Ezra 4
4
Ding Tutul king Pangalarin ning Templo
1Abalitan da ring kalaban#4:1 Ngana wari: ding memalen ning Samaria. ding memalen na ning Juda at Benjamin king ding miyugse a mekapagbalik na lalarinan de ing Templo ning Ginu, ing Dios ning Israel. 2#2 Ari 17:24-41.Pintalan de i Zerubabel at ding pamuntuk da ring pamilya at ngara karela, Saupan da kayung mitalakad king Templo uling sasamban mi ya naman ing Dios a kekayung sasamban at miyayain ain manibat na inyang dela na kami keti ning Aring Esarhadon ning Asiria.
3Ngarang mekibat di Zerubabel, Jesua, at ding aliwang pamuntuk da ring pamilya ning Israel, Ala kayung pangataid king Templong tatalakad mi para king kekaming Dios. Agyu mi yang italakad iting Templo para king Ginu, ing Dios ning Israel, agpang king inutus na kekami ning Aring Ciro ning Persia.
4Kanita ginawa lang paralan ding taung manuknangan karin ban siran la lub at pamatakutan ding Judio ban e re isundung pagobran ing Templo. 5Sihulan da la ring pamuntuk na ning kapamahalan ning Persia ban kimut laban karela. Megumpisa iti king panaun nang Aring Ciro angga na inyang ari ne i Dario.
Ding Tutul king Pangalarin ning Jerusalem
6 # Esg 1:1. King pamagumpisa na ning kapamahalan nang Aring Asueru, mindalum la ring memalen ning lugal a ita laban karing tau Juda at Jerusalem.
7Makanyan munaman ing depat da inyang panaun nang Aring Artaxerxes. Ding mindalum karela ila di Bislam, Mitredat, Tabel, at ding aliwa da pang kayabe. Sinulat de ing dalum da king salitang Aramaico, oneng linikas de iting sulat ban aintindian ne ning mamasa.#4:7 Digdag ne ning Hebreong kasulatan ing amanung Aramaico ban ipalto king ing 4:8-6 misulat la king Aramaico. Ing aliwa pang interpretasyun ya iti: king misulat ya king alpabetung Aramaico at inayus king salita o languahing Aramaico.
8Kanita i Rehum, ing gobernador, at i Simsai, ing kalihim na ning probinsia, sinulat lang laban king Jerusalem at peparala de iting sulat king Aring Artaxerxes. Ngana ning sulat:
9Ibat ya iting sulat kang Rehum, ing gobernador, at kang Simsai, ing kalihim, karing kayabe ra, karing ukum, at karing aliwa pang pamuntuk a tune tau Erec, Babilonia, at Susa ning bansang Elam,
10kayabe da ring aliwa pang tau a linipat at pepanuknanganan na ning marangal at mayupayang Osnapar karing siudad ning Samaria at karing miyayaliwa na pang sakup ning probinsia dane Albugan ning Ilug ning Eufrates.
11Iti ya ing sasabian na ning sulat:
Kang Aring Artaxerxes Ibat ya iting sulat karing talasuyu yu king dane Albugan ning Ilug ning Eufrates.
12Buri mi pung abalu yu, Kagalang-galang a Ari, king ding Judiong dinatang keni kekami a ibat karing miyayaliwa yung sakup a kayarian menuknangan la Jerusalem at tatalakad deng pasibayu iting e mayap at rebelding#4:12 O kaya: mapag-alsa. siudad. Pegumpisan da na la pung telakad ding pader ning siudad at e magluat mayari na la.
13Kagalang-galang a Ari, buri mi pung ausan ing pansin yu, uling nung pasibayu ya pung mitalakad iting siudad at ding pader na, tuknang na la pung mamayad buis ding tau at mina ya panakitan ing kayarian yu.
14Mangabiayan kami uli na ning pangataid mi kekayu, inya karapatdapat ing pagmalasakitan da kayu uling e mi buring akit ing malapastangan kayu. Iti pu ing sangkan ning pamaniulat mi.
15Uli na pu nian, mumungkahi mi pu ing pasaliksik yu la ding kasulatan a sinikap da ring makatua yu at abalu yu king manibat na kanita pang minunang panaun rebeldi ya iting siudad at sakit deng buntuk ding ari at ding gobernador. Tutu la pung masakit pamahalan ding memalen na. Inya naman melasak ya iting siudad.
16Buri mi pung abalu yu, Kagalang-galang a Ari, nung malarin ya iting siudad at antimu rin ding pader na, milako kayu upaya keting probinsia dane Albugan ning Ilug ning Eufrates.
17Ngana ning pakibat a peparala na ning Ari:
Kang Rehum, ing gobernador, kang Simsai, ing kalihim, at karing kayabe rang manuknangan king Samaria at king aliwa nang lugal dane Albugan ning probinsia ning Eufrates: Kukomustan da kayu ngan.
18Malino yang binasa ra kanaku ing sulat a peparala yu kanaku.
19Inya minie kung utus ban siasatan iting bage, at meyakit pin king manibat na king kapupurmeruan rebeldi ya ing siudad ning Jerusalem, at sinalangsang ya karing meging ari na.
20Abalu ku munaman king mika aring mayupaya a sinakup keting siudad at mig-ari king mabilug a probinsia dane Albugan ning Ilug ning Eufrates. At memayad lang miyayaliwang buis ding memalen karela.
21Inya gawa kayung kautusan ban mituknang ing pangalarin na ning siudad ning Jerusalem kabang ala ku pang aliwang kautusan.
22Kimut na kayu ngeni mu rin bayu la makagawang nanumang kasiran king kayarian.
23Inyang abasa re iting sulat ning Aring Artaxerxes kang Rehum, Simsai at ding kayabe ra memalagua lang minta Jerusalem at pinuersa da lang tuknang magobra ding Judio king pamaglarin king siudad.
24 # Hag 1:1; Zac 1:1. Mituknang ing pamaglarin king Templo ning Ginu karin king Jerusalem. Alang bitasang megobra angga na king kadua nang banuang panga-aring Dario ning Persia.
Currently Selected:
Ezra 4: PmPV
Highlight
Copy
Compare
Share
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
