YouVersion Logo
Search Icon

2 Macabeo 13

13
Pete re i Menelao
1King banuang dinalan apat apulu at siam#13:1 BANUANG DINALAN APAT APULU AT SIAM: ya naman ing 163 B.C. miras ing balita kang Judas at karing tauan na king i Antiocus Eupator at ding dakal a sundalus daratang lang laban king Judea. 2Kayabe ne i Lisias, ing talaingat ning anak a ari at pekapun ning kapamahalan na. Kayabe na la ding dinalan apulung libung sundalung Griego, at ding limang libu atlung dalan a sundalung pakakabayu, ding aduang pulu at aduang elepante, at atlung dalan a karung panggera a maki pataram karing gulung da.
3Mekiabe ya karela i Menelao at sibung ne pa i Antiocus, e uli ning atin yang malasakit king bansa, nune uli na ning kapagnasan nang manatili ya king katungkulan na. 4Oneng ing Dios, ing Ari ding ari, pepamua ne i Antiocus laban kang Menelao. Pepakilala nang Lisias kang Antiocus king iting kriminal ya ing penibatan na ning sabla nang kaguluan Antiocus, inya inutus na ing idala re i Menelao king siudad ning Berea at paten de ketang paralan dang pamakamate karin. 5Ating tore karin Berea a pitung pulu at limang talampakan king katas. Mitmu yang abu at makapadurut kilub na ya ing metung a platapormang padagusgus king abu. 6Darala da la karin ding taung meyakit mikasala laban karing kikilalanan dang dios o ing ninumang maki maragul a kasalanan, at babaldug de karin ba yang mate. 7Makanyan deng pete i Menelao a e ra dininan mang pamikatagun mikutkut, at iti ing mangaintulid kang Menelao. 8Maralas ing e na ginalang ing sagradung abu ning api king altar, at ngeni mete ya kapamilatan na ning abu.
Ing Labanan Malapit king Siudad ning Modein
9Dinatang ya ing ari at atyu king pamisip na ing katampalasanan karing Judio a maygit pa king pepagpa nang tata na. 10Inyang abalitan nang Judas iti inutus na karing memalen king manalangin la aldo at bengi king Ginu, at manalangin king datang ya sanang sumaup uling ating panganib a mawala ya ing karelang Kautusan, ing bansa, at ing Templo ra. 11At e na ipaintulut king ila, nung kapilan la pa meging malaya, ing mabaldug la karing alang Dios a paganu. 12Memintu la ngan king utus na. Atlung aldo lang alang tuknang manalangin king karelang malunusan a Dios; menangis la, mig-ayunu la, at migsakab la. Kaybat pekisabian na lang Judas at pepasiknangan a lub, at inawad na karela king magsadia la king pamakilaban.
13Kaybat nang mekipagpulung karing makatua tungkul king labanan inari na na king lub nang Judas ing e na no panayan ding sundalus ning ari ban lumusub king Judea at sakupan ing Jerusalem, nune king saup ning Dios lage na la at labanan ing ari. 14Penibala na king gamat ning Miglalang king yatu ing kaulian ning labanan. Penabilinan na lang makilaban ding sundalus na king mitmung tapang angga king kamatayan para king Kautusan, king Templo, king Jerusalem, king bansa, at king kaugalian ning pamibiebie ra. 15Migkampu la lele ning siudad ning Modein at binie ne ing senias ning pamakilaban inyang ikulisak na, Manibat king Dios ing tagumpe. Itang benging ita, linusub la ding mepiling matapang dili karing sundalus na; lisuban de ing lugal a malapit king tolda ning ari at pete da la ring ating aduang libung lalaki. Pete re king saksak ing elepanting manimuna at ing magbante na. 16Inyang meko yang matagumpe i Judas at ding tauan na likuan da lang mengatakutan at mengataranta ding sabla king kampu. 17Bayu mesala yari na ngan ing sabla king saup na at pamagdipensa ning Ginu.
Ginawa yang Pamakikasundu i Antiocus a Kalima karing Judio
(1 Macabeo 6:48-63)
18Inyang ikit nang Aring Antiocus ing tepangan da ring Judio inisip na king kailangan yang gawang aliwang mas masanting a paralan ban sambutan na la karing masanting dang kabilian. 19Lisuban ne ing Betzur, ing metung karing matibe dang kuta, oneng ulit-ulit lang mumurung angga king katataulian a mesambut la. 20Peparala nang Judas karing sundalung magdipensa king kuta ing kagamitan a kailangan da, 21oneng ing metung a Judiong sundalus a milagyuan Rodoco minie yang lihim a bage karing kalaban. Mebalu iti at ikua reng arakap at pete re. 22King kaduang besis ginawa yang planu ing ari para makikasundu karing memalen ning Betzur, at inyang mikasundu la, inurung na la ding sundalus na. Kanita lisuban ne i Judas oneng pasibayu yang mesambut. 23Samantala, tinanggap yang balita king i Felipe a likuan na Antiokia ban mamahala king gobiernu mig-rebeldi ya. E na na balu ing daptan ning ari inya pepayaus na la ding Judio, tinggap na ing inawad da; sinumpa yang igalang na ing sablang katuliran da, at kaybat na niting pamikasundu ra minain yang ain-sakripisyu. Minie yang regalu king santuaryu bilang pamanggalang king Templo, 24at matula neng tinggap i Judas Macabeo. Likuan ne i Hegemonides antimong gobernador ning lugal manibat Tolemaida angga king Gerar, 25at ya mismu minta ya Tolemaida. Mua la ding memalen uli na ning pamakikasundu a gewa na karing Judio at king mua ra buri deng payalang ulaga. 26Migsalita ya karing tau i Lisias ban king anggang agyu na pagdipensa ne ing kasunduan. Ikua na la kapanamdaman ding tau; apatahimik na la at uling ikua na na ing kasaupan da meko neng minta king Antiokia.
Makanyan ing milyari king pamaglusub at pamanurung nang Aring Antiocus.

Currently Selected:

2 Macabeo 13: PmPV

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy