Mga Papakita 7

Sinto Kwarintay-Kwattro Mil Na Namarkaan

1Pagtapos ta mga natabo tenged ta pagtangtang ta pang-annem na silyo, nakita ko appat na angil na gatindeg naan ta appat na pamusod ta kalibutan daw papegengan danen appat an na angin aged dili mag-eyep ta biskeg naan ta basak, dagat daw naan ta bisan ino na mga kaoy 2tenged danen an mga angil na naatagan ta uturidad na magsamad ta basak daw dagat. May nakita a man na isya pa na angil na gagwa na alin ta sennangngan daw gibit kanen ta pangmarka na iya ta Dyos na bui. Gasinggit kanen naan ta appat ya na angil, 3“Dili nyo anay samaren basak daw dagat daw mga kaoy asta na mamarkaan nay takong ta mga ittaw na gasirbi ta ate na Dyos.” 4Pagtapos ta pagmarka, namatian ko na may gambal na sinto kwarintay-kwattro mil na mga ittaw na namarkaan en daw mga ittaw na namarkaan danen mga linai na alin ta dusi na bata Israel.

5Dusi mil alin ta mga linai Juda,

dusi mil alin ta mga linai Ruben,

dusi mil alin ta mga linai Gad,

6dusi mil alin ta mga linai Aser,

dusi mil alin ta mga linai Neftali,

dusi mil alin ta mga linai Manases,

7dusi mil alin ta mga linai Simeon,

dusi mil alin ta mga linai Levi,

dusi mil alin ta mga linai Isacar,

8dusi mil alin ta mga linai Zabulon,

dusi mil alin ta mga linai Jose

daw dusi mil alin ta mga linai Benjamin.

Pagdayaw Naan Ta Dyos Daw Naan Ki Kanen Na Paumaw Na Karniro

9Pagtapos na namatian ko daw pila mga namarkaan na mga linai na alin ta dusi na bata Israel, dayon may nakita a na sikad tama gid na mga ittaw na dili mabilang. Alin danen ta tanan na mga lai, linggwai daw alinan na linai daw lugar. Gatindeg danen an naan ta tubangan ta truno daw Karniro. Iran na suot langkaw na bayo na puti daw gibit danen ta mga daon ta kaoy na palma. 10Gasinggit danen ta tudo, “Dayawen ta ate na Dyos na gamungko naan ta truno daw Karniro man tenged danen galuwas an ki kami alin ta silot.”

11Tanan na mga angil gatindeg palibot ta truno daw mga pataa na manugdumala daw appat an na may kabui. Gadapa mga angil an naan ta tubangan ta truno daw pasimba danen Dyos an. 12Ambal danen,

“Amen! Dayawen ta Dyos an na angay gid tagan ta pagdayaw,

pagpasalamat daw pagtaod asta ta ula katapusan.

Datas gid iya na alam, masarangan din daw ino iya na buaten

daw sikad bakod iya na gaem. Amen!”

13Isya ta mga pataa na manugdumala gainsa ki yaken, “Kino mga gasuot ta langkaw na bayo na puti daw indi danen an alin?”

14Gasabat a, “Sir, ula ko nlami. Pwidi a no sugiran?”

Ambal ta manugdumala, “Danen an mga ittaw na kaagi ta segeng na mga kabellay tenged ta pabuat ta mga gakuntra ki danen bilang mga gatuo. Palimpyuan danen iran na mga bayo paagi ta lengngessa ta Karniro aged magputi gid.#7:14 Palimpyuan danen iran na mga bayo paagi ta lengngessa ta Karniro beet ambalen na tenged ta kamatayen Cristo bilang alad para ta mga sala, danen an napatawad daw palimpyuan ta iran na mga sala. 15Yon tenaan na naan danen an ta timplo na balay ta Dyos daw naan ta tubangan ta iya na truno gasirbi danen an ki kanen adlaw kilem daw danen an paambligan din na paryo papasilong din naan ta iya na turda. 16Dili en danen maletem daw dili man malao. Dili danen an maino ta adlaw daw maskin ino pa na sikad paso. 17Iling tan kadayad iran na kaimtangan tenged Karniro an na naan tengnged ta truno, kanen iran na manugbantay daw mag-ubay ki danen daw indi may mga tuburan ta waig na gaatag ta kabui daw Dyos an magpaid ta luwa ta iran na mga mata.”

Currently Selected:

Mga Papakita 7: cgc

Highlight

Copy

Compare