2 Macabeo 5
5
Ding Vision king Metung a Labanan
1King panaun a ita liban neng Antiocus a Kapat king kaduang besis ing Ehipto. 2Kilub ding apat apulung aldo ding tau Jerusalem manakit lang vision#5:2 O kaya: malikmata o tagimpan. king banua. Sundalus lang pakakabayu, pakabaluting gintu, at anti lang lulusub a ating tandus at espadang pakabagut karing karelang kaluban. 3Makahilera lang miyarapan laban king metung at metung, at mililiwas lang mipaglusub. Mikakaras la ding kalasag da, susulapo la ding tandus at paslu. Ding miyayaliwang baluti at ding gintung gani da ring kabayu kikislap la king aslag ning aldo. 4Menalangin ya ing metung at metung king siudad king maging masanting na la sanang tanda ding vision.
Lisuban neng Jason ing Jerusalem
5Inyang mikalat ing maling balita king mete ya i Antiocus, tinipun na lang Jason ding maygit a libung lalaki at bigla neng lisuban ing Jerusalem. Apaurung da la ring lalaking pakapuestu karing pader at king katataulian sekupan de ing siudad. Tinakas ya i Menelao king metung a kutang malapit king bunduk-bundukan ning Templo, 6samantalang i Jason at ding tauan na alang lunus da lang pete ding kalupa rang Judio. E na na abalak Jason king ing tagumpe laban karing sariling kabalen ya ing kasusukdulan a kabiguan. Lalawan na pa ing tagumpe na anting pamaniambut karing kalaban na at e pangasambut ding mismung kabalen na. 7E ne ikuang Jason ing mamuntukan king kapamahalan, at king katataulian ing e mayap nang tangka alang binie mayap nune mu kamarinayan at kamuran king sarili na, at mepilit yang tinakas pasibayu king bansa da ring Ammonita. 8Mete yang makalunus a kabilian. Pepasukul neng Aretas, ing pamuntuk da ring Arabo; linawe deng anting metung a kriminal at pikasaman de uling pigtaksilan na la ding mismung kabalen na; tatagalan ne ning metung at metung, inya mepilit yang sinalikut karing miyayaliwang balen. Katataulian, tinakas yang minta Ehipto ban karin manuknangan, 9at kaybat minta ya Grecia a magnasang manakit tuknangan libutad da ring tau Espartang ating kaugnayan karing Judio. King katataulian, ing taung meging sangkan ning pamanakas da ring dakal king sarili dang bansa, mete ya king bansang dayuan. 10Dakal lang tau ding pepapate na a e midinan oportunidad ikutkut da, oneng ngeni king kamatayan na ala mang migpaldas. Alang parangal at e ya mikutkut king siping ding makatua na.
Lisuban neng Antiocus ing Jerusalem
(1 Macabeo 1:20-63)
11Inyang miras kang Antiocus ing balita tungkul king Jerusalem, ing paniwalan na ya pin ing king ing mabilug a Judea mig-rebeldi ya, inya mimua yang anti ing metung a malyap a animal ning gubat. Likuan ne ing Ehipto at king ditak mung panaun sekupan ne ing Jerusalem. 12Inutus na karing tauan na king alang lunus yang paten ing balang asalubungan da at ing ninumang akit dang sasalikut karing bale ra. 13Pete da la ngan ding lalaki at babai ding kayanakan a lalaki at babai, at pati na ding bingut. 14Kaybat ning atlung aldo kewalan yang walung pulung libu katau ing Jerusalem: pete da la ring apat apulung libu king paglusub da at makanyan la munaman a bilang ding dela ra at pisaling ipus.
15E ya pa mu rin matula kaniti i Antiocus. E man tinakut linub king pekabanal a Templo king mabilug a yatu lalam nang pamanantabe Menelao, ing taksil king relihiun na ampon karing kabalen na. 16Karing marinat at palpikasala nang gamat tepus na lang Antiocus ding sagradung kasangkapan king pamanyamba at ding regalung binie da ring aliwang ari king ikaligaya na at ikarangal ning Templo. 17Tutu nang pagmaragul ing tagumpe na. E na aintindian king peintulut na ning Ginu ing midinatan ya ing sagradu nang Templo uli na ning kasalanan da ring tau Jerusalem a pansamantalang pepamua king Ginu. 18Nung e mu ing dakal dang kasalanan a arapat ding tau Jerusalem, agad-agad ne sanang perusan i Antiocus bayu na agawa ing kalapastanganan a gewa na. Dapat sana milyari king bie na ing milyari kang Heliodoro, ing tinubud ning Aring Seleuco a maniasat king pisisinupan bandi. 19Oneng e na la pinili ning Ginu ding memalen na alang-alang king Templo; telakad ne ing Templo alang-alang karing memalen na. 20Inya karame ya ing Templo king kasakitan a miras karing tau, at kaybat karame ya naman king kanawan da ring memalen. Gilutan ne ning Ginu inyang mimua ya oneng binalik na ing sadia nang ligaya inyang mepawi na ing mua na.
Ing Metung pang Pamaglusub Laban king Jerusalem
21Kinua na lang Antiocus at dela Antiokia ding dinalan atlung pulu't limang libung librang pilak. King kapalaluan na paniwalan na king apapaglayag na la ding barku king mamala at apalakaran na la ding tau babo ning dagat. 22Tilduan na la ding gobernador ban supilan da la ring Hebreo: king Jerusalem i Felipe, tau yang ibat Frigia, maygit ya pang e mayap kang Antiocus, 23binili ne i Andronico king Bunduk ning Gerizim. Subali pa kareti, inabe ne pa i Menelao a mas mabagsik pa karing kalupa nang Judio kesa karing gobernador. Makanyan ing sukal nang lub Antiocus karing Judio 24inya peparala yang aduang pulu't aduang libung upahan a sundalus a ibat Misia king Jerusalem lalam nang pamanimunang Apolonio, at makapanabilin king paten la ding lalaking atyu na king idad at ipisali ding babai at kayanakan a lalaki anting ipus. 25Inyang datang ya i Apolonio king Jerusalem, pepakilala na ing tau yang payapa. Penaya ne ing banal a Aldo ning Sabbath at inyang akit nang pangilagan da ring Judio ing pamagobra, inutus na ing magparada la ding sundalus na lual ning siudad. 26Pepapate na la ding sablang linual manalbe king parada at kaybat mabilis lang linub king siudad at pete da la ring tutung dakal a tau.
27Oneng mekatakas ya i Judas Macabeo at atin pang manga siam a katau king maka ilang a lugal ning bunduk nung nu la mibiebie anting malyap a animal. Ban e la midinatan, ing bukud mung pengan da ila ding tanaman a ikit dang tutubu karin.
Currently Selected:
2 Macabeo 5: PmPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994