Ding Kasebian 1
1
Ing Ulaga da ring Kasebian
1 # 1 Ari 4:32. Ding Kasebian nang Solomon a anak nang David at ari ning Israel.
2Ila deti ring kasebian a makasaup keka ban akilala mu ing kabiasnan at ing mayap a turu,#1:2 King Hebreo: usuk. at ban aintindian mu la ding malalam dang kabaldugan ding kasebian. 3Tuturu da reti nung makananu kang mibiebie maisip, at nung makananu kang maging makatuliran at alang papanigan. 4Dirinan deng kabiasnan ing taung alang beluan, at tuturu da karing kayanakan nung makananu lang gawang kapasyahan king ustung paralan. 5Malyari la namang makaragdag king beluan da ring taung biasa at munie kasaupan karing atin nang pegaralan 6ban malyari da lang aintindian ding malalam dang kabaldugan ding kasebian, at ding palaisipan ding taung biasa.
Ing Turu karing Kayanakan
7 # Job 28:28; Dalit 111:10; Kas 9:10; Sir 1:14. Ing takut king Ginu ya ing pamagumpisa na ning kabiasnan. Ala lang pansin ding mangmang king kabiasnan at king pamagaral.
8Anak ko, pakiramdaman mu ing tuturu nang tata mu at pakiramdaman mu ing sasabian nang ima mu, 9uling ing karelang tuturu mengaring kupia#1:9 King Hebreo: koronang bulaklak. at kwintas a munie dangalan keka.
10Anak ko, nung agkatan da ka ring makasalanan, keka la sanang tanggian. 11Nung sakaling sabian da, Tara, manintun tamung taung paten tamu! Panasakitan ta la ding taung alang kasalanan ban tumula tamu! 12Mabie la at masalese potang lapitan ta la, oneng mete la potang lakuan ta la! 13Mibandi tamu at mikatmuan la ding kekatamung bale king pibandian a akua tamu. 14Makiabe ka kekami at pipitnan-pitnan tamu ing sablang apanako tamu.
15Anak ko, e ka makiabe karing taung anti karen. Dumayu ka karela, 16uling kapad da ing darapat e mayap, at mamalagua lang makamate kalupang tau. 17Ala kang apala nung iyumang me ing bitag king akakit ning ayup a buri mung dakpan. 18Oneng e ra balu ding taung anti karen king ing umangan dang bitag ya kabud ing sarili da. 19Makanyan ing miras karing taung misasalapi king kapamilatan na ning pamaniapat katampalasanan; kamatayan ing karelang kaulian.
Mamaus ing Kabiasnan
20 # Kas 8:1-3. Mamaus yang masikan ing kabiasnan karing dalan at karing palengki; 21mamaus karing pasbul dalan ning siudad, at nukarin mang lugal la mititipun ding tau. Ngana,
22Taung mangmang! Angga kapilan yu buri ing ala kayung beluan? Angga kapilan yu pituya-tuya ing kabiasnan? Kapilan kayu pa kaya mabiasa? 23Pakiramdaman yu ing turu ku; dinan da kayung mayap a turu at dinan kening balu ku. 24Menatili kung mamaus kekayu, oneng e kayu bisang makiramdam. Agkatan da kayung lumapit, oneng e yu ku sikasu. 25E yu bitasang pinsinan ing kanakung turu at tatanggian yu ing kanakung iyaral. 26Inya mayli ku potang mika problema kayu; kaylian da kayu potang datangan na kayu ning kapahamakan, 27potang ing takut a anting bagyu sapulan na kayu, at tiupan ning angin ning kaligaligan; potang ing kaligaligan at tangis datang kekayu. 28Kanita maus kayu kanaku, oneng e ra kayu pakiramdaman; magkapilit kayung manintun kanaku, oneng e yu ku akit. 29Uling pikasaman yu ing kabiasnan; e kayu bitasang tatakut king Ginu, 30e kayu mekiramdam king kakung turu, at e yu pinsinan ing kakung iyaral. 31Inya ngeni, pupulan yu ing bunga na ning depat yu at ing mismung dapat yu ya ing munie kasakitan kekayu. 32Mate la ding taung alang beluan uling e ra buri ing kabiasnan, at mawala la ding taung alang isip uli na ning ala lang malasakit. 33Oneng ing makiramdam kanaku mika kapayapan ya ampon kapanatagan at e mitakutan.
Currently Selected:
Ding Kasebian 1: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
