Ing Malagung Diling Kanta 1
1
1 # 1 Ari 4:32. Ding pekamasanting kantang sinulat nang Aring Solomon.#1:1 O kaya: Mitalaga la kang Solomon o tungkul la kang Solomon.
Ing Mumunang Kanta
Ing Babai
2Sana uman mu ku karing labi mu;
ing kekang lugud maygit ya king alak a maniaman.
3Ing kekang banglu sasalingalngal;
ing lagyu mu tutugtug na ngan.
Inya ding babai malsinta la keka.
4Kuanan mu ku at ituki; magmalagua kata,
ika ing ari ku at king kuartu mu karin mu ku idala.
Tamasan ta ikatang adua ing ligaya.
Paintulut mung kakung takman ing lugud mung maniaman
a maygit king alak a inuman.
Matulid ing malsinta la keka ding sablang dalaga.
5Ikong kebabainan ning Jerusalem, matuling ku, oneng malagu na ku man,
matuling kung anti ding tolda ning Kedar,
oneng malagu naman anti ring kurtina nang Aring Solomon.
6E yu ku sana lalawan mababa uri
agyang ing kule ku komanggi;
ing aslag ning aldo ya ing mekapasari kaniti.
Ding kapatad kung lalaki kaku mua la ngan,
at pepagobran da ku king ubasan.
Ala kung panaun ban kakung katawan kaku yang lingapan.
7Sabian me kaku, O kakung pakamalan,
ing lugal nung nu me papastulan ing kekang kawan.
Nukarin ya ing karelang pipagpaynawan neng aldo kaugtuan?
Keka yang tulduan ban e ra na ka panintunan
karing aliwang pipagpastulan.
Ing Lalaki
8E me wari balu ing lugal,
O babaing alang kalupa king lagu?
Keka yang tukian ing kawan a mandikut;
kekang kambing karin mo pastulan
lele ding tolda ding aliwang pastul kawan.
9O sinta ku, kaninu da ka ipakilupa?
Kalupa mu la detang kabayung malagu ning ari ning Ehipto
a gagamitan na king karwahe na.
10Masanting lang lalawan ding pisngi mu pilatan ning buak mung makaikat,
at ning batal mung ating kwintas.
11Igawa ra kang gintung kwintas,
at palamutian ya king pilak.
Ing Babai
12Kabang makasandal ya ing ari king luklukan na
ing kakung pabanglu#1:12 pabanglu; king Hebreo: nard. sinalingalngal.
13Mabanglu yang anting mira ing kakung pakamalan,
inyang king kakung salu karin ya migkera.
14Anti ya king kapunggul a bulaklak ing kakung pakamalan,
karing mulahan ubas ning Engedi migbukadkad.
Ing Lalaki
15Kalagu mo, O sinta ko; tune kang malagu!
Mapundat lang mata mu.
Ing Babai
16Masanting ka, O kakung pakamalan;
makawili kang lalawan!
Berding dikut ya ing kekatang pagkeran;
17dutung lang sedro ding barakilan ning bale ta,
at ing kisami na sipres la.
Currently Selected:
Ing Malagung Diling Kanta 1: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
