مزامیر ۳۳
۳۳
خوداوندٚ چومأن کسأنی‌یَ فندره کی اونٚ جأ حیساب بریدی
۱ اَی دوروستکارٚ آدمأن، خوداوندٚ رِه، شادی اَمرأ آواز بخوأنید!
چره کی راست‌دیلأن وأ اونَ ستایش بوکونید.
۲ خوداوندَ بربطٚ اَمرأ ستایش بوکونید!
چنگٚ ده تارٚ مره اونٚ رِه آهنگ بزنید!
۳ خودا رِه تازه سرود بخوأنید!
خوروم ساز بزنید، آهنگٚ بولندٚ اَمرأ.
۴ چره کی خوداوندٚ کلام راست و دوروسته،
و اونٚ همه‌تأ کارأن وفاداری اَمرأ‌یه.
۵ اون، عدل و اینصافَ دوس دأره؛
دونیا خوداوندٚ موحبتٚ جأ پوره.
۶ آسمانأن، خوداوندٚ کلامٚ اَمرأ چأکوده بوبوستید
و تومامٚ آسمانٚ ستاره‌یأن، اونٚ دَهنٚ نٚفٚسٚ اَمرأ.
۷ خوداوند، تومامٚ دریا آبأنَ سربسر جمَ کونه؛
و جولفٚ آبأنَ ایتأ جا تلنبارَ کونه.
۸ تومامٚ دونیا مردومأن، خوداوندٚ جأ حیساب ببرید،
تومامٚ مردومأنی کی زیمینٚ سر زندگی کونیدی، اونَ حورمت بنید.
۹ چره کی اون بوگفته و بوبوسته.
اَمر بفرمأسته، و برپا بوبوسته.
۱۰ خوداوند، قومأنٚ نقشه‌یأنَ باطیلَ کونه؛
اوشأنٚ بد نیّتأنَ جٚه بین بره.
۱۱ ولی خوداوندٚ نقشه‌یأن تا اَبد خو جا سر نهَه
و اونٚ دیلٚ فیکر تومامٚ نسلأنٚ میأن.
۱۲ خوش بحالٚ قومی کی یهوه اوشأنٚ خودایه،
او مردومأنی کی خودا خو ارث و میراثٚ وأسی اینتخاب بوکوده!
۱۳ خوداوند آسمانٚ جأ فندره
و تومامٚ آدمی زادأنَ دینه؛
۱۴ جٚه خو جاجیگاه دورون فندره،
تومامٚ مردومأنی‌یَ کی زیمینٚ سر زندگی کونیدی،
۱۵ خودایی کی تومامٚ اوشأنٚ دیلأنَ خلق بوکوده
و جٚه هر کاری‌یم کی بوکونید، وأخبره.
۱۶ ایتأ پادشایَ، اونٚ پیله لشکر نجات نده
و ایتأ پألوانم، اونٚ زور و بازو خلاصَ نوکونه.
۱۷ اسبَ اومید دٚوٚستن، پیروزَ بوستنٚ رِه هَچین بیخوده،
چره کی خو زور و قوّتٚ اَمرأ نتأنه کسی‌یَ نجات بده.
۱۸ رأس رأسی خوداوندٚ چومأن کسأنی‌یَ فندره کی اونٚ جأ حیساب بریدی،
اوشأنی‌یَ کی خودا موحبتَ اومید دأریدی،
۱۹ کی اوشأنٚ جانَ مرگٚ جأ نجات بده
و اوشأنَ قحطی موقع زنده بدأره.
۲۰ اَمأن خوداوندٚ رافا ایسَه‌ییم؛
اون اَمی یار و یاور و اَمی سپره.
۲۱ اَمی دیل اونٚ وأسی شادی کونه
چونکی اونٚ موقدّسٚ نامَ توکل دأریمی.
۲۲ اَی خوداوند، تی موحبت اَمی اَمرأ بمأنه
هوطو کی اَمأن ترَ اومید دأریم!
Currently Selected:
مزامیر ۳۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
