YouVersion Logo
Search Icon

Jon 2

2
Jises tubuni gwa asahan waen
1Udu bada len la-uh anya kili len taloh badeh, iri amekes molak ari udu kon Kana, udu loboho Galili. Tine Jises udu aliy ale. 2Ndramak ta kati molak nane doh aso-ok Jises hawe oro lau tan kala ta molak tan. 3Iri ado, waen tiri ano. Tinen eme asehek i tan anya, “Waen tiri badeh ndrano.”
4Jises eme asehek i ta tinen anya, “Tine, jo bwalek ou ame tiye jo ta amekes lakou. Tasah len tek ta amekes lakou badeh, kahis le.”
5Tinen eme tiye toro lau ta atondrok waen, “Ado badeh, ka-en hamon ta sahou tan buku iy asehek ewek tado.”
6Udu loboho doh badeh, bwisi sabok ma onoh udu aliy. Iri Juwis badeh, a-us gwa ili bolon ta sikine iri lakou ta salom ma mine iri na aliy. Bwisi sabok ari ari gwa udu bolon i buku lita rinek (100).
7Jises tiye i toro bonyo-ou nane dah i buku doh, “Ado kasuni gwa kili bolo bwisi sabok ma onoh kede-eh.” Eme oro ala asuni bwisi sabok ma onoh ili irek madan.
8Iy eme tiye toro ja anya, “Abo, ado kasolowei se gwa keme len, ado kandrei kili mine ndramak ta atondrok molak dah.” Oro ame bwidiy i buku le bohon asehek oh.
9Oro ame bwese-ei gwa ili mine ndramak ta atondrok molak nane dah. Iy a-un, iy eme atona nyiminye gwa badeh, ndra buku waen ja. Iy bala tanan bwe, waen badu heh handru. Oro lau tan le badeh, tanan. Iy eme aloh i ta iy tasou ha-un eme len, 10ma iy asehek i tan i buku doh, “Iri lau ta atiye waen badeh, iri adeu waen mwasin ili mwena. Udu hamon ta iri lau ndra-un solo-an labai, iri ame adeu waen sowan bwisik ili tiri ja. Arile ou badeh, tawi waen sowan tinan labai udu hamon handru, na le nane barame len ai!”
11Jises amekes lahou tinan hawe kalem ma bwena badeh, udu kon Kana udu loboho Galili. Ma iy leheya boto-on ma kandriyen tan, eme ma iri lau tan anyolom, ma iri atehei budon tiri handru in le tan.
12Ano le badeh, Jises hawe tinen, nadu tinen, ma hawe oro lau tan adek au ala andri ala Kapena-um. Oro ala ado doh luluwen sese.
Jises ili bolo asiu tinan ta Kindrei
(Metiu 21:12-13; Mak 11:15-17; Luk 19:45-46)
13Ndrame mirihik labai ta len ndrabun tiri Juwis aloh Pasoba ma nyamon tinan anya kasahan, eme Jises iu ili Jerusalem. 14Jises edek ili isos le badeh, iy ili bolo asiu tinan ta Kindrei, ma iy anyolom iri lau amekes ba-en, tiri bulumakau, sipsip ma ban udu bolo asiu tinan ta Kindrei. Iy ale anyolom oro lau rayah tokoha luk ado bada koyeu toro. 15Jises eme andrei malou ranah, iy bawei i le se. Iy eme tikahei iri lau ma bulumakau, hawe sipsip tiri au ala manan. Iy eme bukudi iri sau tiri nane ondrek luk udu bwele-en, amou ili andri, ma luk marakon udu bwele-en atalan laleyah. 16Iy eme asehek sahou boto-on labai ili tiri lau nane amekes ba-en ta ban, “Aha kakohok lakou taha marakon ki-iu ki manan! Aha ka-iy amekes asiu ta tama ili asumwe ba-en taha.”
17Oro lau tan ame bwetenei ja sahou udu bolo buk ndrabun asehek:
“Budon tek ewek asiu tam, O Kindrei, budon tek i buku jih sulumwi bolo odak mara-ei.” Wari 69:9
18Iri Juwis ame asehek sahou boto-on labai i ta Jises, “Ou winiyan amekes saba kalem ma lahou tinan kameh keme tahi kanyolom, ma ahi katanan boto-on tam, ma ahi katanan ou are lau handru?”
19Jises eme asehek i toro anya, “Katohowei asiu tinan ta Kindrei kede-eh ki-iu, ano kameh jo tahiy na le bolo len ma taloh.”
20Oro Juwis asehek i ta Jises ja, “Adeh, ahi atah asiu tinan ta Kindrei kede-eh na bolo jaha ma ndro hanoh onoh (46). Ta budon tam anya, ou winiyan tahiy na le bolo len taloh?” 21Arile, iri bakohok bolo sahou tan bamwenen bwe. Jises asehek, iy amwenen badeh, i buku asiu tinan ta Kindrei. 22Udu hamon ta Jises amak udu bolo lek tan eme awas ja badeh, eme ma iri lau tan barabwetenei iri sahou mene iy asehek. Eme ma iri atehei budon tiri in ta buk ndrabun, ma in ta iri sahou marakon nane Jises asehek.
23Iy udu ndra Jerusalem badeh, len ndrabun iri aloh Pasoba tiri Juwis ma hawe nyamon tinan asahan. Iri lau solo-an labai ado aliy anyolom iri lahou tinan hawe kalem iy amekes, ma iri atehei budon tiri marakon in ta nyaran. 24Arile Jises batehei budon tan bala tiri bwe, tasah iy ndratanan iri marakon. 25Tasah, iy ndranyolom ma iy ndratanan kandriyen tiri lau marakon. Iy barah ta tanan bwe, ma iy baseken ndramak asehek i tan ta kandriyen tiri lau. Iy badeh, ndratanan budon tiri marakon.

Currently Selected:

Jon 2: lidNTpo

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy