Malakai 4
4
Ala kava neʼmo afinaʼmo afole aigiye, huno huʼniya gemae
1 #
2 Pi 3:7; Oma 18 Ala kava neʼmo muki vayaʼaiteʼmo yagaino neʼapateya vekamoʼmo hunoʼaeʼmo, Afiyo, huno, Mago afinaʼmo afole aisigenoʼaeʼmo alopa sitopufiʼmo ata neleya agufa kavaʼmo huno himuʼnamu kavaʼmo nehaya vayaʼe hosu vayaʼeʼmo vaiʼniya kahaugana huʼa maiʼnisageno atamoʼa apaleno pasaga ligiye. Ani afinaʼmo atamoʼmo yosaʼaʼe hafuʼyaʼaʼeʼmo leno saga lisigeno alagi ohanegaiye. 2#Mal 3:16; Lu 1:78Alagi oʼmaigayaʼmonanafa nagiʼnilefeʼmo koli nehaya vayaʼaitegamo ani kavaʼmo huno fatago vekamo yegegana huno hainesiya kavaʼamoʼmo alino hapageno apatesigeʼa alagepa huʼa maigae. Nopatiʼmo pulumaka anaʼau anagaʼmo kita yakiʼa apateʼnageʼapaeʼmo aeʼa hailo hailo huliʼa neʼvaya kava hutapa ugae. 3#Mka 7:10Ala kava neʼmo muki vayaʼaiteʼmo yagaiʼna neʼapatova vekamoʼnamo huʼnaeʼmo, Ani kavaʼmo hisuva afinaʼmo atamoʼmo hosu vayaʼmo apaleno pasaga lisigeʼa laʼnefamo aliʼa hamalesagetapa ani laʼnefaleʼmo lapaiyamo aeʼnetapa ugae. 4#Sam 147:19-20Nagaemo aliʼyaʼnimo neʼaliya vekamo Mosesefeʼmo Holepi avefiʼmo keʼaepa geʼnigi avoʼmo kae malesiya geʼnigi aliʼna fako nehuva geʼnigi huʼna ha paiʼnove. Ani geeʼmo lapake okanitapa lapakesa afifi hutapa maiyo. 5#Mt 11:14; 17:10-13Afiyo, huʼna, Ala kava neʼmoʼna afinaʼnimo afole aisigeʼapaeʼmo lusi kava huʼa koli hugae. Nagaemo hogoteʼna Ilaiyaʼmo nagaetegati gemo alinineno aeno hakalo huno hapa nepaiya vekamo aliʼna atesugeno eno hogotegaiye. 6#Lu 1:16-17,76; Sak 5:3-4Agaemo afoʼapimogi apaipamo alino afe lesigeʼa mafaʼne anagaʼapiʼeʼmo magoke apaipamo aligae. Ani kavaʼmo huno mafaʼne anagaʼapimogi apaipamo alino afe lesigeʼa afoʼapimogiʼeʼmo magoke apaipamo aligae. Fiku yanageʼna emineʼnaeʼmo muki ma mopafi vayaʼmo lifana huʼna apategauve.
Currently Selected:
Malakai 4: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.