1 Macabeo 8
8
Ing Pamakikasundu karing Romano
1Abalitan nang Judas ing gelingan da ring Romano king larangan ning pamakilaban at ing pamananggap da karetang bisang makikampi karela, at ayasahan da ring sablang mekiabe karela ing tapat nang pamakikaluguran ning Roma. 2Belita da la kang Judas ding gera a lebanan da ring Romano at ing tepangan a pepakit da laban karing tau Gaul a karelang simbut at ngeni mamayad buis karela. 3Belita da naman kang Judas ing tagumpe ra Espania inyang abihag da la ring minang pilak at gintung atyu karin. 4King kapamilatan na ning maingat a pamagplanu at kapibabatan simbut de ing mabilug a bansa agyamang marayu ya iti king Roma. Ikua da lang simbut ding ari karing mangalapit at mangangarayung lugal a linaban karela; makanyan karagul ing pangasambut da inya banuahan lang babayad buis ding miligtas. 5Lebanan de at simbut ing Aring Felipe at i Perseus ning Macedonia, at ding sablang linusub karela. 6Simbut dia naman ing Maulang Antiocus, ing ari ning Siria a linusub karelang maki dinalan aduang pulung elepante ampon sundalus a pakakabayu at pakakarwahe at ning metung a grupu da ring sundalus. 7Ikua reng mabie ing ari at inutus da at karing maging kayalili na ing mamayad lang maragul a banuahan a buis, king munie lang bihag anting prenda, 8at isuku ing India, ing Media, ing Lydia, at ding mapilan pang masanting dang probinsia. Kinua da la deti at binie da la king Aring Eumenes.
9Inyang tingka da ring Griego ing luban da la at paten, 10miras iti king kabaluan da ring Romano, at peparala de laban karing Griego ing metung a heneral laban karela. Lisuban da la at dakal la ding pete rang Griego; binihag da la ring asawa ra at anak, kinua ra ing bandi ra, sekupan de ing bansa da, lesakan ding kuta ra, at gewa da lang ipus, nung makananu la ngeni. 11Lesak da la naman o kaya binihag bilang ipus ding aliwang kayarian, pulu, at ding sablang linaban karela. 12Oneng meging tapat la karetang kakaluguran da at karing manalig karela. Makanyan da lang simbut ding ari king malapit at marayung lugal, at mangatakutan la ding sablang makabalita king kabantugan da. 13Detang buri dang maging ari, meging ari la, at ding buri dang idayu, deyu da la; mekilala lang maragul a upaya. 14Sumangid na ning sablang iti, ala metung mang Romano ing tinas na ing sarili na kapamilatan na ning pamiputung na king korona king buntuk na o pamisulud king balabal a muradu. 15Mitatag lang metung a senado at balang aldo atlu lang dalan at aduang pulu ding senador a mipupulung ban pane rang ukulan ing mayap at ing maayus nang lakad ning bie ding karaniwan a memalen. 16Balang banua mipanibala ya king metung a tau ing pamamahala king gobiernu at ing pamamahala karing sakup dang bansa. Mamintu la ngan keting taung iti at alang meyakit a pamangariria o pamangalalu karela.
17 # 2 Mac 4:11. Samantala, pinili neng Judas at tinubud Roma i Eupolemus, ing anak nang Juan at apu nang Accos, at i Jason a anak nang Eleazar, ban gawang pamakikaluguran at pamakikampi karing Romano. 18Gewa na iti ban milisia la king pamanalipusta, uling malino kareng Judio king ing kayarian ning Grecia gagawan neng mistulang ipus ing Israel. 19Kaybat ning makabang pamaglakbe ikua rang miras Roma at linub la king Senado. Ngarang migsalita karing makatipun: 20Tinubud na kaming Judas Macabeo, ding kapatad na, at ding memalen Judio ban gawang pamakikampi at pamakikasundu kekayu ba kaming makilalang kakampi yu at kakaluguran.
21Tinggap de ring Romano ing aluk 22#1 Mac 14:18.at ing makatuki ya ing kopia ning sulat a mitatak karing tinabas a tangsu at miparala Jerusalem ban manatili karin bilang tanda na niting pamikampi:
23Mananu na sanang manatili kabang-kaba ing mayap a kapalaran para karing Romano at karing Judio maging king mamala at king danuman! Mananu na sanang ala lang maging kalaban at ala lang akakalaban king gera!
24Nung munang datang ing gera king Roma o kaninu man karing bansang kakampi na,
25ing bansa da ring Judio, king mitmung kalausan a lub, sumaup ya agpang king aduan na ning situasyun.
26E ya dapat sumaup o babie pamangan, armas, salapi o barku karing kalaban ning Roma o karing kakampi na niti antimo ing mepikasundu king Roma. Tuparan da ring Judio ing katungkulan da a alang panenayan a kabayaran.
27Makanyan munaman, nung munang datang ing gera karing Judio, king mitmung kalausan a lub datang yang sumaup ing Roma, agpang king aduan na ning pamikatagun.
28At e ya dapat sumaup o munie pamangan, armas, salapi o barku antimo ing mepikasundu king Roma. Tuparan da ring Romano ing katungkulan da king alang pamaglinlang.
29Deting bage ila ding pikasunduan da ring Romano at ding Judio.
30Nung king daratang a panaun deting aduang panig apikasunduan da lang dagdagan o bawasan, dapat dang talakaran ing nanumang apikasunduan da; atin yang bisa ing nanumang digdag da o binawas da.
31Tungkul naman king e mayap a daraptan nang Aring Demetrio laban karing Judio, silatanan mi yang anti kaniti, Baket makanyan na kabagsik ing tratu mu karing Judiong kakaluguran mi at kakampi?
32Nung gawa la pang reklamu laban keka, kanita idipensa mi ing matulid da, at makigera kami laban keka king mamala at king danuman.
Currently Selected:
1 Macabeo 8: PmPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994