Mwanzo 36
36
Kupongolana ka rikolo ra Ezau
1Eyi ndi hadisi ya kupongolana ka rikolo ra Ezau. Ezau mana ake Edomu. 2Ezau kawalomba waka waKanaa. Ewo mazina awo wákitiwa Ada, mwana wa Eloni muHiti, Oholibama, mwana wa Ana, mwana wa Sibeoni muHivi, 3na Basemati, mwana wa Sumaila, nlumbuwe Nebayoti. 4Ada, kapongola naye mwana mmoja, ákitiwa Elifazi, na Basemati kapongola naye Reueli. 5Oholibama kapongola naye wana watatu: Yeushi, Yalamu na Kora. Ewa ndi wana wa Ezau waawapongore inti ya Kanaa.
6Kwa suku moja, Ezau kalawa pamoja na waka wake na wanawe waka na walume na wanu piya wakikala nawo, akúka inti nyengine ya baidi na nyenyeye Yankubu. Kasukula mifuwo yake, manyama ake piya na vinu vyake piya vyaapatire ari Kanaa. 7Iye na nyenyeye wákiwa nawo mali mengi pakulu, akuwa awákijuzi kwikala pamoja. Inti ya Kanaa yawákikala aîwere nawo matamuko a kutosha, kwa sababu wákiwa na mifuwo mingi. 8Ndi ntamana Ezau wakwitiwa zina rengine Edomu akúka akikala inti ya kumyango ya Seiri.
9Eya afulata-ya ndi mazina a kupongolana ka kinya-Ezau. Ezau wawa wa marikolo a wanu wa Edomu, inti ya kumyango ya Seiri. 10Ewa ndi wanawe: Elifazi mwana wa Ada, Reueli mwana wa Basemati. Wó-wawiri-wa waka wa Ezau. 11Elifazi kawapongola Temani, Umari, Sefu, Gatamu na Kenazi. 12Elifazi ire, mwana wa Ezau, ákiwa nawo nkawake ntoto wakwitiwa Timna. Kapongola naye mwana wa kwitiwa Amaleki. Basi ewu ndi úwere ujukulu wa Ada, muka mmoja wa Ezau. 13Ewa wafulata-wa ndi wawere wana wa Reueli: Nahati, Zera, Shama na Miza. Ewu ndi úkiwa ujukulu wa Basemati, muka mwengine wa Ezau. 14Oholibama, mwana wa Ana, njukuluwe Sebeoni, Ezau kapongola naye novyo wana watatu: Yeushi, Yalamu na Kora.
Marikolo a Ezau
15Ewa wafulata-wa ndi wawere makolo a marikolo kati ya ujukulu wa Ezau: Wana wapongore nawo kolo Elifazi, mwana kifundi wa Ezau, mwenye nkulu Temani, mwenye nkulu Umari, mwenye nkulu Sefu, mwenye nkulu Kenazi, 16mwenye nkulu Kora, mwenye nkulu Gatamu na mwenye nkulu Amaleki. Ewa ndi wawere mamwenye wakulu kinya-Elifazi, inti ya Edomu. Ewa wákiwa ujukulu wa Ada. 17Kwa wana wa kolo Reueli, mwana wa Ezau, mamwenye wakulu wákiwa mwenye nkulu Nahati, mwenye nkulu Zera, mwenye nkulu Shama na mwenye nkulu Miza. Ewa ndi wawere mamwenye wakulu kinya-Reueli, inti ya Edomu. Ewa ndi wákiwa ujukulu wa Basemati muka wa Ezau. 18Kwa wana wa Oholibama muka wa Ezau, mamwenye wakulu wákiwa mwenye nkulu Yeushi, mwenye nkulu Yalamu na mwenye nkulu Kora. Ewa ndi wákiwa mamwenye wakulu wa rikolo ra Oholibama mwana wa Ana na muka wa Ezau. 19Basi ewa ndi wana wa Ezau, etiwa Edomu, kila mmoja kolo wa rikolo rake.
Ujukulu wa Seiri
20Ewa wafulata-wa ndi wana wa Seiri muHori, na ndi wenye-kaya wa noyo inti-yo: Lotani, Shobali, Sebeoni, Ana, 21Bishoni, Eseri na Dishoni. Kwa kila mmoja ákiwa mwenye nkulu wa rikolo rake. Ewu ndi uwere ujukulu wa Seiri kaya ya Edomu. 22Lotamu kawapongola Hori na Emani. Lotamu ákiwa nlumbuwe Timna. 23Shobali kawapongola Alvani, Manahati, Ebali, Shefo na Onamu. 24Sibeoni kawapongola Aya na Ana. Ana ndi awonerere nviriro wa maji a kulunguza mulanga, wakati wákisunga maburu a Sebeoni wawaye. 25Ana kawapongola Dishoni na Oholibama. 26Dishoni kawapongola Emudani, Eshibani, Itirani na Kerani. 27Eseri kawapongola Bilihani, Zaawani na Akani. 28Dishoni kawapongola Usi na Arani. 29Ewa ndi wawere mamwenye wakulu wa waHori: Lotani, Shobali, Sibeoni, Ana, 30Dishoni, Eseri na Dishoni; ewa piya-wa kwa kila mmoja ákiwa mwenye nkulu wa rikolo rake muinti ya Seiri.
Mafalume wa Edomu
31Ewa wafulata-wa ndi mafalume wâtaware inti ya Edomu, kábula Iziraeli sainamba kutawariwa na nfalume asaka kuwa onse. 32Bela mwana wa Beori ndi âtaware inti ya Edomu. Zina ra kaya yake ulu rikitiwa Dinihaba. 33Bandi ya kufwa Bela, ákitawala Yobabu mwana Zera. Yobabu kwawo, Bosra. 34Bandi ya kufwa Yobabu, ákitawala Yushamu, kwawo Temani. 35Bandi ya kufwa Yushamu, ákitawala Hadadi mwana wa Bedadi. Eyu ndi âtendire nawo vita waMidiyani inti ya Mowabu akiwakidiri. Zina ra kaya yake ulu rikitiwa Aviti. 36Bandi ya kufwa Hadadi, ákitawala Samla, kwawo Masareka. 37Bandi ya kufwa Samla, ákitawala Shauli. Shauli kâlawa Rehoboti, kaya iri karibu na muto wa Eufarati. 38Bandi ya kufwa Shauli, ákitawala Baal-Hanani mwana wa Akibori. 39Bandi ya kufwa Baal-Hanani mwana wa Akibori, ákitawala Hadari. Zina ra kaya yake ulu rikitiwa Pau. Nkawake ákitiwa Mehetabeli, mwana wa Materedi, njukuluwe Mezahabu.
40Basi, eya afulata-ya ndi mazina a marikolo a kabila ya Ezau, kila rikolo pamoja na mekazi awo na mipaka yawo: Timna, Aluva, Eteti, 41Olohibama, Ela, Pinoni, 42Kenazi, Temani, Mebusari, 43Magidiyeli na Iramu. Basi, ewa piya ndi wawere marikolo a Edomu, kamba vyawere makaya a inti zawakimiliki. Wawa wa Edomu, Ezau.
Currently Selected:
Mwanzo 36: wmwBI
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.