2 Ari 24

1 # Jer 25:1-38; Dan 1:1, 2. King panaun na ning pamag-ari nang Jeoiakim, lisuban neng Aring Nebucadenesar ning Babilonia ing Juda. Mipailalam ya king upaya na i Jeoiakim kilub ding atlung banua. Kaybat na nita, mig-rebeldi yang laban kang Aring Nebucadenesar. 2Mitubud yang lalaking pakasandata ing Ginu laban kang Jeoiakim. Menibatan la ding lalaki king Babilonia, king Siria, king Moab, at king Ammon. Mituburan la ban lasakan ya ing Juda, antimo ing sinabi na karing talasuyu nang propeta. 3Iti mepalyari king utus na ning Ginu ban itabi la king panimanman na ring memalen na ning Juda, uli da ring dakal a kasalanan a gewa nang Aring Manase, 4at uli da ring dakal a taung alang kasalanan a pepapate na. E ne apatawaran ning Ginu i Manase king gewa na.

5Makasulat king Istoria da ring Ari ning Juda ing heganaganang gewa nang Jeoiakim. 6Mete ya i Jeoiakim, at ing anak nang i Jeoiakin ya ing menalili bilang ari. 7E ne bitasang linual pa ing ari ning Ehipto, uling ing ari ning Babilonia ikua na na la ngan asakup ding lugal a sakup na ning ari ning Ehipto manibat king Batis ning Ehipto angga na king Ilug ning Eufrates.

Ing Aring Jeoiakin ning Juda

(2 Cronica 36:9-10)

8Labi yang walung banua i Jeoiakin inyang meging ari ya king Juda, at mig-ari ya king Jerusalem kilub da mu ring atlung bulan. I ima na ya i Neusta a anak nang Elnatan ning Jerusalem. 9Tikian na ing heganaganang e mayap a gewa nang tata na, inya mikasala ya king akakit na ning Ginu.

10King kapanaunan na kanita re lisuban ding sundalus nang Nebucadenesar ning Babilonia ing Jerusalem. 11Kabang lulusuban de, dinatang ya i Aring Nebucadenesar, 12#Jer 22:24-30; 24:1-10; 29:1, 2.at sinuku ya i Aring Jeoiakin at i ima na, ding anak nang lalaki, ding opisyal na, at ding talapamahala na king palasyu. King kawalung banua na ning pamag-ari na kanita ne binihag ning Aring Nebucadenesar, 13at dela na naman king Babilonia ing heganaganang pibandian na ning Templo ning Ginu at ning palasyu. Antimo ing asabi na na ning Ginu, pepalaso na lang Nebucadenesar ding gintung kasangkapan a pepagawa nang Aring Solomon para gamitan king Templo ning Ginu. 14Dela na la ngang Nebucadenesar ding bihag a memalen na ning Jerusalem, ding prinsipi, ding kalang-alangnan a tau; heganagana apulu lang libu. Tiki na la naman ding lalaking mangagaling a pangamat king obra at ding pande. Ala yang tigan nung e mu ding pakakalulu. 15#Eze 17:12.Dela ne Babilonia i Aring Jeoiakin, i ima na, ding asawa na, ding opisyal na, at ding manimuna ning bansa. 16Dela na la naman Babilonia ding pitung libung sundalus a bihag, at ding mangagaling a pangamat king obra, at ding pande a pawang mangasikan at malyaring ilaban king gera.

17 # Jer 37:1; Eze 17:13. I Matania, ing bapa nang Jeoiakin, ya ing gewa nang Nebucadenesar bilang ari ning Juda. Inalilan ne lagyu, at Zedekia ing binie nang lagyu.

Ing Aring Zedekia ning Juda

(2 Cronica 36:11-12; Jeremias 52:1-3a)

18 # Jer 27:1-22; 28:1-17. Adua yang pulu't metung a banua i Zedekia inyang meging ari ya king Juda, at mig-ari ya king Jerusalem kilub ding labing metung a banua. I ima na ya i Hamutal a anak nang Jeremias ning Libna. 19Tikian na ing e mayap nang gewang Aring Jeoiakim, inya mikasala ya king akakit na ning Ginu. 20#Eze 17:15.Mimua yang e mu nanu ing Ginu karing memalen na ning Jerusalem at Juda, inya tinabi na la king akakit na.

Currently Selected:

2 Ari 24: PmPV

Highlight

Copy

Compare