Slg 28

Pwal ma Malta

1Tahula katagapta ŋni ta vgha, Malta hga tsa vli ta tsavata ma drəf ya, ka ŋni zlra snaŋta. 2Mnduha ma tsa luwa ya ná, ŋərma mnduha həŋ, ka tsuʼaftá həŋ ta aŋni. Ka vaŋnaghata həŋ ta vu gik, kabga ta nzaku imi, ka ka nda mtasl guli. 3Ka hlafta Pwal ta nivi ka pghay ta ghəŋa tsa vu ya, tsaw mamu mupuha mida. Snay ni ta hurfukwa vu, gi takwatsak lafi ta dzva Pwal. 4Nghay gwal ma tsa luwa ya ta tsa mupuha ya kzəghəla ta dzva Pwal, ka həŋ mataba taŋ mantsa: « Ta psla mndu na mndu na kahwathwata. Zlah zlah katagapta tsi ta vgha ma drəf kay guli ná, ta zlighisa a yu wu, ba va ta dzaghata ɗa ka guma Lazglafta nda tsi, » ka həŋ. 5Ka wuslikidiŋtá Pwal ta tsa mupuha ya da vu. Haɗ sana skwi ta ghunaŋta ɗekɗek wa. 6Kəzla ghuyanaftani ta Pwal ka gi zləmbata ni ka mtuta ni a tsi, ŋa lamndu si ta kəzlay. Ka nzaku həŋ ná, haɗ sana skwi magana tsi wa. « Sana Lazglafta na mndu ná, » ka həŋ mbəɗglavata.

7Ndusa nda tsa vli ya, mamu vla sana mali ta ghəŋa tsa haɗik ta tsavata ma drəf ya. Publiyus hga tsa mndu ya. Tsatsi ta tsuʼaftá aŋni, ka payaŋnatá vli ɗina, ka zatá ŋni ta fitik hkən ga taŋ. 8Tsaw ta hani da ni ma Publiyus ta ghəzləŋ ta ɓasa ŋuɗidar nda klu tani. Ka lagha Pwal da nghanaghata, ka fanaghatá tsi ta dzvu, ka maga duʼa da Lazglafta ta ghəŋa ni, ka mbanaftá tsi. 9Manda mbanafta Pwal ta tsa mndu ya, ka sliʼadaghatá gwal kul ɗughwanaku ta tsa haɗik ta tsavata ma drəf ya slanaghata, ka mbambanaftá tsi ta həŋ. 10Ka va vlə həŋ ta skwi kavghakavgha ŋa ŋni. Ta sliʼi ŋni ka dzaʼa da kwambalu guli, ka tsakaŋnafta həŋ ta inda skwi dzaʼa kata aŋni ma mbaɗa ŋni.

Ɓhadaghata Pwal da luwa Ruma

11Tahula tili hkən, ka sliʼaftá ŋni ka lami da kwambala luwa Alegzandri, ta hgə lu ka « Lazglafta la mbuhwali, » ta zagaptá vyani ta tsa haɗik ta tsavata ma drəf ya. 12Ɓhadaghata ŋni da luwa Sirikuz, ka zata ŋni ta fitik hkən hada. 13Ka sliʼaftá ŋni hada ka ɓhadaghata da luwa Regiyu. Ga mahtsima ni, ka saf falaka *Sud, ka ɓhadaghata ŋni da luwa Puzul baɗu mahis. 14Hada, ka slafta ŋni ta zwana ma ma zlghay nda ŋuɗuf. Ka həŋ mantsa: « Kdəkwa kdək, zawa za ta luma kawadaga nda aŋni, » ka həŋ nda aŋni. Mantsa ya ka ŋni ɓhadaghata da luwa Ruma. 15Ka snaŋta zwana ma ma zlghay nda ŋuɗuf ta nzakway ma luwa Ruma kazlay: Waʼa həŋ ta sabi kəʼa, ka sliʼaftá həŋ ka sagha da guya aŋni ha ta luma Apyus nda ya ma sana vli ta hgə lu ka vla hani hkən ya. Nghay Pwal ta həŋ, ka rfu tsi ta Lazglafta, ka ufəglavafta vgha ni. 16Ɓhadaghata ŋni da luwa Ruma, ka zlanaŋtá lu ta tvi ta Pwal ŋa dzaʼa ni nzaku ma ŋa ni dzuguvi nda ghəŋa ni, kawadaga nda sludzi ta nghay.

Mna gwaɗa Pwal ma luwa Ruma

17Baɗu mahkəna fitik, ka hagaftá Pwal ta gwal dagala dagala mataba la *Yahuda. Kaʼa nda həŋ tskavar həŋ mantsa: « Zwana ma ɗa, haɗ sana skwi magana yu ta la amu wa. Dmanaf a yu ta tva nzakwa dzidzíha mu wu, ama ka ksaftá lu ta iʼi ka vuʼa ma luwa Ursalima. Daga hada, ka lam yu da dzva la Ruma. 18Ɗawaɗipta tsaha ya ta vli, ka kum həŋ ta zliɗista, kabga haɗ sana skwi ksiɗif həŋ nda tsi prək ka dzatá iʼi wa. 19Tsaw va a aŋni ta zliŋta wu, ka la Yahuda. Ka si mantsa tsi ná, nda nza tkweʼ tama ka kla na guma ɗa na ta kəma mgham Sezar, ka yu. Aŋ mndani, ka wla yu ta laʼini a ka yu wa. 20Tsaya tama kəl yu ka zba nghaŋta kaghuni ka gwaɗaŋta mu ta tsa gwaɗa ya. Ta ghəŋa tsa skwi faf la Israʼila ta ghəŋ tida ya tsamta lu ta iʼi ma ziɗa, » kaʼa. 21Ka həŋ nda tsi mantsa: « Haɗ sana ɗelewer vindaf lu ta kagha mutsaf aŋni da la Zudiya wa. Haɗ ya dər turtuk mataba zwana amu ta sagha da mnaftá gwaɗa ta kagha dər ka vzaftá rutsak ta kagha wa. 22Ta kumay aŋni ta snaŋtá skwi ta ndanu kagha ka ghəŋa gha nda ma wa gha. Skwi ya snaŋ aŋni ná, nda ndəgha gwal ta pgha rutsak ta na lfiɗa dina ghuni na, » ka həŋ.

23Ka tsaftá həŋ ta sana fitik tama ŋa gwayavata taŋ. Baɗu tsa fitik ya, ka sliʼaftá ndəghata həŋ ka lagha slanaghatá Pwal ma vla nzakwa ni. Ka zlraftá Pwal ta paslay, ka mnay ŋa taŋ ta gwaɗa ta ga mgham Lazglafta, daga ga sərɗək, ha tekulemes fitik, ŋa tɗakta ghunislaka taŋ ta ghəŋa gwaɗa ta *Yesu. Ka mnə tsi ta gwaɗa ma deftera zlaha Musa, nda ya ma deftera la anabi, ŋa taŋ. 24Ka ksaftá fəlma sanlaha ta tsa gwaɗa ta mnə tsi ya, ta kwalaghutá sanlaha ta tsuʼafta ɗekɗek. 25Ka traptá həŋ ta dzrafta wi ka skwa turtuk, ka gazlə həŋ. Ka Pwal nda həŋ mantsa: « A ta ŋa Sulkum nda ghuɓa ta mnay ŋa dzidzíha ghuni nda ma wa anabi Isaya kazlay:

26“La da slanaghatá na mnduha na, ka ka nda həŋ na:

Dzaʼa nda sna kuni nda sləməŋa ghuni, ama tsatsafta a kuni ɗekɗek wa.

Dzaʼa nda ngha kuni nda ira ghuni, ama tsəmafta a kuni ɗekɗek guli wa.

27Nana mnduha na ná,

təŋ təŋa ghəŋa taŋ.

Dərzliŋdərzla həŋ ta sləməŋa taŋ,

hahaf haha həŋ ta ira taŋ,

kabga vaʼa həŋ ta nghaŋta nda ira taŋ wu,

va a həŋ ta snaŋta nda sləməŋa taŋ guli wu,

da lam tsi da ŋuɗufa taŋ,

da mbəɗaktá həŋ ta vgha təv iʼi,

da mbanafta#28:27 Ngha ta Isaya 6:9-10. yu ta həŋ kəʼa ya kay.”

28Ala wya tsi tama, ghunaf ghuna Lazglafta ta na *Lfiɗa Gwaɗa na da gwal kul nzakway ka la Yahuda. Hahəŋ, dzaʼa snay həŋ, » kaʼa.

[29Kɗakwa Pwal ta mnatá tsa gwaɗa ya, ka gazlaghutá la Yahuda nda zlərɗay mataba taŋ.]

30Ka zatá Pwal ta vaku rəŋ rəŋ his ma tsa həga ta plə tsi nda pla ya. Ta tsuʼay ta inda mndu ta lagha slanaghata hada guli. 31Pyaf a lu wu, ka mnə tsi ta gwaɗa ta ghəŋa ga mghama Lazglafta. Ka taghə tsi ta skwi ta ghəŋa Mgham Yesu *Kristi, haɗ sana skwi ta gurtsaŋta wa.

Currently Selected:

Slg 28: xed

Highlight

Copy