Lev 11
11
Skwiha ta tsaɗ lu nda ya kul tsaɗ lu
1Ka Yawe nda i Musa nda Haruna mantsa: 2« Mnana mna ta la Israʼila: Mataba inda nimtak nda rini ta mbaɗa ta haɗik ná, wya mndərga rini dzaʼa laviŋta kuni ta zay: 3Dzaʼa laviŋ lava kuni ta za inda skwi nda ta takuɗama ni, ta lghaɗu. 4Ama mataba skwiha ta lghaɗu ka ya nda ta takuɗama taŋ a tsi ná, wya ya dzaʼa kwal kuni zay:
Ŋalibwa, dər má ta lghaɗu tsi ta a takuɗama ni wu, nda nza ka skwi ta tsaɗ lu ka ŋa ghuni. 5Ksuɓi, ta lghaɗu, ama ta a takuɗama ni wu, nda nza tsaya ka skwi ta tsaɗ lu ka ŋa ghuni. 6Vilakw, ta lghaɗu ama ta a takuɗama ni wu, nda nza tsaya ka skwi ta tsaɗ lu ka ŋa ghuni. 7Ghuvazu, nda ta takuɗama ni, ama haɗ ta lghaɗu wa. Nda nza ka skwi ta tsaɗ lu ka ŋa ghuni.
8Zəta a kuni ta sluʼa taŋ wu, ksaŋta a kuni ta mbla taŋ wa. Nda nza tsaha ya ka skwi ta tsaɗ lu ka ŋa ghuni.
9Mataba inda skwiha ma imi, ma drəf, ka ya ma ghwa a tsi, wya ya dzaʼa laviŋta kuni ta zay: Dzaʼa zay kuni ta inda ya mamu zlər mamu ŋulaŋ ta həŋ. 10Ama inda ya kul haɗ zlər nda ŋulaŋ ta həŋ ta nzakw ma drəf nda ya ma ghwa, ta nzakway ka skwiha ta gigɗa vgha, ka sanlaha ma skwiha ta nzakw ma imi a tsi, dzaʼa nghay kuni ka skwa manzakɗaway ta həŋ. 11Skwa manzakɗaway tsaha ya da kaghuni, haɗ kuni dzaʼa za sluʼa taŋ wa. Ka skwa manzakɗaway dzaʼa ngha kuni ta mbla taŋ. 12Inda skwi ma imi, kul haɗ zlər nda ŋulaŋ tida ná, dzaʼa nzakway ka skwa manzakɗaway da kaghuni.
13Wya skwiha dzaʼa kuni da nghay ka skwa manzakɗaway mataba zarakha nda ɗyakha. Haɗ kuni dzaʼa za həŋ wu, kabga skwa manzakɗaway həŋ:
Dzala, nda guguzlum, nda guguzluma ŋəra, 14nda bikwira dva, nda bikwira ŋəra nda mndəra taŋ, 15nda inda zarakataghuvi nda mndəra taŋ, 16nda zarwa, nda mbizim, nda mndəra sanlaha ma mbizim, nda mndəra sanlaha ma bikwir, 17nda mbizima dva, nda mbizima imi, nda mbizima wereh, 18nda mbizima ŋusliŋ, nda mbizima bəghawa, nda kwila, 19nda zulum, nda mimtagu nda mndəra taŋ, nda watah, nda zvahw.
20Inda skwiha ta gigɗa vgha nda zlghəŋ ta həŋ, nda səla fwaɗ mista taŋ ná, ka skwa manzakɗaway tsaha ya da kaghuni. 21Ama mataba skwiha ta gigɗa vgha nda zlghəŋ ta həŋ, nda səla fwaɗ mista taŋ ná, dzaʼa zay kuni ta ya nda sisilikw, nda tsəzlər ta həŋ, ŋa valu ta haɗik. 22Wya mndərga ya dzaʼa laviŋta kuni ta zay:
Hiʼi nda mndəra taŋ, nda hiʼa zulum nda mndəra taŋ, humbul nda mndəra taŋ, zwana hiʼi nda mndəra taŋ.
23Inda pɗakwa sanlaha ma skwiha ta gigɗa vgha nda zlghəŋ ta həŋ, nda səla fwaɗa mista taŋ ya ná, nda nza tsaha ya ka skwa manzakɗaway da kaghuni.
24Wya nimtakha nda rini dzaʼa nighunista ka gwal ta tsaɗ lu. Dər wati ma mndu ta ksaŋtá mbla taŋ, dzaʼa nda nza kuni ka gwal ta tsaɗ lu ha ga hawu. 25Dər wati ma mndu ta klaftá mbla taŋ, ghwaɓiŋta ni ta lgutha ni, dzaʼa nzakway ka mndu ta tsaɗ lu ha ga hawu. 26Inda nimtak nda rini kul taku takuɗama taŋ, ka ya kul haɗ ta lghaɗu a tsi, nda nza tsaha ya ka skwi ta tsaɗ lu ka kaghuni. Inda dər wati ma mndu ta ksaŋta dzaʼa nzakway ka mndu ta tsaɗ lu. 27Inda skwi fwaɗ səla mista ni ta mbaɗa nda huɗa səla ná, skwi ta tsaɗ lu tsaha ya da kaghuni. Dər wa ta ksaŋtá mbla taŋ, dzaʼa nzakway ka mndu ta tsaɗ lu ha ga hawu. 28Dər wati ma mndu ta klaftá mbla taŋ, ghwaɓiŋta ni ta lgutha ni, dzaʼa nzakway ka skwi ta tsaɗ lu ha ga hawu. Skwiha ta tsaɗ lu tsaha ya da kaghuni.
29Wya ya mataba skwiha ta gigɗa vgha ta haɗik dzaʼa nzakway ka skwiha ta tsaɗ lu da kaghuni:
Uva, nda mbəga, nda digir nda mndəra taŋ, 30nda makdikdik, nda ghwazim, nda ɓlihatihir, nda ɗiwir nda hliŋa.
31Mataba inda skwiha ta gigɗa vgha ta haɗik, tsaha ka skwiha ta tsaɗ lu da ghuni ya, dər wati ma mndu ta ksaŋtá mtata ni, dzaʼa nzakway ka mndu ta tsaɗ lu ha ga hawu. 32Inda huzla dzaʼa dɗafta mbla dər wati ma tsa skwiha ya tida, nda nza tsa skwi ya ka skwi ta tsaɗ lu, dər ta huzla ka udzu tsi, dər ta lgut tsi, dər ta huta tsi, dər ta buhu tsi, inda huzla ta ksə lu ta slna nda tsi. Dzaʼa ghuɓiŋ ghuɓa lu nda imi, ŋa nzata ni ka skwi ta tsaɗ lu ha ga hawu. Ta hula tsaya ŋa nzəglata ni ka skwi kul tsaɗ lu. 33Inda huzla ya ka rɓisl dzaʼa dɗamta tsa skwiha ya dida, nda nza inda skwiha ma həŋ ka skwiha ta tsaɗ lu, ka dzaɓiŋta kuni ta tsa huzla ya. 34Inda skwi ta zə lu nda za, ka laf la imi si ma tsa huzla ya tida katsi, nda nza tsa skwa zay ya ka skwi ta tsaɗ lu, manda tsaya skwi ta sə lu nda sa guli, nda nza ka skwi ta tsaɗ lu dər kinawu tsa huzla pgham lu mida ya. 35Inda skwi dzaʼa dɗafta mbla tsa skwiha ya tida, dzaʼa nzakway ka skwi ta tsaɗ lu. Dər uvun tsi, dər litik tsi, dzaʼa paslanap pasla lu. Nda nza ka skwi ta tsaɗ lu. Nda nza ka skwi ta tsaɗ lu guli da kaghuni. 36Nziya nza tsi, ka dɗam dɗa mbla sani ma tsa skwiha ya da dzuɓay, ka vavrəm a tsi, nda nza tsa imi ya kul tsaɗ lu, ama mndu dzaʼa ksaŋtá mbla tsa skwi ya ná, nda nza ka mndu nda skwa tsaɗa tida. 37Ka dɗaf dəɗa mbla sani ma tsa skwiha ya ta hulfa dzaʼa lu da sləgay, nzata a tsa hulfa ya ka skwa tsaɗay wu. 38Ama ka magaf maga lu ta imi ta tsa hulfa ya, ta dɗaftá mbla sani ma tsa skwiha ya tida katsi, dzaʼa nzakway ka skwa tsaɗay da kaghuni.
39Ka lagha sani mataba nimtak ka rini ta zə a tsi, ka mtuta katsi, tsa mndu dzaʼa ksaŋtá mbla ni ya ná, nda nza ka mndu nda skwa tsaɗa tida ha ga hawu. 40Mndu dzaʼa zutá mbla sani ma tsa skwiha ya, ghwaɓiŋta ni ta lgutha ni, ka nzata ni ka mndu nda skwa tsaɗa tida ha ga hawu. Mndu dzaʼa klaftá mbla ni, ghwaɓiŋta ni ta lgutha ni, ka nzata ni ka mndu nda skwa tsaɗa tida ha ga hawu.
41Inda skwiha ta gigɗa vgha ta haɗik ná, skwa manzakɗaway həŋ da kaghuni, haɗ kuni dzaʼa za həŋ wa. 42Haɗ kuni dzaʼa za inda skwiha ta gigɗa vgha ta haɗik, dər ya ta mbaɗa nda huɗi wu, dər ya ta mbaɗa nda səla fwaɗ, ka ya ta malaptá səla fwaɗ a tsi wu, kabga skwa manzakɗaway həŋ. 43Yaha kuni da niŋtá ghəŋa ghuni ka skwa manzakɗaway nda ma za tsa skwiha ta gigɗa vgha ya. Yaha kuni da niŋtá ghəŋa ghuni ka gwal ta tsaɗ lu, dá nzakw kuni ka gwal ta tsaɗ lu nda tsa skwiha ya. 44Iʼi ná, Yawe yu, Lazglafta ghuni. Fawa fa ta ghəŋa ghuni nda ghuɓa, nzawa nza ka gwal nda ghuɓa, kabga nda ghuɓa iʼi. Yaha kuni da niŋtá ka gwal ta tsaɗ lu ta ghəŋa ghuni nda inda tsa skwiha ta gigɗa vgha ta haɗik ya. 45Iʼi Yawe ta hlagaghunapta ma haɗika Masar ŋa nzakway ɗa ka Lazglafta ghuni. Tsaya tama ná, nzawa nza nda ghuɓa, kabga nda ghuɓa iʼi, » kaʼa.
46Tsaha ya zlahuha ta ghəŋa nimtak nda rini, nda zarakha nda ɗyakha, nda inda skwiha nda hafu ma həŋ ma imi, nda ya ta mbaɗa ta haɗik. 47Tsa zlahuha ya ná, nda nza ŋa dganatá skwi ta tsaɗa lu nda skwi kul tsaɗ lu, nda nimtakha nda rini laviŋ lu ta zay, nda ya ŋa kwal kul zay.
Currently Selected:
Lev 11: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
