Mateo 11

Ding Tubud nang Juan a Maminyag

(Lucas 7:18-35)

1Inyang ayari nang Jesus ing pamanuru na karing labing aduang alagad, meko ya ketang lugal a ita ban turu at manaral karing balen a malapit karin.

2Inyang atyu king sukulan i Juan a Maminyag, abalitan na ing daraptan nang Cristo. Mitubud yang mapilan karing alagad na at pepapuntan na la kang Jesus. 3Ngarang kinutang kang Jesus, Sabian yu na mo kekami nung ikayu itang datang a amanuan nang Juan o kailangan ke pang manayang aliwa?

4Nganang mekibat Jesus, Magbalik na kayu at sabian yu kang Juan ing kekayung daramdaman at akakit: 5#Isa 35:5, 6; Isa 61:1.manakit la ding bulag, makalakad la ding pile, kakayap la ding leprosuan, makaramdam la ding maklak, susubli lang mie ding mete, at mipanaral ya ing Mayap a Balita karing kalulu. 6Mapalad ya ing taung e magduda kanaku!

7Kalako da ring alagad nang Juan, migsalita ya i Jesus karing tau tungkul kang Juan. Ngana, Kanitang minta kayu kang Juan king disyerto, nanu ing panenayan yung akit? Ing metung a timbung babayutuk na ning angin? 8Nanu ing liwalan yung alben? Ing metung a taung makaimalan masanting? Ding taung pakaimalan masanting karing palasyu la mu mayayakit! 9Inya sabian yu kanaku, nanu pin ing buri yung akit? Ing metung a propeta? Wa, sasabian ku kekayu, maygit ya pa king metung a propeta ing ikit yu. 10#Mal 3:1.Uling i Juan ya itang sasabian na ning kasulatan: Oyan ing tubud ku, ngana ning Dios, itubud keng makapauna keka ba nang isadia ing dalanan mu. 11Sasabian ku kekayu, karing sablang taung linto keti king yatu,#11:11 King Griego: Karing sablang penganak da ring babai. ala pang linto lalung marangal kesa kang Juan. Makanyan man, ing pekamababang tau king Kayarian ning Banua maygit ya karangal kesa kang Juan. 12#Lc 16:16.Manibat na kanitang menaral ya i Juan a Maminyag angga na ngeni, ing Kayarian ning Banua e re patugutan ding taung e mayap a lub at sasamsaman deng sapilitan. 13Uling ding sablang propeta at ing Kautusan migsalita la angga mu king panaun nang Juan. 14#Mal 4:5; Mt 17:10-13; Mc 9:11-13.At nung buri yung paniwalan ing sinabi ra, i Juan ya ing Elias a mipangakung datang. 15Makiramdam kayu nung atin kayung balugbug!

16Ngeni, kaninu ku la apakilupa ding tau king kasalukuyan? Mengari la karing anak a pakalukluk king plasa. Ngana ning metung a grupu karing kayabe ra, 17Menigtigan ke para kekayu, oneng e kayu tinerak. Migkanta keng malungkut, oneng e kayu kiniak. 18Dinatang ya i Juan, mig-ayunu ya, at e mininum alak, at sinabi da ring tau, Maki demonyu ya! 19Dinatang ya ing Anak ning Tau, mamangan ya at miminum, at ngara namang sinabi, Lawen ye ing taung matako at lasenggo! Makipagbarkada ya karing talapanyingil buis at karing makasalanan! Makanyan man, mipatunayan ing kabiasnan na ning Dios king kapamilatan na ning bubunga na.

Ding Balen a E Bisang Maniwala

(Lucas 10:13-15)

20Kaybat na nita, pegumpisan na lang peniabianan Jesus ding balen a diptananan na karing keraklan karing depat nang milagru, uling e la bisang sumisi at painggulut ding tau karin karing kasalanan da. 21#Isa 23:1-18; Eze 26:1—28:26; Joel 3:4-8; Amos 1:9, 10; Zac 9:2-4.Ngana, Makalunus ka, Corazin! Makalunus ka Betsaida! Uling nung king Tiro at king Sidon karin la merapat ding milagrung merapat kekayu, malambat na la sanang mimalan a magaspang at memuntuk abu ding tau karin ban ipakilala ra ing karelang pamanisi. 22Sasabian ku kekayu, lalung maragul ing parusang miras kekayu king Aldo ning Pamanukum kesa karing tau ning Tiro at Sidon! 23#Isa 14:13-15; Gen 19:24-28.At ika naman Capernaum, buri mung itas angga banua ing sarili mo? Misaldak ka angga king kalalalaman na ning impierno! Nung ding milagru a merapat keka king Sodoma la mu merapat, angga ngeni sana atyu pa! 24#Mt 10:15; Lc 10:12.Inya miparusan kang lalung mabayat kesa king Sodoma king Aldo ning Pamanukum!

Lumapit kayu Kanaku at Mirinan kayung Kapaynawan

(Lucas 10:21-22)

25King oras a ita nganang migsalitang Jesus, Ibpa, Ginu na ning banua at yatu! Pasalamatan da ka uling pepakilala mu karing taung musmus#11:25 King Griego: Karing bingut. ing e mu pepakilala karing mangabiasa at maisip. 26Wa, Ibpa, uling iti ya ing sarili mung tula at kaburian.

27 # Jn 3:35; Jn 1:18; 10:15. Ing sabla binie na kanaku ning Ibpa ku at alang makakilala king Anak nune mu ing Ibpa, at alang makakilala king Ibpa nune mu ing Anak at detang birian nang makakilala keya ning Anak.

28 # Sir 6:24-30; 24:19; 51:23-26. Lumapit kayu kanaku, ikayung sablang mapagal na at kababayatnan at dinan da kayung kapaynawan. 29#Jer 6:16.Pusanan ye ing paud ku at magaral kayu kanaku uling mamu ku at mababa lub, at manakit kayung kapaynawan. 30Mayan yang idala ing paud ku at e mabayat ing papusan ku kekayu.

Currently Selected:

Mateo 11: PmPV

Highlight

Copy