Hebreo 12

Ibpa Ta Ya ing Dios

1Ngening mipadurutan tamu kareting dakal a testigu, sukat tamung ilako ing nanumang maging sagabal, lalung-lalu na ing kasalanan a pipigil kekatamu. Kayabe na ning maragul a kapibabatan manatili tamung mabilis a pulayi king ligligan a arapan tamu. 2E ta la lalako ding mata tamu kang Jesus uling keya megumpisa at migaganap ing kekatamung kasalpantayanan. E ya pepaisira lub i Jesus uli na ning krus! Nune, uli na ning tulang makapanaya keya pibata na ing kamarinayan a mate ya king krus. At ngeni atyu makalukluk king banda nang wanan ning tronu na ning Dios.

3Isipan yu na mu itang delanan na nung makananu nang pibata ing pamaglaban da ring taung makasalanan! Inya e yu painan ing lub yu at e kayu tutuknang. 4Uling king pamakilaban yu king kasalanan angga ngeni e yu pa keilanganan ing patulu kayung daya. 5#Job 5:17; Kas 3:11, 12.Akalinguan yu ne wari itang amanung babie sikanan lub a sabian na ning Dios kekayu bilang anak na?

Anak ko, e mu gagawan alang ulaga nung wari't ing Ginu itutulid na ing kamalian mu;

e ka paisira lub nung sasabianan na ka.

6Uling didisiplinahan na la ning Ginu ding sablang kaluguran na,

at babarugan na la ding sablang kikilalanan nang anak na.

7Nanuman ing kasakitan a daralanan yu, ibilang yung anting pamamarusa na ning metung a tata, uling ding kasakitan yu pakilala ra king tuturing na kayung tune nang anak ning Dios. Atin waring anak e na bitasang dinisiplina ning tata na? 8Nung e na kayu didisiplinan antimo ing daraptan na karing sabla nang anak, mangabaldugan king e na kayu tune anak, nune anak kayu king lual. 9Bukud pa kanyan, ding tata tamu king laman didisiplinan da katamu, at uli na nian igagalang ta la. E wari lalung matulid ing pasakup tamu king Dios a Ibpa tamu king espiritu ba tamung mie? 10Didisiplinan da katamu ding kekatamung pengari, ketang isipan dang ustu at iti king saguli mung penandit karin da daraptan. Oneng didisiplinan na katamu ning Dios para king ikakayap tamu ban maging banal tamung kalupa na. 11Neng daralan tamung kasakitan, ketang oras a ita, wa, tutung maplas at e pibuburian; oneng kalabas na, ding mirasnan king anti kanitang disiplina miririnan lang kapayapan at mikakalisyun la.

Ding Panabilin at Babala

12 # Isa 35:3. Inya itas yu la ding gamat yung mangalambut at pasiknangan yu la ding tud yung mangaina!#12:12 O kaya: itulid yu ing katawan yung mangasayukut at pipamisan yu ing sikanan yung makatagan pa. 13#Kas 4:26.Isulung yu ing kekayung paglakad karing gasgas a matulid ban e ya mabalda ing bitis yung mepile, nune lakuas yang kumayap.

14Magparati kayung makiutus mayap karing sablang tau at magkapilit kayung mibiebie banal, uling nung alang kabanalan e ya akit ing Ginu. 15#Deut 29:18.Ingatan yu king ing ninuman e ya mangalinguan king lugud na ning Dios. Ingatan yung ing ninuman kekayu e ya maging kalupa na ning tanaman a makalasun a tutubu, at makasakit karing sablang darasnan na.#12:15 King Griego: Mingat kayu pota atin sibut a wakat a mapait libutad yu at munie kaligaligan at makapanawa karing dakal. 16#Gen 25:29-34.Ingatan yu naman king ing ninuman kekayu e ya makipangalugud o payalan na lang ulaga ding bage espiritual, antimo i Esau, king metung a pinggan a pamangan, pekilibe na ing karapatan na bilang pangane. 17#Gen 27:30-40.Balu yu king kaybat, inawad na kang tata na king ibie na ing bendisyun na bilang tata. Oneng mipagkait keya iti uling e na na abalikan pa ing depat na agyang numanu ya pang tumangis.

18 # Exo 19:16-22; 20:18-21; Deut 4:11, 12; 5:22-27. E na kayu man miras, antimo ing pangaras da ring Israelita, king Bunduk ning Sinai nung nukarin ating aping mitatau, maragul a karalumduman at angin a masikan, 19matning tiup ning trumpeta at siwalang magsalita. Kanitang dimdam de ring Israelita ing siwalang ita, mekisabi lang mayap king e na la sa damdam metung pang amanu na, 20#Exo 19:12, 13.uling e ra agyung kargahan ing kautusan a ngana, Ninuman ing tuklu king bunduk, agyang metung yang animal, basibasan ya angga king mate ya. 21#Deut 9:19.Tune makapangilabut itang karelang ikit, inya pati na i Moises asabi na, Gagalgal ku king takut!

22Oneng ikayu ikua yung miras king Bunduk ning Zion, at king siudad ning Dios a mabie, ing maligayang Jerusalem, kayabe da ring e mabilang-bilang a anghel na. 23Miras kayu king masaya rang pamitipun#12:23 O kaya: karing anghel a masayang pesitipun at king pamitipun da ring bibilang nang pangane. ding bibilang nang pangane ning Dios a makasulat a lagyu karin banua. Miras kayu king Dios a ukum da ring sablang tau, at miras kayu karing espiritu da ring taung banal a ganap nang mipabanalan. 24#Gen 4:10.Miras kayu kang Jesus a mitatag king bayung kasunduan, at miras kayu king dayang mipisik a mangakung mas mayap a bage maygit ketang daya nang Abel.

25 # Exo 20:22. Inya mingat kayu at e kayu tatangging makiramdam king migsalita. Nung detang e mebisang makiramdam king migsalita karela e la miligtas king parusa, e kasi lalu ta nang e miligtas, nung e tamu makiramdam king magsalitang ibat karin banua! 26#Hag 2:6.Ing siwala na pepagalgalan ne ing yatu king panaun a ita, oneng ngeni ipangaku na, Pagalgalan keng pasibayu e mu ing yatu nune pati na ing banua. 27Ing amanung pasibayu malino nang pakilala king maugun la ding bage lelangan at midayu ban detang e maugun mitagan la.

28Inya pasalamat tamu king Dios uling tinanggap tamung metung a kayarian a e maugun. Pasalamatan ta ya at samban ing Dios a kayabe ing kagalangan at takut; king paralan a tutung makaibie tula keya 29#Deut 4:24.uling ing kekatamung Dios anti ya king aping manyilab.

Currently Selected:

Hebreo 12: PmPV

Highlight

Copy

Compare