Yoni 2
2
Mago vekamoʼmo aʼmo aliʼnigeʼapaeʼmo neʼyaʼmo neʼnaya gemae
1 #
Yo 1:43
Lole afinaʼmo utegeno mago vekamoʼmo aʼmo aliʼnigeʼapaeʼmo Kena taonimo Galeliya kotegamo neʼyaʼmo neʼnae. Yesu itaʼamoʼmo ani nopiʼmo uno haino maiʼniye. 2Ani vayaʼmogimo Yesuʼe geʼamo neʼafiya vayaʼefeʼmo ge huʼnageʼa eʼa maiʼnae. 3Ani asole vayaʼmo maiʼnayaʼmofeʼmo nofi alagafati aniʼmo ago neʼa hano huʼnagenoʼaeʼmo Yesu itaʼamoʼmo agaefeʼmo hunoʼaeʼmo, nofi alagafati aniʼapimo ago neʼa hano huʼnae, huno ha paiʼnigenoʼaeʼmo, 4#Mt 12:48; Yo 19:26Ane, huno, Nagaemo hisuva kavaʼmo kagae aliʼyaʼmo ohaneʼnifa nagaiʼni aliʼyaʼmo haneʼniye. Nagae afinaʼmo afole oʼaiʼniye, huno ha paiʼniye.
5 #
Yo 7:30; 8:20 Yesu itaʼamoʼmo aliʼyaʼmo neʼaliya vayaʼaifeʼmo hunoʼaeʼmo, na agufa kavaʼmo hiyo, huno lapa paisifi geʼamo akame huta hiyo, huno hapa paiʼniye. 6#Mk 7:3-4Ani nopiʼmo sigisiʼa yafa ani keʼmo haneʼnigeno Yu vayaʼai mono kavaʼapimo akame huʼa aniʼmo nefalaya keʼmo haneʼniye. Ani kepiʼmo teniʼa paketi aniʼmo haneʼnisifi fifitiniʼa paketi aniʼmo haneʼnisifi huʼniya ani keʼmo haneʼniye. 7Yesuʼa aliʼyaʼmo neʼaliya vayaʼaifeʼmo hunoʼaeʼmo, utapa aniʼmo hefiliteta muki keʼafiʼmo lakitapa havai teyo, huno hapa paiʼnigeʼa uʼa hefili eʼa lakiʼa havai teʼnagenoʼaeʼmo, 8ani ani kepatiʼmo hefilitutapa neʼyateʼmo yagaiʼniya vekamo amiyo, huno hapa paiʼniye. Anilafaʼmo hefiliʼa uʼa amiʼnageno neno afi geʼniye. 9Agaemo nofi alagafati aniʼmo alino hamaleno ateʼniya anikeʼmo neʼniye. Haiyaʼalegatiʼmo ani nofi alagafati aniʼmo aliniʼa eʼnafi huno oʼageʼniyaʼmonanafa aliʼyaʼmo neʼaliya vayaʼmogi ani aniʼmo he fiʼapaekeʼmo ageʼnae. Netenoʼaeʼmo aʼmo aliʼniya vekaeʼmo ge huʼnigeno eʼnigeno ha painoʼaeʼmo, 10muki vayaʼmogimo hogoteʼa neʼyaʼmo neʼnaya yateʼmo eʼa maiʼnaya vayaʼmo alagepa nofi alagafati anikeʼmo lakiʼa apamiʼnageʼa asole aniʼmo netageʼapaekeʼmo henagaʼageʼmo hosuʼniya nofi alagafati aniʼmo neʼapamiye. Ani kavaʼmo nehayaʼmonanafa kagaemo hemenimo alagepa nofi alagafati aniʼmo maleka maiʼneka alinikeka nelamine, huno ha paiʼniye. 11#Lu 9:32; Yo 1:14; 4:54; 11:40Yesuʼa hogote afinaʼmo ani noʼagaya agufa aune kavaʼmo Kena taonifiʼmo huʼniye. Ani taonifiʼmo ha le konali yaʼamo alino apave liʼnigeʼapaeʼmo geʼamo neʼafiya vayaʼmogimo agaefeʼmo apakesamo afiʼa fatago huʼnae.
12 #
Mt 4:13
Henagaʼamo Yesuʼagi itaʼamoʼagi aganaʼamogimogi geʼamo neʼafiya vayaʼagi huʼa Kapeneyamu taonifiʼmo uʼa aise afinaʼmo maiʼnae.
Yesuʼa Yu vayaʼai alopa mono nopiʼmo uno haiʼniya gemae
(Mt 21:12-13; Mk 11:15-17; Lu 19:45-46)
13 #
Hat 12:1-27; Yo 6:4; 11:55 Yu vayaʼai hopa afinaʼmo Pasova neʼyaʼmo neʼnaya afinaʼmo ago hogo huʼnigenoʼaeʼmo Yesuʼa Yulusalemu taonifiʼmo uʼniye. 14Uno Yu vayaʼmogi alopa mono nopiʼmo uno haino apakeyana ani vayaʼmogimo pulumakagi sipisipigi namagi huʼa maketi nehaya vayaʼmo maige alu nofi vayaʼai monimo alagi aliteʼa Yu nofi vayaʼai monimo aliteʼa neʼapamiya vayaʼmo maige huʼnageno apakeʼniye. 15Agaemo nofiʼmo alino ana aeno nofi kayoʼmo alo huno aliʼneno sipisipiʼe pulumaka anagaʼeʼmo alino hapafaitalegeʼa kumatega apaune hetaleʼa uʼa lamiʼnae. Agaemo alu nofi vayaʼai monimo aliteʼa Yu nofi vayaʼai monimo aliteʼa neʼapamiya vayaʼai hiʼyalamuʼapimo alino agoʼya faino ataleteno laga moniʼapimo alino aino atagu faeno ataleʼniye. 16#Lu 2:49Agaemo namamo maketi nehaya vayaʼaifeʼmo hunoʼaeʼmo, afoʼnimo nopiʼmo situvamo malegekana agufa kavaʼmo nehagi ani namamo alinita viyo, huno hapa paiʼniye. 17#Sam 69:9Ani afinaʼmo geʼamo neʼafiya vayaʼmogi Goti mukufiʼmo avoʼmo kae maleʼniya geʼaeʼmo apakesamo afiʼa ho huʼnae. Ani gemoʼmo hunoʼaeʼmo, kagae noʼmo alagepa huno hanesiyafeʼmo naya mukiki nehuva kavaʼmo atagana huno leno nasaga liʼniye, huno huʼniye. 18Ani kavaʼmo huʼnigeʼapaeʼmo Yu vayaʼmogi ageteʼa, kagaemo ani kavaʼmo nehanaʼmofeʼmo na agufa alagena yaʼmo neʼyagaina yaʼmo aliʼnapigi alika lave liyo, huʼa afi geʼnae. 19#Mt 21:23; 26:61; 27:40; Ap 6:14Afi geʼnagenoʼaeʼmo, mani Goti mono noʼamo heta halagape vaisageʼnaeʼmo loleʼe magoʼe afinaʼmo halate kiʼna hano huguve, huno hapa paiʼnigeʼapaeʼmo, 20asole vayaʼmogimo, foti sigisiʼa kafugafiʼmo kime kime eʼa kiʼa hano huʼnayaʼmonanafa kagaemo loleʼe magoʼe afinaʼmo halate kika hano hugapiye, huʼa afi geʼnayaʼmonanafa 21#1 Ko 6:19Yesuʼa agaiʼa agufaeʼmo huʼniye. 22#Lu 24:6-8; Yo 12:16; 14:26Gotiʼa faliʼniyatetiʼmo halate alino he tino ateʼnigeʼapaeʼmo geʼamo neʼafiya vayaʼmogi ani huʼniya geʼaeʼmo apakesamo afiʼa ho huteʼapaeʼmo Goti Mukufiʼmo avoʼmo kae maleʼniya geʼe Yesuʼa huʼniya geʼeʼmo apakesa afiʼa fatago huʼnae.
Yesuʼa muki vayaʼai apaipafiʼmo apakeʼniya gemae
23 #
Yo 7:31
Pasova neʼyaʼmo neʼnaya afinaʼmo Yesuʼa Yulusalemu taonifiʼmo maiʼnenoʼaeʼmo noʼagaya agufa aune kavaʼmo huʼnigeʼapaeʼmo asole vayaʼmogimo ageteʼa agaefeʼmo apakesamo afiʼa fatago huʼnae. 24Huʼnayaʼmonanafa Yesuʼa muki ma mopafi vayaʼai apaipafiʼmo ago apakeʼniyaʼmofeʼmo alagi lama gemo nehae, huno agesa oʼafiʼnifa afaʼa yagu yaga huno maiʼniye. 25#Mk 2:8Mago gemo afino alagepa huteno apakesiyafeʼmo mago vayaʼmogi apava gemo huʼa ha opaigafa agaiʼageʼmo muki ma mopafi vayaʼai apaipafiʼmo ago apakeʼniye.
Currently Selected:
Yoni 2: kyg2013
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.