Luka 24
24
Kufufuka ka Insa
1Fala pakucere subuu namapema, suku yakwanza ya sumana#24:1 “Suku yakwanza ya sumana” ndi Jumapiri., wanawaka ware watwala sheru yawatengeze ire, wakuka nawo kukaburi. 2Nakufika kure, riwe rituriwe pakaburi rire wasingana ripiringisiwe. 3Basi, wengira njonga mure, fala mwiri wa Mwenye Insa awasingane. 4Ewo, pawashangire kuhusu vikunire vire, simpunde nkulu wanawalume wawiri wawemira karibu yawo, wâvala nguwo nyelupa vú! 5Wanawaka ware wakisusuka, wakinamira pansi, fala wanawalume ware wakiwadairi javi: “Mbana munsakula ka wafwi munu hai? 6Iye aapo‑mu, kafufuka! Amukumbukira vyaâkwambireni Galileya? 7Amukumbukira kuwa iye kâsema kuwa Binadamu wa Binguni ajuzi aperekiwe mmakono mwa wamádambi wangomezere, na suku ya tatu afufuke?” 8Newo wakikumbukira usemi wake ure. 9Basi, wakilawa nkaburi mure, wakiludira kawákiwa mawalii kumi na mmoja kure pamoja na wenziwawo, wakiwambira piya vikunire. 10Kweli, wanawaka ware wákiwa Mariyamu Madalena, Zuwana, Mariyamu mamaye Yakobu, na wengine tena. Ewo wakiwambira mawalii ware vikunire vire, 11fala mawalii ware awaminire. Wawona kuwa vyawereze wanawaka vire vyauzozo. 12#24:12 Mandiko mengine a mida aana eyi haya‑yi. [Novyo-sivyo, Peduru akilamuka, akituwa mpaka kukaburi nokure. Nakufika akinama, akisungurira, kawona kafani tu basi yakafiniriwe Insa ire. Ikisa akiludira ukaya, wakushanga wawenye kwa vinu vikunire vire.]
Vikunire munjira yakuka Emau
Matwaya 16:12-13
13Noyo suku‑yo, wanu wawiri wafulati wa Insa wakuka kaya moja yakwitiwa Emau, kiyasi ca kilometuru kumi na mmoja na Yerusalemu. 14Munjira, wakipita wakipakanira kuhusu vikunire vire piya. 15Wakati wawakipakanira kuno wakikaidiyana, Insa mwanyewe akilawirira munjira mure, akifunga nawo nkonjo. 16Fala ewo wafungiwa maso, awakimmanyira kuwa ndiye. 17Insa akiwadairi: “Mwankupita, mukipakanira kinani?”
Ewo wakimira, wakibaki wakuzizimiriwa wawenye. 18Ikisa mmoja wakwitiwa Keleopa akimwambira: “Nowe‑we tu basi ndi myeni ubakire sawijiwa cikunire Yerusalemu suku za mwinsho‑zi?”
19Iye akiwadairi: “Cikuna kinani?”
Ewo wakinjibu: “Vinkunire Insa wa Nazareti. Iye ákiwa nabii, akitendanga maajuza a kutajabisa na akisowera kwa uwezo mbere ya Mwenyezimungu na wanu piya. 20Fala wakulungwa wetu wa dini pamoja na wakulungwa wengine wampereka kuhukumiwa kifo, iye kagomezeriwa pansalaba. 21Ofwe tikirindira kuwa iye ndi ire akija kombola Iziraeli! Fala kwa piya-vyo, epa rero zipita suku natu tangu vikikuna. 22Visitoshe, wanawaka wamojawapo wa kipinga cetu watisususa. Subuu namapema pawokire kukaburi, 23awasingane maiti ake! Pawaludire, wasema kuwa wawawona malaika wawereza kuwa Insa kawapo hai! 24Wengine wákiwa pamoja nofwe, wakuka kukaburi noko, wakisingana piya sawa‑sawa kamba vyawereze wanawaka novire. Fala iye awammonire.” 25Insa akiwambira javi: “Umwe mubanga, murimba kukubali mmyoyo mwenu piya vyawambire minabii! 26Aikisakikana kuwa Almasihi vinu‑vi atabike ikisa engire nkati ya utukufu wake?” 27Ikisa Insa, mwanzo wa vitabu vya Musa mpaka vitabu vya minabii wengine, akiwafafanurira Mandiko piya ákisowera kuhusu iye.
28Kwa javyo, wari karibu na kaya yawakuka, Insa karitenza kupunda, 29fala ewo wakintafadali, wakamba: “Ikala nofwe konta juwa riswa fúti.” Basi, akingira akikala nawo. 30Pawekare pameza kurya, Insa akitwala nkate, akishukuru, akimeya, akiwawanyira. 31Mpunde sinkulu, wanu ware maso awo akiwafunguka ngwê, wakimmanyira. Neye akilainika!
32Wakambirana watupu: “Iye paakisowera nofwe munjira mure kuno akitifafanurira Mandiko, myoyo yetu ikitibiya shindo pakifuwa, sinovyo?” 33Kwa mpunde noure wakilamuka, wakiludira Yerusalemu, wakiwasingana mawalii kumi na mmoja na wengine‑po wajumane pamoja. 34Pawafikire, wo‑wawiri wakamba: “Ndi kweli Mwenye kafufuka! Iye kânlawirira Peduru#24:34 Nkigeregu Peduru akwitiwa “Ansumani”.!” 35Ikisa ewo wakiwereza viwakunire munjira mure. Wakamba: “Insa timmanyira wakati wameyire nkate.”
Insa awalawirira wanafunzi wake
Matwaya 28:16-20; Maruku 16:14-18; Yahaya 20:19-23; Vitendo 1:6-8
36Evi vinu‑vi pawakereza, Insa akiritula kati-kati yawo, akiwambira: “Salama iwe namwe!” 37Fala ewo wasusuka, wakibaki wakushanga wawenye, wakidaniza kuwa nsoka. 38Iye akiwambira: “Mbana mususuka? Sababuni kuwa na dana mmoyo mwenu? 39Ninang'anizeni mmakono mwangu‑mu na mmaulu mwangu‑mu. Ndi nomi-nomini. Nipameni muniwona, kamana nsoka auna nyama wala makongolo, kamba vyamuniwona vyaniri nawo omi‑vi.” 40Nakusowera javire, kawolotera mmakono na mmaulu. 41Ingawa awakikubali sana, fala iwejala radi na kutajabu! Basi Insa akiwadairi: “Epa mwanawo cakurya kimojawapo?” 42Ewo wakimpa kipande kimoja ca inswi wakumanikiwa. 43Insa akitwala, akitafuna mbere yawo.
44Ikisa akiwambira: “Mida patíkiwa onse, nukwambirani kuwa piya vyaandikiwe kuhusu omi nTaureti na nvitabu vya minabii na nZaburi víjuzi vitimiziwe.” 45Ikisa akiwafungula viswa awerere Mandiko Matakatifu, 46na akiwambira: “Yandikiwa javi, Almasihi akijuzi atabike, na suku ya tatu afufuke kati ya wafwi, 47na kwa zina rake itangaziwe kwa piya kabila, mwanzo wa Yerusalemu, habari yake kuhusu kutubiya ipate wanu waswamiiwe madambi awo. 48Umwe muwa mashahidi wa eya mambo‑ya. 49Visitoshe, omi mwanyewe nukuperekerani caalavire tamaa Baba. Fala rindirani Yerusalemu nopa, mpaka mupokerere uwezo usaka kukwisukirani kulawa mbinguni.”
Insa akweziwa mbinguni
Maruku 16:19-20; Vitendo 1:9-11
50Ikisa Insa akiwalongoza wanafunzi wake upande wa Betaniya. Nokure akilamusa makono, akiwajanliya. 51Bandi ya kuwajanliya, akiwanyema, ikisa akikweziwa mbinguni. 52Na ewo wakimwabudu, nakwisa wakiludira Yerusalemu wári radi pakulu. 53Mara kwa mara wákilawanga nNyumba Takatifu, wakinsifu Mwenyezimungu.
Currently Selected:
Luka 24: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.