Sab 16
16
Ghunakta Yawe ta manna nda fufuriha
1Ka sliʼaftá guyatá ghəŋa la Israʼila demdem ma Ilim, ka ɓhadaghata ta mtaka Sini, ma takataka Ilim nda Sinay, baɗ maghwaŋpəɗ hutaf ma tila mahis, tahula saba taŋ ma haɗika Masar. 2Ma tsa mtak ya, ka ruruŋwu guyatá ghəŋa la Israʼila demdem ta ruruŋwaku ta ghəŋa i Musa nda Haruna, 3ka həŋ na: « Ta dər má si pslata Yawe ta aŋni ma haɗika Masar! Hada ná, ta vata siga sluʼi si ta nzakwa ŋni, ka zə ŋni ha ka baghawta ŋni! Ama ka hlagaptá kuni ta aŋni, ka hlagaghata da na mtak na, ŋa rwanatá na dəmga na nda maya! » ka həŋ. 4Ka Yawe nda Musa mantsa: « Dzaʼa nzəgaghuna nza yu ta luwa ta skwa zay. Inda fitik, ŋa sliʼagapta mnduha ma ghuɓu, ŋa dzaʼa da hla skwa zay prək zay taŋ inda vaghu. Mantsa ya dzaʼa dzəghaŋta yu ta həŋ, ka ngha yu ka dzaʼa snə re sna a wa a həŋ ta zlahuha ɗa. 5Baɗ mamkuʼ a fitik ya, ta pay həŋ ta tsa skwa zay dzaʼa həŋ tskafta ya, dzaʼa dukwaf dukwa həŋ ta sgavaghata his səla ka malaghutá ŋa sanlaha ma fitik, » kaʼa. 6Ka i Musa nda Haruna mnanatá inda la Israʼila mantsa: « Ga hawu gita dzaʼa snaŋta kuni kazlay Yawe ta hlagaghunapta ma haɗika Masar kəʼa. 7Ga sərɗək ya, dzaʼa nghay kuni ta glakwa Yawe, kabga nda sna ta ruruŋwakwa ghuni ta ghəŋa ni. Wa aŋni ŋa ruruŋwakwa ghuni ta ghəŋa aŋni na? » ka həŋ. 8Ka Musa guli mantsa: « Dzaʼa vlaghuna vla Yawe ga hawu ta sluʼi ŋa zay ghuni. Ga sərɗək ya, ŋa baghaghunafta ni nda skwa zay, kabga snaŋ sna ta ruruŋwaku ta ruruŋ kuni ta ghəŋa ni. Ta ghəŋa aŋni a tsa ruruŋwakwa ghuni ya wa. Wa aŋni na? Ta ghəŋa Yawe ta ruruŋwa kuni ta ruruŋwaku, » kaʼa.
9Ka Musa nda Haruna mantsa: « Mnana mna ta guyatá ghəŋa la Israʼila demdem ka slanaghata həŋ ta kəma Yawe, kabga snaŋ sna tsa ruruŋwakwa taŋ ya, » kaʼa. 10Ma fitika gwaɗay Haruna ta tsa gwaɗa ya ŋa guyatá ghəŋa la Israʼila demdem ná, ta mbəɗavatá hahəŋ ka nghə nda ma mtak. Gi ka zlagapta glakwa Yawe ma kusay. 11Ka Yawe nda Musa mantsa: 12« Snaŋ sna yu ta ruruŋwakwa la Israʼila. Mnana mna ta həŋ kazlay na: “Kraʼukraʼuwa vli ga hawu, dzaʼa zay kuni ta sluʼi. Ga sərɗək guli, dzaʼa baghaku kuni nda skwa zay. Mantsa ya dzaʼa kəl kuni ka snaŋta kazlay Iʼi Yawe, Lazglafta ghuni kəʼa,” » kaʼa.
13Ta tsa hawu ya tama, ka sliʼagaptá fufuriha təɓsaʼ ndəghanaftá ghuɓu. Ga sərɗək ya guli, ka wanaftá wuninik ta ghuɓu.
14Manda salata tsa wuninik ya, ka nzatá sana skwi manda ŋulaŋ klipiɗpiɗa ta haɗik. 15Nghanata la Israʼila, ka həŋ mataba taŋ mantsa: « Nahgani na na? » ka həŋ, kabga sana a həŋ wa. Ka Musa nda həŋ mantsa: « Skwa zay ya vlaghuna Yawe ŋa zay ghuni. 16Wya gwaɗa mnaf Yawe: “Ka hlaʼata dər wa prək ka zay ni, ka agwada turtuk ta inda mndu, taɓta mbsaka mnduha ga taŋ. Ka hlaʼatá mndu ŋa gwal ga taŋ,” » kaʼa. 17Ka magatá la Israʼila manda va tsaya. Ka halaʼata həŋ. Ŋulum ŋulum halaʼata sanlaha, kiʼa kiʼa ŋa sanlaha. 18Garafta taŋ ta agwada ná, furtu a ŋa tsa gwal ta hlafta ŋulum ya wu, htu a ŋa tsa gwal ta hlafta kiʼa ya guli wa. Prək zay ni hlaʼata inda mndu. 19Ka Musa nda həŋ kay guli mantsa: « Yaha kuni pɗanata ha ŋa ga sərɗək, » kaʼa. 20Ama sna a sanlaha ta tsa gwaɗa Musa ya wu, ka pɗanatá həŋ ha ŋa ga sərɗək. Ka yamtá mtarak mida ka ziʼuta. Ka ɓasanavatá Musa ta ŋuɗuf ta həŋ. 21Daga baɗ tsa, ka hlə inda mndu ga sərɗək prək ka zay ni. Ama ndəhakwa fitik ya ná, nuʼuta ni.
22Baɗ mamkuʼ a fitik ya, ka hlaftá həŋ his səla ta skwi ŋa zay, tsaya agwada his ta inda mndu. Ka sagha inda la maliha ta ghəŋa guyata ghəŋ mnanatá Musa ta skwi ta luta. 23Ka Musa nda həŋ mantsa: « Wya ka Yawe mnata: “Mahtsim fitika mbiʼa vgha, ka Sabat nda fa ŋa Yawe. Sulawa sula gita ta skwi ya kumaŋ kuni ta sulata, ka dadata kuni ta skwi ya kumaŋ kuni ta dadata. Pɗakwa ni ma vəl zay ghuni ya, ka fata kuni ha ŋa mahtsim,” » kaʼa. 24Ka fatá həŋ ha ŋa ga sərɗək ta pɗakwa ni manda va ya si mnanaf Musa ta həŋ, ziʼu a wu, yam a mtarak mida guli wa. 25Ka Musa nda həŋ mantsa: « Zuwa za gita gita, kabga gita sabata Yawe. Slanaghata a kuni ma mtak gita wa. 26Mkuʼ fitika ghuni ta hlay, ama baɗ mandəfáŋ ya, Sabat tsaya, haɗ kuni dzaʼa slanaghata baɗ tsaya wu, » kaʼa. 27Ka sliʼaftá sanlaha ma mnduha baɗ mandəfáŋa fitik ka laghu da hlay, ama haɗ skwi slanagha həŋ wa. 28Ka Yawe nda Musa mantsa: « Ha ŋa yawu dzaʼa kwalaghuta kuni ta snatá zlaha ɗa, nda skwiha ya ta mnaghunafta yu na? 29Fawa fa ta sləməŋ ɗina, Iʼi Yawe ta vlaghunatá Sabat, tsaya kəl yu ka vlaghunatá baɗ mamkuʼ a fitik ta skwa zay ŋa fitik his. Baɗ mandəfáŋa fitik ya ná, nzakway dər wa ta nzaku mintgha ni, yaha dər wa da sabi mintgha ni baɗ tsaya, » kaʼa. 30Mantsa ya tama, ka mbiʼaptá mnduha ta vgha baɗ mandəfáŋa fitik. 31Ka tsanaftá la Israʼila ta hgu ta tsa skwa zay ya ka manna. Manda hya masuʼata nzakwa ni, miɗiɗa ka ŋusliŋ. Gun guna ni manda gatu klehets klehetsa magaf lu nda zuɗum. 32Ka Musa mantsa: « Wya ka Yawe mnafta: “Ndəghanafwa ndəghata agwada nda tsi, ka nzulanata kuni ŋa zivirha ghuni, ŋa nghanata taŋ ta skwa zay ya zughunus yu ma mtak, ma fitika hlagaghunapta ɗa ma haɗika Masar,” » kaʼa. 33Ka Musa nda Haruna mantsa: « Klaf kla ta siga, ka pghamta ka ta agwada manna mida, ka fata ka ta kəma Yawe, ŋa nzulanata ha zivirha ghuni, » kaʼa. 34Manda va ya mnanaf Yawe ta Musa, ka fatá Haruna ta tsa siga ya ta kəma akwata dzratá wi ŋa nzulay. 35Fwaɗ mbsak vakwa la Israʼila ta za manna ha ka lagha taŋ ta haɗik ya ta nzaku mnduha. Ka gɗata həŋ ta zay ha ka ɓhadaghata taŋ ta vraghwa haɗika Kanʼana. 36Agwada manna turtuk ná, ta magay ta kiluʼ hkən.
Currently Selected:
Sab 16: xed
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
