2 Korin Sahou Tanan
Sahou Tanan
Lau mwan ma badih rayah ta Kindrei badu kon tinan Korin mene atisih gok ta Pol. Iri anya iy badeh, kandriyen tan ndra-in, ma iy boto-on ta amekes gok aposel bwe. Eme ma, idoh bwidi ndrine Pol eden labai. Iy eme anya kasehek sahou hawe iri Korin, eme ma iy torowenei la-ukei dah, ta iy winiyan sekesek hawe iri ja.
Udu bolo la-ukei tan ranah ma bwena, Pol asehek ta sahou boto-on labai bwena mene iy atorou ili tiri Korin. Iy bwalen labai ta amekes sahou nane doh, arile iri tebelese ma atisih gok tan, eme ma iy amekes sahou boto-on ili tiri. Ma iri ame anuhun sahou tan ma asehek nyala kandriyen tiri, eme ma, na len le doh iy sekesek tinan labai.
Udu bolo len nane doh iri lau ta Kindrei badu bolo kon Judiya iri bare mwasin bwe, ma Pol ibo gok ta atukum luk ta bwese ili tiri. Eme ma udu ta kalan ndru la-uh hawe ndro ari Pol amekes sahou ta ariu ndrine iri Korin ta adeu luk ta gok doh.
Sendrehendreh ta la-ukei, Pol tiye ta iri aposel rayah ta wendreya mene ame are Korin ma iri atara nyara Pol ma bobose gok tan buku aposel.
Iri Sahou Tinan
Pol edeu wurah ili ta Kindrei (1:1-11)
Gok aposel tiri lau ta Kindrei (1:12–2:17)
Tikisiy leheya san ta Krais (3:1–7:16)
Ndramas ta lau tiri lakou bwe (8:1–9:15)
Pol iy aposel ari handru (10:1–13:10)
Sendrehendreh ta sumon tan (13:11-13)
Currently Selected:
2 Korin Sahou Tanan: lidNTpo
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.