1 Macabeo 14
14
Ing Kapurian kang Simon
1King banuang dinalan pitung pulu at adua#14:1 BANUANG DINALAN PITUNG PULU AT ADUA: ya naman ing 140 B.C. tinipun na lang Aring Demetrio a Kadua ding sundalus na at minta ya Media ban kumang karagdagan a sundalus para king pamakilaban na kang Trifo. 2Inyang ing Aring Arsaces a Kanam ning Persia at Media abalitan na king linub ya i Demetrio king sakup na, tinubud ne ing metung karing pekapun na ban dakpan deng mabie. 3Lisuban ne ning pekapun at simbut ne i Demetrio. Arakap neng mabie at dela ne kang Arsaces at iti pepasukul ne.
4Payapa ya ing bansa ning Judea kabang mabie ya i Simon. King kekaban na ning pamanungkulan na, ginamit na ing upayang miyabie ban gawan na ing sablang mayap para karing memalen a sakup na, at metula la kang Simon bilang karelang pamuntuk. 5Kabilang karing tagumpe na ya pin ing simbut ne ing Jopa at gewa neng sadsaran papunta karing pulu da ring Griego sumangid ning dagat. 6Degul ne ing sakup ning bansa na at pemahalan neng mitmung kayupayan. 7Inuli na la ding dakal a bihag king labanan at simbut ne ing Gezer, Betzur, at ing kuta ning Jerusalem at leko na ing sablang makarinat. Ala metung man ing linaban kang Simon.
8Menasik la ding Judio libutad ning kapayapan at mika maragul la pupul at mamunga la ding tanaman. 9Pakalukluk la karing dalan ding makatua at pisasabian da ing pagmumulalan a bage a milyari karela, at pakapiblas lang sundalus ding kayanakan a lalaki. 10Dakal a pagkabie ing peparala nang Simon karing siudad at dininan na lang armas para idipensa ra ing sarili da. Meging pikabaluan ya angga na king wakas ning yatu. 11Binalik na ing kapayapan king bansa at mika maragul a tula king mabilug a Israel. 12Mibiebie la king kapayapan libutad da ring karelang ubasan at tanaman a higera at alang makapamatakut karela. 13Ila deta ring panaun inyang mewala la ding sablang kalaban king mabilug a bansa, at mesupil ya ing balang aring kalaban. 14Liningap na la ding kalulu; iningat na ing pangatupad ning Kautusan nang Moises at leko na la ding sablang e tutuntun karing kautusan at ding e mayap. 15Dininan neng bayung leguan ing Templo at digdag na la ding dakal a kasangkapan para king pamanyamba.
16Inyang miras king Roma at Esparta ing balita king pangamate nang Jonatan, dinatang karela ing maragul a lungkut. 17Oneng inyang abalitan da king i Simon a kapatad na ya ing meging kayalili na bilang Pekapun ding Pari at matatag ing pamamahala na king bansa, 18#1 Mac 8:22.tetak da karing tinabas a tangsu ing pamibayu na ning pamikaluguran da at pamikampi a tinatag da kanita karing kapatad nang i Judas at i Jonatan. 19Mebasa ya iti arap ning kapulungan karin Jerusalem. 20Ing makatuki kopia ne ning sulat a peparala da ring tau Esparta:
Ibat ya iting sulat karing pamuntuk at king siudad ning Esparta para king Pekapun ding Pari, i Simon, karing manimuna, karing pari, at karing sablang memalen a Judio. Kukomustan da kayu.
21Belita da kekami ding tinubud yu karing kekaming kabalen nung makananu da kang gagalangan at kikilalanan ding sabla. Minie maragul a tula kekami ing karelang pamandalo.
22Misulat ing mensahi ra karing libru da ring kapulungan pangmalda anti ing makatuki: Ding tubud da ring Judio, i Numenius a anak nang Antiocus, at i Antipater a anak nang Jason, delawan da kami ban ibayu ra ing kasunduan ning pamikaluguran da kekami.
23Apikayari na ning kapulungan malda ing tanggapan la deting tau king dangalan at mibili ya ing kopia ning mensahi ra karing pisisinupan kasulatan ning balen, ban mika permanenti lang piakitan ding tau Esparta. Miyabie ya ing kopia na niting dokumento kang Simon, ing Pekapun ding Pari.
24Kaybat na nita, tinubud neng Simon i Numenius king Roma a ating metung a regalung maragul a gintung kalasag a titimbang kapitnang tonelada bilang patutu king pamakimetung ding Judio karing tau Roma.
25Inyang abalitan da ring memalen na ning Israel ing sablang milyari ngarang kukutang king sarili ra, Makananu tamung ipakilala ing utang tamung lub kang Simon at karing anak na? 26Uling ya, ding kapatad na, at ing pamilya nang tata na menalakaran lang matatag, at lebanan da la ring kalaban ning Israel at pepanatilian da ing kalayaan#14:26 O kaya: katimawan. ning bansa.
27Uli na niti, mitatak ya king tinabas a tangsu ing metung a kasulatan at binili de king metung a monumento king Bunduk ning Zion. Ngana ning makatatak:
King kalabing walung aldo ning bulan ning Elul, king banuang dinalan pitung pulu at adua,#14:27 BANUANG DINALAN PITUNG PULU AT ADUA: ya naman ing 140 B.C. king katlung banua na ning katungkulan nang Simon bilang Pekapun ding Pari,
28karin king Asaramel, king metung a maragul a kapulungan da ring pari, ding memalen, ding mamuntukan, at ding makatua ning bansa, ing makatuking bage mipabalu kekami:
29Uli na ning maralas ing labanan keting bansa tamu, i Simon a anak nang Matatias, ing pari king pamilya nang Joarib, at ding kapatad na, sinubu ra ing bie ra king panganib at linaban la karing kalaban na ning karelang bansa ban manatili ya ing Templo at ing Kautusan, at minie lang maragul a ligaya king bansa.
30Pisanmetungan na lang Jonatan ding kabalen tamu at meging Pekapun de ring Pari bayu ya mete.
31Tingka da ring kalaban ding Judio ing luban de ing bansa at lusuban ampon dungisan ing Templo.
32Kanita menimuna ya i Simon at mekilaban ya para king bansa na. Ginastus yang maragul karing sarili nang salapi ban adinan na lang armas at sueldu ding sundalus ning bansa.
33Gewa na lang kuta ding balen ning Juda, lalu na ing Betzur a atyu king angganan nung nukarin la sadiang makadepositu ding armas ding kalaban. Mibili yang sundalus karin.
34Gewa neng kuta ing Jopa, ing sadsaran lele dagat, at ing siudad ning Gezer king angganan ning Asdod a sadiang sakup ding kalaban a sundalus. Mibili yang Judiong manuknangan karin at dininan na la king sablang kailangan da king pagkabie ra.
35Inyang akilala da ring memalen ing lugud nang Simon king bansa ra at nung makananu neng buring dinan dangalan iti, gewa reng manimuna at Pekapun ding Pari. Gewa ra iti bilang pamangilala king sablang depat na, ing panga makatuliran na, ing katapatan na king bansa na, at uli na ning ala nang kupas a pamamagmalasakit ban sumulung ing dangalan ning bansa na.
36Meging matagumpe ya king pamanimuna na. Mitabi la king bansa da ring paganu, at antimu rin ding sundalus a migkuta Jerusalem king Siudad nang David, nung nu la manibatan magdalang karinatan king Templo.
37Mibili yang Judio king kuta ban karin manuknangan. Pepatibe ne iti para king kapanatagan ning bansa at ning siudad, at pepatas ne pa ing pader ning Jerusalem.
38Uli na niti, inayunan nang Aring Demetrio ing katungkulan na bilang Pekapun ding Pari,
39kilala neng metung karing Kakaluguran na ning Ari at binie na la ding matas a karangalan.
40Gewa nang Demetrio iti uling abalitan na king ding Romano ausan da lang kakaluguran, kakampi, at kapatad ding Judio at king tinggap da la at peparangalan ding tubud nang Simon.
41Uli na nita, pepatibayan da ring Judio at ding pari ing maging manimuna re at Pekapun ding Pari i Simon at ding lahi na, anggang e ya lunto ing metung a tune propeta.
42Ing mamahala king bansa, ing manibala king Templo, at ing pekapun ding sundalus ya i Simon. At bilang karagdagan ya ing manibala king gamit da ring sundalus, king obrang pangbalen, at ing pangatalakad da ring kuta.
43Kailangan lang mamintu kang Simon ding memalen king sablang bage. Marapat ing sablang kasunduan ning kapamahalan king lagyu na. Atyu kang Simon ing katuliran misulud king balabal a purpura da ring ari at king gintung hibilia king pago.
44Ala metung man, pari ya man o memalen, ing ating upayang payalan na lang bisa deting mepikayari, ibayu o alilan ing isanu man karing kautusan nang Simon o maus kapulungan king bansa, nung ala yang kapaintulutan o misulud king balabal a purpura da ring ari o ing gintung hibilia king pago.
45Miparusan ya ing ninumang salangsang o e munie pansin kareting tuntunan.
46Misanmetung la pamalak ding tau king manungkulan ya i Simon agpang karing paralan a mepikayari. 47Tinggap nang Simon king ya ing maging Pekapun ding Pari, pamuntuk da ring sundalus, at gobernador da ring Judio at ding pari.
48Mepikayari king iting mipasiag mitatak ya king tinabas a tangsu at mibili ya king metung a agad a mayayakit a lugal kilub ning Templo 49at mibili la ding kopia king pisisinupan nang pibandian ning Templo lalam nang pamaningat Simon at ding anak na.
Currently Selected:
1 Macabeo 14: PmPV
Highlight
Share
Copy
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994