Maika 6

Ala kava neʼmoʼa Isaleli vayaʼmo agoti huno apateʼniya gemae

1 # Sam 50:1,4; Loa 4:26 Hemenimo lapakaemo Ala kava neʼmo geʼamo afiyo. Ala kava neʼmoʼa Maikafeʼmo ha painoʼaeʼmo, He tikuka avemo aulagamo he tika maiʼneka Isaleli vayaʼmo agoti huka apategenoʼa aise avemoʼmo kagemo afigiye. 2#Iyi 20:35-36; Hos 12:2Maikaʼmo hunoʼaeʼmo, Lapakaemo lokiya yaʼmo ma mopamo faino ateʼniya yaʼmogitapaʼe avemogitapaʼene, huʼna, Ala kava neʼmo agoti geʼamo afiyo. Ala kava neʼmoʼa vayaʼamogi hosu kavaʼapilefeʼmo apakaepiʼmo alino faino apateteno agoti huno apategaiye, huno ha paiʼniye. 3#Yel 2:5,31; Aiy 43:22-23Ala kava neʼmoʼa hunoʼaeʼmo, O, vayaʼnimogitapae, huʼna, nagaemo lapakaetegamo haiya agufa hosu kavaʼmo huʼnove. Haiya kavaʼmo huʼnogeno alagaʼmo lahapaeʼniye. Getapimo alita nagaepiʼmo faita nateyo. 4#Niy 9:9-11; 2 Sam 7:23Nagaemo Isipi kotegatiʼmo kalavusi aliʼyapatiʼmo hatu maeʼna lapateteʼna lapavaleliʼna eʼnove. Nagaemo Moseseʼagi Eloniʼagi Miliyamuʼagi huʼna yagaiʼa lapatesayafeʼmo lekana paiʼna apateteʼna aliʼna apateʼnogeʼa lapavaleliʼa eʼnae. 5#Nap 22:1-25; Sam 36:10O vayaʼnimogitapae, huʼna, Movapu kini vekamo Melakiʼmo lapakaetegamo hosu kavaʼmo hugefeʼmo huʼniya kavafeʼmo hemenimo lapakesamo afitapa ho hiyo. Hosu kavaʼmo hugefeʼmo agesamo afiʼniyaʼmonanafa Miyo mafaʼnemo Melamiʼmo geʼaleʼmo aeno atagaina huno ha paiʼniya geʼaeʼmo lapakesamo afitapa ho hiyo. Akesiya kotegatiʼmo ataletapa Giligali taonifiʼmo ugefeʼmo neʼvageʼnaeʼmo nagaemo lapa maeʼnovanagi lapakaetegamo afole aiʼniya kavaʼefeʼmo lapakesamo afiyo. Lapakaemo Ala kava neʼmoʼnamo fatago kavaʼnimo ageta alagepa hutapa agesayafeʼmo lapake okanitapa ani kavafeʼmo lapakesamo afita ho hiyo, huno hapa paiʼniye.

6 # Mt 19:16; Ap 2:37 Nagaemo Ala kava neʼmo kokuʼnapi Gotitegamo uʼna aulagaleʼmo he tiʼna maisuvafeʼmo na agufa yaʼeʼmo aliniʼna uʼna agaefeʼmo mono huguve. Nagaemo ape huʼna magoke kafugamo maiʼnaya pulumaka aikelimo apavaleliʼnuʼna apamagiʼna ani ofalinimo atafiʼmo kaeʼna amisufiye. 7#1 Sam 15:22; Hos 6:6Nagaemo asole tauseni tauseniʼa ve sipisipi anagaʼmo apavaleliʼnuʼna ani ofalinimo amisugenoʼaeʼmo Ala kava neʼmoʼa amuse hugifiye. Nagaemo alopa uveli aniʼmo tauseni tauseni aniʼmo uno nelamiya agufa anikana uvelimo aliniʼna uʼna amisugenoʼaeʼmo amuse hugifiye. Nagaemo yege mafaʼneʼnimo amagiʼna hosu kavaʼnilefeʼmo ani ofalinimo amisufiye.

8 # Sef 2:3; Ye 4:6-10 O vekamogae, huʼna, Ala kava neʼmoʼa alagepa kavaʼmo hisuna kavaʼmo ago alino lave liʼniye. Agaemo anonatilefeʼmo hisunafeʼmo hunoʼaeʼmo, vayaʼaitegamo fatago kavaʼmo huge lapau hutapa apatetetapa lahapauge lapakufamo alita afepiʼmo lapatege hutetapaeʼmo Gotitapimoʼeʼmo afalu afalu kavaʼmo hutapa magokepi lokaetapa umenitata hiyo, huno laha paiʼniye.

Isaleli vayaʼmogi hosu kavaʼmo huʼnayanageno Gotiʼa kayoʼmo apamisiya kavafeʼmo huʼniya gemae

9 # Yop 5:6-8,17; Yol 2:11-18 Ala kava neʼmoʼa Yulusalemu taonifiʼmo maiʼnaya vayaʼaifeʼmo keya aeno ge nehiye. Inagi afiteʼa ageʼnaya vayaʼmogi kagaefeʼmo koli huteʼa kagikamo ageʼa aote hugae. Gotiʼa kayoʼmo lapamisiyafeʼmo ge nehiyanagi afiyo. Ina laʼmo ani kayoʼmo lapamisiyafeʼmo lekana paino ateʼniye. Kayoʼmo aepa vekamoʼmo lekana pai maleʼniya vekamo geʼamo afiyo. 10#Mai 10:2; 21:6; Emo 8:5-6Hosu kavaʼmo nehaya vayaʼmogimo hosu kavaʼmo oʼataleʼa noʼapifiʼmo asole alagepa yaʼmo hosu kavaʼapiletiʼmo magoʼe huʼa aliʼnaya yaʼmo afaʼa haneʼnifiye. Alu vayaʼaiteʼmo maketi nehaya afinaʼmo neʼyaʼmo aigofe kava huʼa aliʼa fako huʼa apamige hosu kava huʼa maketi nehaya yaʼmo aigofe sigelileʼmo asaige nehaya kavafeʼmo alagi noʼnahaiye. 11#Hos 12:7; Mai 16:11Haiya kava huʼna ani agufa kavaʼmo nehaya vayaʼaifeʼmo alagepa vayane, huʼna huguve. Haʼao, ani gemo osuguve. 12#Mka 3:1-3; Yel 9:2-6Apakaemo taonifiʼmo asole kagemi yaʼapiʼe vayaʼmogimo kaveta huge agoti huʼa apatege nehae. Taonifi vayaʼmogimo aigofe gemo huge apavayaletiʼmo humi apatege nehae.

13 # Mon 26:16; Yop 33:19-22 Nehayaʼmofeʼmo hemenimo nagaemo hosu kavatapieʼmo nagesamo afiteʼnaeʼmo aepa faiʼna kayoʼmo lapamisugeno kagemiyatapimo alagi ohanesigetapa afaʼa maigae. 14#Mon 26:26; Hag 1:6Inagi lapakaemo neʼyaʼmo negayaʼmonanafa lapaka tegaiye. Lapakae folagapiʼmo kafu kavaʼmo afole aigiye. Kamemo hisaya afinaʼmo lapakaemo mago yatapimo afaʼa hanesiyafeʼmo alinita ugayaʼmonanafa kame vayatapimogi ani yaʼmo kumaya aliniʼa ugae. Mago yatapimo afaʼa ohanesiyaʼmoʼmo nagaemo kame vayaʼmo aliʼna apatesugeʼa eʼa mago yatapimo aliʼa hosu huʼa atalegae. 15#Loa 28:38-40; Sef 1:13Lapakaemo hoyamo alita vaigayaʼmonanafa hoyafatiʼmo neʼyaʼmo alagi oʼaligae. Lapakaemo olivi alagafatiʼmo uvelimo aligayaʼmonanafa lapakufaleʼmo uvelimo ofalegae. Lapakaemo nofi alagafati aniʼmo hugayaʼmonanafa lapakaemo ani aniʼmo oʼnegae. 16#1 Kin 16:25-30; Yel 19:8Lapakaemo kini vekamo Omaliʼe mafaʼneʼamo kini vekamo Ehapiʼeʼmo hosu kavaʼanimo akame nehayaʼmofeʼmo muki ani hosu kavaʼmo lapakaeteʼmo afole aigiye. Lapakaemo akeyaʼvilagamo anakaemo huʼnaʼa agufa kavaʼmo nehayaʼmofeʼmo nagaemo aliʼna hosu huʼna lapatesugeʼa alu nofi vayaʼmogimo eʼa apakameʼyamo lapamiteʼa huʼa faipa huʼa lapatesagenoʼaeʼmo lapakaemo vayaʼnimo lusi kava huno lapavagage hugiye.

Currently Selected:

Maika 6: kyg2013

Highlight

Copy

Compare