Juan 1
1
Sa Lalang Ha Tag-ila Hu Kinabuhì
1Su hurà pa tanghagaa sa bisan inu duduun en haena sa tagngaranan hu Lalang, daw sa Lalang iyan duma hu Dios ha iling din dà daan. 2Su hurà pa tanghagaa sa bisan inu sa Lalang duduun en duma hu Dios.
3Pinaagi kandin tinanghagà sa alan daw hurà en gayed natanghagà ha kenà pinaagi kandin. 4Sa Lalang iyan tag-ila hu kinabuhì daw saena ha kinabuhì iyan sulù ha pakailaw hu henà-henà hu kaet-etawan. 5Saena ha sulù iyan ilaw duun hu masukilem daw harì en gayed mapedengan.
6Amin etaw ha sinugù hu Dios ha tagngaranan ki Juan Ha Tagpamautismu. 7Sinugù haena hu pagpanunultul mahitenged taena ha sulù ta daw makatuu sa kaet-etawan pinaagi kandin. 8Si Juan kenà iyan sulù ba bà dà sinugù hu pagpanunultul mahitenged ku sulù. 9Sa sulù ha pakailaw hu henà-henà hu kaet-etawan agpakauma en dini ta kalibutan.
10Iman nakauma en gayed dini ta kalibutan. Ba bisan ku tinanghagà sa kalibutan pinaagi kandin saena hurà kakilala hu mga etaw. 11Duminuun hu kaugalingen din ha lugar ba hurà dawata hu mga duma din. 12Ba sa alan ha nakadawat kandin daw nakatuu daan inilahan din hu katenged ha mabuhat ha mga batà hu Dios. 13Sa ingkabuhat dan ha mga batà hu Dios harì agkailing hu kalibutanen ha paagi daw kenà daan tumenged hu pagbayà hu etaw ta pinaagi gayed hu Dios.
14Saena ha Lalang migpakaetaw daw uminamul kanuy hu mababà ha panahun. Naahà day sa pagkagamhanan ha in-ila kandin hu Dios ha Amay din tumenged ta iyan bugtung ha Batà din. Saena maluluy-en gayed daw natun-an taw en diyà ta kandin sa kamatuuran.
15Iyan haini intultul hi Juan duun hu kaet-etawan su umikagi hu madaging ha tagyanaen, “Iyan en haini su tagsubayen ku, ‘Amin pa makadini ha labaw dì kanak ta duduun en su hurà a pa ibatà.’” 16Tumenged ta maluluy-en gayed harì agkapangkus sa pag-ila din kanuy hu mga panalangin. 17Pinaagi ki Moises in-ila hu Dios sa Kasuguan, ba pinaagi ki Cristo Jesus inilahan kuy kandin hu grasya daw natun-an taw daan diyà ta kandin sa kamatuuran. 18Hurà gayed etaw ha nakaahà hu Dios, ba sa bugtung ha Batà din ha dayun dà tagduma kandin iyan migpakilala kanuy hu Amay din.
Sa Pagpakilala Hi Juan Ha Tagpamautismu Hu Kaugalingen Din
(Juan 1:19-28; Mateo 3:1-12; Marcos 1:1-8; Lucas 3:1-18)
19Iyan haini intultul hi Juan su suguen hu mga agalen ta Jerusalem sa mga sinaligan hu paghalad daw sa mga kaliwat hi Levi ha mga magbubulig dan ha dumiyà ki Juan ta daw mainsaan dan ku sin-u. 20Inikagi kandan hi Juan sa laus, “Kenà a iyan su Misiyas.”
21Aman nanginginsà sidan, “Sin-u ka diay? Iyan kad en ba si Elias ha prupita?”
Ba tuminubag si Juan, “Kenà a iyan.”
Minisab sidan nanginginsà, “Iyan kad en ba su tagsalapen day ha Prupita?”
Tuminubag gihapun si Juan, “Kenà a daan iyan.”
22Aman minikagi sidan, “Ikagiyi kay ku sin-u ka ta kinahanglan ha amin day makatultul taena ha migsugù kanay. Inu sa maikagi nu mahitenged hu kaugalingen nu?”
23Tuminubag si Juan, “Iyan a su intagnà hi Isaias ha magkulahiay duun hu pinakabulung-bulung ha lugar ha magyanaen, ‘Tul-ida sa dalan ha ag-agiyan hu Ginuu.’”
24Saena ha mga sinugù hu mga Parisiyu 25nanginginsà, “Ku kenà ka iyan su Misiyas daw ku kenà ka daan iyan si Elias daw saena ha tagsalapen day ha Prupita, imbà nu agpamautismuwi sa mga etaw?”
26Ba tuminubag si Juan, “Diyà a ta wahig agpamautismu ba amin diyan ta inyu ha hurà nuy pa kakilala. 27Saena hudiyan dì kanak ba iyan labaw ta bisan sa paghukad hu sapatus din kenà a gayed angayan duun.”
28Nahitabù haena diyà ta Betania ha layun ta Jordan ha duun namautismu si Juan.
Sa Pagpakilala Ki Cristo Jesus
(Juan 1:29-34; Mateo 3:13-17; Marcos 1:9-11; Lucas 3:21-22)
29Su maisab ha aldaw naahà hi Juan si Jesus ha tagdiyà ta kandin. Dayun uminikagi si Juan, “Taini en sa Nati ha Karniru ha sinugù hu Dios ta daw makapalas hu salà hu kaet-etawan. 30Iyan haini tagsubayen ku, ‘Amin pa makadini ha labaw dì kanak ta duduun en su hurà a pa ibatà.’ 31Su anay hurà ku kakilala haini, ba migpamautismu a ta daw ku makauma en makilala gayed hu kaliwatan hi Israel.”
32Dayun iyan haini intultul hi Juan ha tagyanaen, “Naahà ku sa Balaan ha Ispiritu ha agkailing hu salapati ha migbulus daw hurà en awà diyà ta kandin. 33Saini hurà ku ngaay kakilala ba sa Dios ha iyan migsugù kanak hu pagpamautismu daan en minikagi kanak, ‘Ku maahà nu sa etaw ha agbulusan hu Balaan ha Ispiritu ha harì en umawà diyà ta kandin iyan en su tagpamautismu pinaagi hu pagpaulin hu Balaan ha Ispiritu.’ 34Iman naahà kud daw maikagi kud en inyu ha iyan gayed haini Batà hu Dios.”
Sa Pagpilì Hi Jesus Hu Nauna Ha Mga Tinun-an
35Su maisab ha aldaw diyà en paman si Juan duma hu daruwa ha mga sumusunud din. 36Su maahà din si Jesus sa aglabay diyà ta kandan inikagiyan din su daruwa, “Taini en su Nati ha Karniru ha sinugù hu Dios.”
37Su mapaliman ku daruwa ha sumusunud sa inikagi din luminupug dayun sidan ki Jesus. 38Su lumingì si Jesus naahà din su taglupug kandin aman ininsaan din sidan, “Inu sa agkabayaan nuy?”
Tuminubag sidan, “Hindu ka tagtimà, Rabi?” ha sa kahulugan taena Manunudlù.
39Tuminubag si Jesus, “Dumuma kaw kanak ta daw nuy maahà.”
Aman duminuma sidan ki Jesus daw naahà dan labi. Agkahapun en duun taena ba hurà en sidan suway hangtud ha masukilem en.
40Sa sabuwa kandan ha nakapaliman hu inikagi hi Juan ha luminupug ki Jesus iyan si Andres ha suled hi Simon Pedro. 41Inelegan din sagunà si Simon daw ikagiyi, “Naahà day en sa Misiyas” ha tagngaranan daan ki Cristo.
42Dayun dinuma din si Simon diyà ki Jesus. Su maahà hi Jesus si Simon inikagiyan din, “Sa ngaran nu iyan si Simon ha batà hi Juan, ba sa igngaran ku iman ikaw iyan en si Cefas” ha Pedro daan ha sa kahulugan din Batu.
Sa Pagpilì Hi Jesus Ki Felipe Daw Ki Natanael
43Su maisab ha aldaw nahenhenaan hi Jesus ha dumiyà ta prubinsya ta Galilea. Inelegan din si Felipe daw ikagiyi, “Dumuma ka kanak.”
44Si Felipe taga-Bethsaida ha tagtimaan daan hi Andres daw hi Pedro. 45Aman sagunà inelegan hi Felipe si Natanael daw ikagiyi, “Naahà day en haena sa etaw ha sinubay hu mga prupita daw sa sinubay daan hi Moises duun hu Kasuguan. Iyan haena si Jesus sa batà hi Jose ha taga-Nazareth.”
46Ba si Natanael nakaikagi, “Amin ba diay mapuslanen ha etaw diyà ta Nazareth?”
Tuminubag si Felipe, “Dumiyà ki ta daw maahà nu.”
47Su maahà hi Jesus si Natanael ha tagdiyà en ta kandin uminikagi dayun, “Iyan gayed hayana kaliwat hi Israel ta agkaahà ku ha hurà gayed limbung diyà ta kandin.”
48Ba nanginginsà si Natanael, “Imbà a man ikaw agkakilala?”
Tuminubag si Jesus, “Su hurà ka pa elegi hi Felipe naahà kud en ikaw duun hu sileb taena ha kayu ha igira.”
49Dayun uminikagi si Natanael, “Manunudlù, iyan ka gayed Batà hu Dios. Iyan ka haena sa tagsalapen day ha magharì hu mga kaliwatan hi Israel.”
50Minikagi si Jesus, “Nakatuu ka ba ta inikagi ku ha naahà ku ikaw duun hu sileb taena ha kayu? Ba amin pa tungkay belenganen ha maahà nu asem ku malugay.” 51Inikagiyan din daan sidan, “Laus gayed sa ag-ikagiyen ku inyu ha maahà nuy sa langit ha mapuwaan daw sa mga balinsuguen hu Dios ha magdini-dini ta kanak siak sa Batà hu Etaw.”
Currently Selected:
Juan 1: bkd
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.