Roma 9
9
Lesa na bantu bakwe abena Israeli
1Ifyo ndelanda fyacine cine. Nshilebepa iyoo, ndelanda ifi pa menso yakwa Kristu. Elyo na kampingu wa mutima wandi uutungululwa na Mupashi Wamushilo, nao nashininkisha ukuti nshilebepa iyoo. 2Ala ndomfwa ubulanda nganshi, kabili umutima wandi ukalipafye lyonse pa mulandu wa bantu bandi aba mu mutundu wandi. 3Kuti nafwaya nokuti Lesa andapisha, amfumye na kuli Kristu pa mulandu wa bena Israeli! 4Aba bantu abo Lesa umwine aisalile, abacita na bana bakwe. Bashukila no bucindami bwakwe. Apangene nabo ifipangano, abapeele na Mafunde yakwa Mose. Bena alibalangile ne fyakupepa Lesa mu cishinka, abalaile ne filayo. 5Bena ba mu lupwa lwa fikolwe fyalumbuka ifya mikowa yesu. Na Kristu wine muli bumuntu bwakwe, wa mu mushobo wabo. Ni Lesa uuteeka fyonse, abantu bengalamulumba pe na pe! Ameni.
6Kanshi nshileeba nati Lesa tafikilisha ico alaile, awe iyoo. Pantu abo Lesa asala ukuba abantu bakwe, te bonse abantu ba mu Israeli. 7#Icite 21:12Kabili te bonse aba mu lupwa lwakwa Abrahamu baba abana bene bene bakwa Lesa. Lesa aebele Abrahamu ati, “Ni kuli Isaki eko ukakwatila abantu ba mu lupwa lobe.” 8Kanshi ici calola mukuti, tekufyalwafye mu musango wabuntunse ekulenga ukuba abana bakwa Lesa. Lelo bana abafyalwa ukulingana ne cilayo Lesa alaile, abo e ba lupwa lwakwa Abrahamu abene bene. 9#Icite 18:10Pantu amashiwi Lesa alailemo Abrahamu icilayo ni aya ayakuti, “Nkabwela pa nshita iyalinga, na Sara akaba no mwana umwaume.” 10Kabili teici ceka, Rebeka afyele abana babili bampundu kuli shibo umo wine Isaki icikolwe cesu. 11Ilyo aba bana bashilati bafyalwe, nangu ukucita icisuma nangu icibi, Lesa aebele Rebeka ati, “Umukalamba eukalatumika umwaice.” 12#Icite 25:23Kanshi Lesa aletulanga ukuti umwine eusala. Tasala ico umuntu abombapo cimo. Lesa asalafye uo umwine atemenwe ukwita. 13#Mala 1:2-3Kabili calembwa ukuti, “Natemenwe Yakobo, napatile Esau.”
14Nga kanshi tuleti shani? Bushe Lesa aba no muncishanya? Awe iyoo. 15#Ukuf 33:19Pantu Lesa aebele Mose ati, “Nkabelela uluse uo ndefwaya ukubelela uluse. Nkalangulukila uo ndefwaya ukulangulukila.” 16Kanshi tacaba kufyo umuntu alefwaya nangu kufyo engacita, lelo cabafye ku luse lwakwa Lesa. 17#Ukuf 9:16Kabili mu Malembo Yamushilo, calembwa ukuti Lesa aebele Falao ati, “Nakubika pa bufumu pakuti nange amaka yandi mukukubomfya na pakuti ishina lyandi lishibikwe isonde lyonse.” 18Kanshi Lesa abelela uluse umuntu uo alefwaya ukubelela uluse. Elyo alomalalika umutima wa muntu uo alefwaya ukuti umutima wakwe umalale.
Ubukali bwakwa Lesa no luse lwakwe
19Umo pali imwe, kuti anjipusha ati, “Nga efyo caba, nga kanshi umuntu kuti alufyanya shani kuli Lesa? Nga nani engakaanya Lesa?” 20#Esaya 29:16; 45:9We muntu we, bushe niwe ani uwakuti mulepaashanya na Lesa? Bushe inongo kuti yalailishanya ku waibumba aiti, “Cinshi ico wamumbila ifi?” 21Bushe umuntu uubumba inongo, takwata nsambu shakubomfya ibumba mu musango onse uo alefwaya? Kwibumba limo line kuti abumbako inongo iyakubomfya ku milimo iyikankala, elyo na imbi iyakubomfya lyonse.
22Kanshi ni shani nga cakuti Lesa nao afwaya ukulanga ubukali bwakwe nokuti abantu beshibe amaka yakwe? Lelo Lesa alabatekela umutima abantu abamukalifya umutima, nangufye balingile ukukandwa. 23Lesa acita ifyo pakulanga ubukankala bwa bucindami bwakwe ubo atukwatila mukutubelela uluse. Ifwe nifwe apekanishisha ukuti tukabe nankwe mu bucindami bwakwe. 24Nangu tube Abayuda nangu Abenafyalo, lelo nifwe bene Lesa aita. 25#Hosea 1:6-9; 2:23Kabili efyo Lesa asosa mu citabo cakwa kasesema Hosea ati,
“Abantu abashili bantu bandi,
nakulabeta ‘Abantu bandi.’
Umushobo nshatemenwe,
nakulawita ‘Umushobo natemwa.’ ”
Kabili,
26 #
Hosea 1:10
“Mu ncende ine umo Lesa alebeba ati,
‘Tamuli bantu bandi.’
Umo mwine emo Lesa wamweo akulabeta ati,
‘Muli bana bandi.’ ”
27 #
Esaya 10:22-23
Esaya nao asosa pa bena Israeli ati,
“Nangu abena Israeli bengafula ngo musensenga wa pa lulamba lwa bemba,
lelo banonofye ebakapusuka.
28Pantu Imfumu ikaputula bwangu bwangu
imilandu yonse iya bantu bonse pano isonde.”
29 # 9:29 Esaya 1:9 (LXX) Kabili efyo Esaya asobele kale ati,
“Imfumu umwine wa fita fyonse aikaanatushilapo bamo pa bantu besu,
awe nomba nga tulifye nga Sodoma,
nga tulingenefye na Gomora.”
Abena Israeli balikaana ukusumina Imbila Nsuma
30Nga kanshi tutile shani? Ee, kwena Abenafyalo tabalefwaya ukuba abakaele pa cinso cakwa Lesa, lelo ku mulandu wa cisumino cabo, balishukila ukuba abakaele pa cinso cakwa Lesa. 31Elyo abena Israeli bena abalefwaya ukuba abakaele pa cinso cakwa Lesa mukusunga Amafunde yakwa Mose, awe bena balifilililwafye. 32Cinshi bafililwa? Nico balefwaya ukuba abakaele pa cinso cakwa Lesa ku milimo balebomba te ku cisumino iyoo. Kanshi abena Israeli epakuwa ico baipununa ku libwe abantu baipununako. 33#Esaya 28:16Efyo calembwa ukuti,
“Moneni nabika ilibwe mu Sioni#9:33 Sioni: E shina limbi ya Yerusalemu.
ilyo abantu bakulaipununako.
Ilibwe lyakulabawisha.
Lelo onse uwamucetekela,
takekatwe ne nsoni.”
Currently Selected:
Roma 9: ILL15
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia
Roma 9
9
Lesa na bantu bakwe abena Israeli
1Ifyo ndelanda fyacine cine. Nshilebepa iyoo, ndelanda ifi pa menso yakwa Kristu. Elyo na kampingu wa mutima wandi uutungululwa na Mupashi Wamushilo, nao nashininkisha ukuti nshilebepa iyoo. 2Ala ndomfwa ubulanda nganshi, kabili umutima wandi ukalipafye lyonse pa mulandu wa bantu bandi aba mu mutundu wandi. 3Kuti nafwaya nokuti Lesa andapisha, amfumye na kuli Kristu pa mulandu wa bena Israeli! 4Aba bantu abo Lesa umwine aisalile, abacita na bana bakwe. Bashukila no bucindami bwakwe. Apangene nabo ifipangano, abapeele na Mafunde yakwa Mose. Bena alibalangile ne fyakupepa Lesa mu cishinka, abalaile ne filayo. 5Bena ba mu lupwa lwa fikolwe fyalumbuka ifya mikowa yesu. Na Kristu wine muli bumuntu bwakwe, wa mu mushobo wabo. Ni Lesa uuteeka fyonse, abantu bengalamulumba pe na pe! Ameni.
6Kanshi nshileeba nati Lesa tafikilisha ico alaile, awe iyoo. Pantu abo Lesa asala ukuba abantu bakwe, te bonse abantu ba mu Israeli. 7#Icite 21:12Kabili te bonse aba mu lupwa lwakwa Abrahamu baba abana bene bene bakwa Lesa. Lesa aebele Abrahamu ati, “Ni kuli Isaki eko ukakwatila abantu ba mu lupwa lobe.” 8Kanshi ici calola mukuti, tekufyalwafye mu musango wabuntunse ekulenga ukuba abana bakwa Lesa. Lelo bana abafyalwa ukulingana ne cilayo Lesa alaile, abo e ba lupwa lwakwa Abrahamu abene bene. 9#Icite 18:10Pantu amashiwi Lesa alailemo Abrahamu icilayo ni aya ayakuti, “Nkabwela pa nshita iyalinga, na Sara akaba no mwana umwaume.” 10Kabili teici ceka, Rebeka afyele abana babili bampundu kuli shibo umo wine Isaki icikolwe cesu. 11Ilyo aba bana bashilati bafyalwe, nangu ukucita icisuma nangu icibi, Lesa aebele Rebeka ati, “Umukalamba eukalatumika umwaice.” 12#Icite 25:23Kanshi Lesa aletulanga ukuti umwine eusala. Tasala ico umuntu abombapo cimo. Lesa asalafye uo umwine atemenwe ukwita. 13#Mala 1:2-3Kabili calembwa ukuti, “Natemenwe Yakobo, napatile Esau.”
14Nga kanshi tuleti shani? Bushe Lesa aba no muncishanya? Awe iyoo. 15#Ukuf 33:19Pantu Lesa aebele Mose ati, “Nkabelela uluse uo ndefwaya ukubelela uluse. Nkalangulukila uo ndefwaya ukulangulukila.” 16Kanshi tacaba kufyo umuntu alefwaya nangu kufyo engacita, lelo cabafye ku luse lwakwa Lesa. 17#Ukuf 9:16Kabili mu Malembo Yamushilo, calembwa ukuti Lesa aebele Falao ati, “Nakubika pa bufumu pakuti nange amaka yandi mukukubomfya na pakuti ishina lyandi lishibikwe isonde lyonse.” 18Kanshi Lesa abelela uluse umuntu uo alefwaya ukubelela uluse. Elyo alomalalika umutima wa muntu uo alefwaya ukuti umutima wakwe umalale.
Ubukali bwakwa Lesa no luse lwakwe
19Umo pali imwe, kuti anjipusha ati, “Nga efyo caba, nga kanshi umuntu kuti alufyanya shani kuli Lesa? Nga nani engakaanya Lesa?” 20#Esaya 29:16; 45:9We muntu we, bushe niwe ani uwakuti mulepaashanya na Lesa? Bushe inongo kuti yalailishanya ku waibumba aiti, “Cinshi ico wamumbila ifi?” 21Bushe umuntu uubumba inongo, takwata nsambu shakubomfya ibumba mu musango onse uo alefwaya? Kwibumba limo line kuti abumbako inongo iyakubomfya ku milimo iyikankala, elyo na imbi iyakubomfya lyonse.
22Kanshi ni shani nga cakuti Lesa nao afwaya ukulanga ubukali bwakwe nokuti abantu beshibe amaka yakwe? Lelo Lesa alabatekela umutima abantu abamukalifya umutima, nangufye balingile ukukandwa. 23Lesa acita ifyo pakulanga ubukankala bwa bucindami bwakwe ubo atukwatila mukutubelela uluse. Ifwe nifwe apekanishisha ukuti tukabe nankwe mu bucindami bwakwe. 24Nangu tube Abayuda nangu Abenafyalo, lelo nifwe bene Lesa aita. 25#Hosea 1:6-9; 2:23Kabili efyo Lesa asosa mu citabo cakwa kasesema Hosea ati,
“Abantu abashili bantu bandi,
nakulabeta ‘Abantu bandi.’
Umushobo nshatemenwe,
nakulawita ‘Umushobo natemwa.’ ”
Kabili,
26 #
Hosea 1:10
“Mu ncende ine umo Lesa alebeba ati,
‘Tamuli bantu bandi.’
Umo mwine emo Lesa wamweo akulabeta ati,
‘Muli bana bandi.’ ”
27 #
Esaya 10:22-23
Esaya nao asosa pa bena Israeli ati,
“Nangu abena Israeli bengafula ngo musensenga wa pa lulamba lwa bemba,
lelo banonofye ebakapusuka.
28Pantu Imfumu ikaputula bwangu bwangu
imilandu yonse iya bantu bonse pano isonde.”
29 # 9:29 Esaya 1:9 (LXX) Kabili efyo Esaya asobele kale ati,
“Imfumu umwine wa fita fyonse aikaanatushilapo bamo pa bantu besu,
awe nomba nga tulifye nga Sodoma,
nga tulingenefye na Gomora.”
Abena Israeli balikaana ukusumina Imbila Nsuma
30Nga kanshi tutile shani? Ee, kwena Abenafyalo tabalefwaya ukuba abakaele pa cinso cakwa Lesa, lelo ku mulandu wa cisumino cabo, balishukila ukuba abakaele pa cinso cakwa Lesa. 31Elyo abena Israeli bena abalefwaya ukuba abakaele pa cinso cakwa Lesa mukusunga Amafunde yakwa Mose, awe bena balifilililwafye. 32Cinshi bafililwa? Nico balefwaya ukuba abakaele pa cinso cakwa Lesa ku milimo balebomba te ku cisumino iyoo. Kanshi abena Israeli epakuwa ico baipununa ku libwe abantu baipununako. 33#Esaya 28:16Efyo calembwa ukuti,
“Moneni nabika ilibwe mu Sioni#9:33 Sioni: E shina limbi ya Yerusalemu.
ilyo abantu bakulaipununako.
Ilibwe lyakulabawisha.
Lelo onse uwamucetekela,
takekatwe ne nsoni.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zambia