Luki 24
24
Yesuʼa ago he tiʼniya gemae
(Mt 28:1-10; Mk 16:1-8; Yo 20:1-10)
1Satepiʼmo hogote afinaʼmo gotilamiyapiʼmo aʼne anagaʼmogimo alagepa atumo neʼaiya malasinimo alo huʼnaya malasinimo alini uʼa 2ageʼnayana ani yafaʼmo ago alino heleve huno ataleʼnigeno yafa kaʼmo aka huʼnigeʼa ageteʼa 3yafakapiʼmo uʼa haiʼa ageʼnayana agufaʼamo ohaneʼnigeʼa ageʼnae. 4#Ap 1:10Na agufa kavaʼmo huʼnifi, huteʼa apakesa alaʼamo neʼafigeʼanaeʼmo alave alave nehiya kukena yaʼmo vailiʼnaʼa vekalaʼmo hapaopaleʼmo afole aiteʼana he tiʼana maiʼnaʼageʼapaeʼmo 5#Lu 2:9koli huteʼa ape huʼa maiʼnageʼanaeʼmo, na kavaʼmo higetapaeʼmo afaʼa maiʼniya vekamo kanoluleʼmo eta kahauya nehae. 6#Lu 9:22; 17:25Manifiʼmo oʼmaiʼnifa ago he tino uʼniye. Galeliya kotegamo maiʼnenoʼaeʼmo ago lapa painoʼaeʼmo, 7Vemo Mafaʼnemo avaleli uʼa hosu vayaʼmogi apayapiʼmo apamisageʼapaeʼmo malipu yosaleʼmo nili aiteʼa aliʼa he tiʼa atesageno faliteno loleʼe magoʼe afinaʼmo kanolufiʼmo maiteno ago he tigiye, huno huʼniya geeʼmo lapakesamo afita ho hiyo, huʼana hapa paiʼnaʼageʼapaeʼmo 8apakesamo afiʼa ho huʼnae. 9Yafa kaʼmo atale uʼa leveniʼa vayaʼe muki vayaʼefeʼmo ani kavafeʼmo ava gemo huʼa hapa paiʼnae. 10#Lu 8:2-3Maliyaʼa Maganala kotega anagi Yovanaʼagi Maliyaʼmo Yemisi itaʼamoʼagi magoʼe aʼne anaganagi huʼa ani gemo apa vayaʼaifeʼmo hapa paiʼnageʼa 11afiteʼapaeʼmo aigofeʼmo nehae, huʼa apakesamo afiʼnae. 12Apakesamo afiʼnayaʼmonanafa Pitaʼa nagu nagu huno uno yafa kapiʼmo ape huno ageyana hayaeno ateʼniya kenaʼageʼmo haneʼnigeno ageteno ataleno neʼenoʼaeʼmo, haiya agufa kavaʼmo huʼnifi, huno agesamo afime afime noʼalegamo uʼniye.
Lole vekalaʼmo Emeyasi kotega neʼvaya kateʼmo neʼvaʼagenoʼaeʼmo Yesuʼa afole aiʼniya gemae
(Mk 16:12-13)
13Ani afinaʼmo geʼamo neʼafiʼa vekalaʼmo Emeyasi taonifiʼmo visaʼafeʼmo uʼnaʼae. Yulusalemu taonifatiʼmo Emeyasi taonifiʼmo neʼvaya kaʼmo aise afagiʼaleʼmo ina kavaʼmo huno leveni kilomitamo haneʼniye. 14Anakaemo neʼuʼanaeʼmo afole aiʼniya kavafeʼmo ge huge afige hume hume neʼvaʼageno 15#Mt 18:20Yesuʼa agaiʼageʼmo eno anakame huno anakaeʼeʼmo uʼniye. 16Anaulagaleʼmo mago yaʼmoʼa aino ati kaeʼnigeʼana Yesuʼmae, huʼana oʼageʼnaʼae. 17Yesuʼa hunoʼaeʼmo, na agufa kavafeʼmo ge huge afige hume hume neʼvaʼae, huno ge huno anafi geʼnigeʼanaeʼmo anileʼmo he tiʼana maiʼneʼanaeʼmo anaipamoʼmo kana huge hosu anaugosamo kalige huʼnaʼae. 18Ani vekalapatiʼmo mago vekamo agiʼamo Kiliyopasiʼa geʼaleʼmo aeno atagaina huno ha painoʼaeʼmo, muki vayaʼmo Yulusalemu taonifiʼmo ete ete huʼa maiʼnaya vayaʼmogi hemenimo afole aiʼniya kavafeʼmo ava gemo huʼa neʼafiyaʼmonanafa kagaemo oʼafika maiʼnapiye, huno afi geʼnigenoʼaeʼmo, 19#Mt 21:11na agufa kavaʼmo afole aiʼniye, huno ge huno anafi geʼnigeʼanaeʼmo, Yesuʼa Nasalasa vekamo Gotitegati gemo alinineno aeno hakalo huno hapa nepaiya vekamo maiʼneno Goti aulagaleʼe muki vayaʼai apaulagaleʼeʼmo himamuʼaletiʼmo lokiya kavaʼmo huge lokiya gemo hapa paige huno maiʼniye. 20Maiʼnigeʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼe yagaiʼa nelataya vayaʼmogiʼeʼmo kamitimo amagisayafeʼmo gamani vayaʼaitegamo avaleli uʼa ateʼneʼa malipu yosaleʼmo nili aiteʼa aliʼa he tiʼa ateʼnae. 21#Lu 2:38; 19:11; Ap 1:6Lagaemo alita amufa amitaeʼmo, ani vekamoʼmo Isaleli vayaʼmogita hatu maeno lategaiye, huta lagesamo afitetaeʼmo laipafatiʼmo lamogaga aiʼniye. Ani kavaʼmo ago afole aiʼnigeno loleʼe magoʼe afinaʼmo uʼniye. 22#Lu 24:1-11Mago lagaeʼeʼmo maiʼnaya aʼne anagaʼmogimo mago gemo laha paiʼnagetaeʼmo lahau aiʼnone. 23Apakaemo gotilamiyapiʼmo yafakapiʼmo uʼa ageʼnayana agufaʼamo ohaneʼnigeʼa ageteʼapaeʼmo ataleʼa aiʼa atagi neʼa neʼeʼapaeʼmo, enisole vekalaʼmo anakeʼnonageʼanaeʼmo, kanolufatiʼmo ago he tino afaʼa maiʼniye, huʼana laha paiʼnaʼae, huʼa laha paiʼnae. 24#Yo 20:3-10Lagaepatiʼmo mago lole vekalaʼmo uʼana aʼne anagaʼmogi laha paiʼnaya kavafeʼmo yafakapiʼmo ageʼnaʼana Yesu agufaʼamo oʼageʼnaʼae, huʼana ha paiʼnaʼagenoʼaeʼmo, 25O negi vekalane, huno, lanakaemo muki geʼamo Gotitegati gemo alini eʼa aeʼa hakalo huʼa hapa paiʼnaya vayaʼmogi huʼnaya geeʼmo lanakesamo afitana fatago hisaʼafeʼmo ago lanake kaniʼnigetana vase vase hutana neʼafiʼae. 26#Lu 9:22; 24:44Apakaemo huʼapaeʼmo, Kalaisi vekamo hogoteno agafu kitesigenoʼaekeʼmo ala agiʼamo aligiye, huʼa avoʼmo kae maleʼnaya gemo oʼafiʼnaʼafiye. 27#Sam 22:1-21; Aiy 53; Yo 13:31; Ap 3:13Agaemo Moseseʼa agaefeʼmo ava gemo huno avoʼmo kae maleʼniya gemo aepa faiteno aepaʼamo alino anaya maleʼniye. Ani kavaʼmo huno muki vayaʼmo Gotitegati gemo alini eʼa aeʼa hakalo huʼa hapa nepaiya vayaʼmogimo agaefeʼmo ava gemo huʼnaya gemo aepaʼamo alino anaya maleme maleme uʼniye. 28Anakaemo utaʼa maiguʼae, huʼana huʼnaʼa taonimo haopaleʼmo uʼa avaʼyi huteʼapaeʼmo Yesuʼa ago anataleno uno afagi hugekana huʼnigeʼanaeʼmo 29alopa gefatiʼmo huʼanaeʼmo, hemenimo ago unetiʼnigeno hani hugefeʼmo hiyanagi atalekeka laʼagaeʼeʼmo maiyo, huʼana ha paiʼnaʼageno eno nopiʼmo uno haino anakaeʼeʼmo maiʼniye. 30#Lu 22:19Hiʼyalamuteʼmo anakaeʼeʼmo magokepi siyateʼmo fai maiʼnenoʼaeʼmo peleti mayamo aliʼneno nunumuʼmo huno hao ke heteno akaya heno anamiʼniye. 31Anamiʼnigenoʼaeʼmo anaulagamo ayakeʼnigeʼana Yesuʼmae, huʼana agetaʼageno malage huno oʼmaiʼnigeʼana magoʼe huʼana oʼageʼnaʼae.
32Anakaiʼanimo huʼanaeʼmo, kategamo neʼetaeʼmo Goti Mukufati gemo aepaʼamo alino laʼaya neʼmalegenoʼaeʼmo laʼaipafiʼmo hagaʼage gemo afole aiʼnigeno laʼaipamoʼmo falu huteno laʼamogaga aiʼniye, huʼana huʼnaʼae. 33Huteʼanaeʼmo malage huʼana he tiʼana Yulusalemu taonifiʼmo atagi neʼana eʼnaʼae. Eʼana avaʼyi huteʼana apakeʼnaʼana leveniʼa vayaʼe mago apakaeʼeʼmo lokaeʼa maiʼnaya vayaʼeʼmo aliʼa anupa huʼa maiʼneʼapaeʼmo 34#1 Ko 15:4-5apakaemo huʼapaeʼmo, alagi lama ge huʼa Ala kava neʼmo ago he tiʼniye. He titenoʼaeʼmo Saimonitegamo afole aiʼnigeno ageʼniye, huʼa hana paiʼnageʼanaeʼmo 35kategamo afole aiʼniya kavafeʼmo ava gemo huge peleti mayamo alino akaya heʼnigeʼana Yesuʼmae, huʼana ageʼnaʼa kavafeʼmo ava gemo huge huʼana hapa paiʼnaʼae.
Yesuʼa geʼamo neʼafiya vayaʼmogi folagapatiʼmo afole aiʼnigeʼa ageʼnaya gemae
(Mt 28:16-20; Mk 16:14-18; Yo 20:19-23)
36 #
1 Ko 15:5
Ani gemo hapa nepaiʼagenoʼaeʼmo Yesuʼa agaiʼageʼmo folagapatiʼmo afole aitenoʼaeʼmo, lapaipamoʼmo falu hino, huno hapa paiʼnigeʼapaeʼmo, 37#Mt 14:26afene, huʼa huteʼa hapau aiteʼa atete huʼnae. 38Agaemo hunoʼaeʼmo, na kava higetapaeʼmo lapaipamoʼmo kana huʼnigeta lole lapakesamo neʼafiye. 39Nayapiʼe naiyafiʼeʼmo eta agetetapa name alitetapaeʼmo, agaemae, hutapa nageyo. Amega nagufaʼe nayamufaʼniʼeʼmo haneʼniyana afeʼmoʼa amega agufaʼe ayamufaʼeʼmo mani kavaʼmo huno ohaneʼniye, huno hapa paiteno 40ayaʼe aiyaʼeʼmo alino apave liʼnigeʼa 41#Yo 21:5ageteʼapaeʼmo lusi kava huʼa apamogaga aiʼnayaʼmonanafa apakesamo afiʼa fatago osuʼnafa lole apakesamo afiʼnae. Agaemo hunoʼaeʼmo, mago neʼyaʼmo manile haneʼnifiye, huno ge huno apafi geʼnigeʼapaeʼmo 42mago kae malefa noyameʼe luʼme anuʼeʼmo aliʼa amiʼnageno 43apaulagaleʼmo alino neʼniye. 44#Lu 9:22Netenoʼaeʼmo, mani kavafeʼmo lapakaeʼeʼmo maiʼneʼnaeʼmo ago lapa paiʼnaeʼmo, muki kavafeʼmo nava gemo huʼa avoʼmo kae maleʼnaya gemo afole aigiye. Moseseʼa avoʼmo kae maleʼniya nava gegi Gotitegati gemo alini eʼa aeʼa hakalo huʼa hapa nepaiya vayaʼmogi avoʼmo kae maleʼnaya nava gegi Samu mukufiʼmo avoʼmo kae maleʼnaya nava gemogi huno afole aino, 45#Lu 24:27huno apakesamo huno halo aino hapa paiteno alino apaya maleʼniye. 46Huno hapa paitenoʼaeʼmo, Kalaisi vekamo agafu kisigeno falitenoʼaeʼmo napa tali afinaʼmo kanolufatiʼmo he tigiye. 47#1 Ti 3:16He tino maiʼnisigeʼapaeʼmo Yulusalemu taonifatiʼmo aepa faiteʼa hapa paiʼapaeʼmo, lapaipamo alita afe legenoʼao Gotiʼa Kalaisi agiʼaletiʼmo hosu kavatapimo alino ataleno, huʼa hapa paiteʼapaeʼmo ani agufa gemo huʼa muki nofi vayaʼaifeʼmo aeʼa hakalo huʼa hapa paigae, huʼa avoʼmo kae maleʼnae. 48#Yo 15:27; Ap 1:8Lapakaemo mani kavaʼmo ago ageʼnayaʼmofeʼmo ani kavafeʼmo faigoko geʼnimo huta hapa paisaya vayaʼmo maiʼnae. 49#Yo 14:16; 15:26; 16:7; Ap 1:4Afiyo, huno, Afoʼnimoʼmo polomasi gemo hunoʼaeʼmo, Nauneʼnameʼmo aliʼna lapamiguve, huno lapa paiʼniyanageʼna Goti Aunemeʼamo aliʼna atesugeno emineno lapakaeʼeʼmo maigiye. Emiʼnegaiyaʼmonanafa hogoteta uta Yulusalemu taonifikeʼmo agava maime maime neʼvigenoʼao Goti Aunemeʼamoʼmo emineno lokiya vaino lapategaiye, huno hapa paiʼniye.
Gotiʼa Yesuʼmo halate kokuʼnapiʼmo avalelino uno haiʼniya gemae
(Mk 16:19-20; Ap 1:9-12)
50Agaemo apavalelino Metani taoni haopalegamo uno avaʼyi huteno ayaʼmo alino asagauno aeno hayo huʼnenoʼaeʼmo alino auleno huno apateʼnigenoʼaeʼmo 51Gotiʼa kokuʼnapiʼmo avalelino uno haiʼniye. 52#Yo 14:28; 16:22Nehaigeʼapaeʼmo agaefeʼmo mono huteʼa aiʼa atagi neʼa Yulusalemu taonifiʼmo neʼuʼapaeʼmo lusi kava huʼa apamogaga aime aime uʼnae. 53Maiʼneʼapaeʼmo muki afinaʼmo alopa mono nopiʼmo uʼa haiʼa Goti agiʼaleʼmo aliʼa asaga huge Gotifeʼmo aliʼa auleʼa atege huʼa maiʼnae. He, lama ge.
Currently Selected:
Luki 24: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.