari la mayəm a na? » kaʼa nda tsi. 26« La mayəm ya, » ka Piyer. Ka *Yesu mantsa: « Nza a tkweʼ ta zwana haɗik ka play taŋ nda tsa tama wa. 27Dər má mantsa tsi ná, yaha mu da nzakway ka skwa tuthun ŋa taŋ. La da drəf, ka vzadata ka ta ŋalum. Tsa taŋtaŋa klipi dzaʼa ka da ksafta ya, ka gunaŋta ka ta wa ni, dzaʼa slanagha sla ka ta tseda dzumna mndu his. Ka klafta ka, ka vlaŋta ka ta həŋ ŋa platá ŋa u, » kaʼa nda tsi.

Currently Selected:

Mat 17: xed

Highlight

Copy

Compare