2 Corinto 6
6
1Anti na ning kayabe kami king obra na ning Dios, ipakisabi ming mayap kekayu king e yu sa payalan kabaldugan ing grasya a tinggap yu keya. 2#Isa 49:8.Uling ing Dios sasabian na,
Pekiramdaman da ka king oras a karapatdapat kaku,
sinaupan da ka king aldo ning kaligtasan.
Makiramdam kayu! Ngeni na ing oras a karapatdapat. Ngeni na ing aldo ning kaligtasan!
3Pangilagan mi ing makarapat nanumang bage makatakid kenu man ban ala lang asabi king kekaming kasuyuan. 4Nune king heganaganang bage pepakilala mi king talasuyu na kami ning Dios king kapamilatan na ning pamibabata mi king dakal a kasakitan, kalungkutan, at kalipitan. 5#Dapat 16:23.Perusan#6:5 King Griego: pematbat. da kami, sinukul, at pemugbug; megobra kami aldo at bengi, at sinala king pamanudtud at pamangan. 6Pepakilala mi king talasuyu na kami ning Dios king kapamilatan na ning malinis a pamibiebie, kabiasnan, kapibabatan at ganaka; antimu rin king kapamilatan na ning Banal a Espiritu at ning tapat ming lugud, 7king tapat a pamagsalita king katutuan, at king upaya na ning Dios. Ing katuliran ya ing kekaming armas a paglaban at paniagka. 8Ngara na kaming parangalan at ngara na kaming panyiran; ngara na kaming insultuan, ngara na kaming pamurian. Inaus da kaming malaram agyamang maniabi kaming katutuan. 9Tinuring da kaming e ra kakilala agyamang kakilala da kami; halus mangamate na, oneng masikan ke pang masikan. Agyamang perusan da kami, e kami mete; 10agyamang maragul ing kalungkutan, parati keng masaya; lupa keng pakakalulu, oneng seupan mi lang misalapi ding dakal; balamu mo ala kaming nanumang pibandian, oneng atyu ngan kekami ing sabla.
11Kakaluguran a tau Corinto, tapatan ing pamagsalita mi kekayu. Nung nanu ing atyu king lub mi ya ing sasabian mi. 12E mi ya sasara ing pusu mi kekayu; ikayu ding misara karing pusu yu kekami. 13Magsalita ku kekayu ngeni antimong tata yu; ibuklat yu la ding pusu yu kanaku, nung makananu keng biklat kekayu ing pusu ku.
Ing Babala Laban king Agkat da ring E Maniwala
14E kayu makiabe karing e talasalpantaya. Malyari waring miyabe ing katuliran at ing dewakan? O kaya ing sala at ing dalumdum? 15Malyari la waring mikasundu i Cristo at ing diablo? Makananu yang maki-ugnayan ing sasalpantaya king e sasalpantaya? 16#1 Cor 3:16; 6:19; Lev 26:12; Eze 37:27.Makananu lang malyaring makapisanmetung ing Templo na ning Dios at ding idolo da ring paganu? Itamu ing templo na ning Dios a mabie! Ing Dios mismu ya ing sinabi,
Manuknangan ku at antabayanan ku la;
aku ing maging Dios da,
at ila ding maging memalen ku.
17 # Isa 52:11. Inya ing Ginu sinabi na,
Dumayu kayu karela,
kawani kayu karela.
E kayu tatagkil king nanumang marinat,
at aku tanggapan da kayu.
18 # 2 Sam 7:14; 1 Cro 17:13; Isa 43:6; Jer 31:9. Maging Ibpa yu ku,
at maging anak da kayu,
ngana ning Ginung Mayupayang tutu.
Currently Selected:
2 Corinto 6: PmPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
