2 Macabeo 11
11
Simbut neng Judas Macabeo i Lisias
(1 Macabeo 4:26-35)
1E meluat kaybat nang mesambut Timoteo, abalitan nang Lisias, ing guardia at kamaganak ning ari at manibala king kapamahalan ning balen, ing milyari. Mimua ya at 2penimunan na la ding walung pulung libung sundalus at ding sabla nang sundalus a pakakabayu laban karing Judio. Binalak na ing gawan neng siudad da ring Griego ing Jerusalem. 3Kalupa da ring pisasamban da ring paganu kailangan ya namang mamayad buis ing Templo at isubasta ya balang banua ing katungkulan ning Pekapun ding Pari. 4Bina yang metula i Lisias karing laksa-laksa nang sundalus, karing libu-libu nang sundalus a pakakabayu, at ding walung pulung elepante na. Inya e na na apakibalak ing upaya na ning Ginu. 5Liban ne ing Judea at lisuban ing kuta ning Betzur; manga atlung pulu at aduang kilometru ya king dane mauli ning Jerusalem.
6Inyang abalitan nang Judas at ding tauan na king kukubkuban na neng Lisias ing karelang kuta, kiniak la ding sablang memalen at tinulu luang meniawad saup king Ginu king parala yang mayap a anghel ban magligtas karela. 7Minuna yang diling kinangwang armas i Judas at inawad na karing aliwa ing makiabe lang itaya ing bie ra ban saupan da la ring kalupa rang Judio. Inya memalagua yang linage ing metung at metung ban sumaup. 8E la pa binang mirayu king Jerusalem inyang linto yang mumuna karela ing metung a makakabayung makaimalan maputi at maki gintung armas. 9Kanita king metung mung siwala pepasalamatan de ing mapaglunus dang Dios. Tutu rang penamdaman king matapang la at malyari da lang lusuban e mu ding tau nune agyang pang ding mabangis a animal at pati na pader a bakal. 10Dinatang lang paka-armas; kayabe de itang king lunus ning Ginu tinubud nang makilaban king panig da. 11Kaybat, anti lang leon sinugud karing kalaban; pete da la ring labing metung a libung sundalus at libu anam a ralan a sundalung pakakabayu, at mepilitan lang memulayi ding aliwa ba lang miligtas. 12Sugatan la ding keraklan karing memulayi at mewala la armas. Ikua nang mitakas Lisias uling milayi yang anting metung a mataloti.
Mekikasundu yang mika Kapayapan i Lisias karing Judio
(1 Macabeo 6:56-61)
13E ne man mangmang i Lisias. Kabang pibulebulayan na ing pangasambut na akilala na king inya e na la sambutan ding Judio uling sasaupan na la ning Dios. Inya peparala yang mensahi karing Judio 14a managkat karela king mika metung la sanang makatuliran a pamikasundu layun mangakung agkatan ne pa ing ari ban makikaluguran ya karela. 15King kapakanan ding memalen, tenguanan na lang Judas Macabeo ding sablang mungkahi#11:15 O kaya: munikala. nang Lisias, uling tinggap na la ning ari ding sablang mungkahing ibat king panig da ring Judio a pepayabut nang Judas Macabeo kang Lisias.
Ing Sulat nang Lisias karing Judio
16Oyni ing kopia ning sulat nang Lisias karing Judio:
I Lisias karing memalen Judio, komusta kayu?
17Binie de kanaku ding pekakatawan yung i Juan at i Absalom ing dokumentung peparala yu kanaku at inawad da kanaku king tanguanan ku ing makasulat karin.
18Pepabalu ku king ari ing nanumang bage a sukat nang abalu at binie ku ing nanumang atyu king upaya ku.
19Inya nung papanatilian yu ing mayap yung pilubluban king kayarian, pagkapilitan kung sikasuan ing kekayung kapakanan para king daratang a panaun. 20Inutusan ku la ding pekakatawan yu at ding kanaku ban abalu yu ing sablang bage.
21Mipala kayu sana. Misulat ya iti king kaduang pulu at apat a aldo ning bulan ning Dioscorintio ning banuang dinalan apat apulu at walu.#11:21 BANUANG DINALAN APAT APULU AT WALU: ya naman ing banuang 164 B.C.
Ing Sulat ning Ari kang Lisias
22Oyni ing kopia ning sulat ning Ari:
Ing Aring Antiocus king kakamal-kamalan a Lisias, komusta ka?
23Ngening meko neng mekiabe karing dios i tatang ku, buri ku king ding atyu lalam ning kakung kayarian panimunan da ing sarili rang pamamalakad king bie ra a alang mangabala karela.
24Abalitan mi king e ra atanggap ding Judio ing ugali da ring Griego antimo sana ing pagnasan nang tatang ku, oneng pinili ra ing sarili dang palakad keng bie at inawad da pa ing mipaintulutan lang tuki karing sarili dang kautusan.
25Inya pinili mi king ing bansang iti kalupa da ring aliwa lakuan da lang alang mangabala karela, at yuyutus ku king isubli ya karela ing karelang Templo at mipaintulutan lang mibiebie agpang karing penugalian da ring karelang makatua.
26Sana ipabalu mu karela ing bage at tanguanan mu. Ngeni balu da na ing kapagnasan tamu; mie na lang panatag at king katahimikan at pamahalan da ing sarili rang pamibiebie.
27Oyni ing kopia ning sulat ning ari karing memalen Judio:
Ing Aring Antiocus karing manimuna at karing Judio, komusta kayu?
28Pagnasan ku ing masalese ngan sana ing kabilian yu. Atyu ku king masanting a kabilian.
29Belita na kanakung Menelao ing kapagnasan yung magbalik karing pibalebale yu at lingunan ing sarili yung pamibiebie.
30Inya detang muli na kekayu bayu miras ing atlung pulu yang aldo ing bulan ning Xanticus asahan da ing ala lang pitatakutan pa.
31Isundu yu ing pamanupad yu karing kautusan yu tungkul king pamangan at aliwa pang kautusan, antimo ing sadia yung daraptan. Alang Judiong miparusan king nanumang kasalanan a e na sasarian.
32Tutubud ke i Menelao ban mika kapanatagan kayu.
33Mipala kayu sana. Misulat ya iti inyang kalabing limang aldo na ning bulan ning Xanticus ning banuang dinalan apat apulu at walu.
Ing Sulat da ring Tau Roma karing Judio
34Peparala ria naman ding tau Roma ing makatuking sulat karing Judio:
Ding pekakatawan da ring tau Roma, i Quinto Memio at i Tito Manio karing Judio, komusta kayu?
35Tatanguanan mi ing sablang binie na kekayung Lisias, ing kamaganak ning ari.
36Papunta na kami Antiokia kanini, inya pakisabi ming mayap ing siasatan yu lang masalese ding bage likuan na para ikonsulta yu king ari at kaybat itubud ye ing ninuman ban makagawa kaming makayakmang munikala.
37Inya mamirapal kayu sanang iparala ye ing tubud yu ba ming abalu ing kekayung pasya.
38Masalese ko ngan sana kabilian. Misulat ya iti inyang kalabing lima nang aldo ning bulan ning Xanticus ning banuang dinalan apat apulu at walu.
Currently Selected:
2 Macabeo 11: PmPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994