مَرقُس ۶
۶
ناصره مردومٚ بی ایمانی
۱ بأزین عیسی جٚه اویه رأ دکفته و خو شاگردأنٚ اَمرأ بوشو خو شهر. ۲ شبّاتٚ روز کی فأرسه، شروع بوکوده کنیسه دورون تعلیم دَئن. خیلی‌یأن اونٚ گبأنٚ ایشتأوستنٚ اَمرأ تعجب کودیدی. اوشأن گفتیدی: «اَ مردأی تومامٚ اَشأنَ جٚه کویه بدس بأورده؟ اَن چی حکمتی ایسه کی اونَ عطا بوبوسته؟ و اَن چی معجزه‌یأنی ایسه کی اونٚ دسٚ اَمرأ انجام به؟ ۳ مگه اون هو نجار نی‌یه؟ مگه مریمٚ پسر و یعقوب و یوشا و یهودا و شمعونٚ برأر نی‌یه؟ مگه اونٚ خأخورأن اَیه اَمی میأن زندگی نوکونیدی؟» پس اوشأنٚ رِه بد جلوه بوکوده. ۴ عیسی اوشأنَ بوگفته: «پیغمبر بی حورمت نیبه جز خو شهرٚ میأن و خو خانه و خانواده دورون!» ۵ اون نتأنسته اویه هیتّأ معجزه بوکونه، غیرٚ اَنکی خو دسَ چن‌تأ مریضٚ سر بنَه و اوشأنَ شفا بدَه. ۶ اون، اوشأنٚ بی‌ایمانی وأسی خیلی تعجب بوکوده.
دوازده‌تأ رسولٚ مأموریت
بأزین عیسی او دور و ورٚ دیهأتأنٚ میأن گردستی و تعلیم دَیی. ۷ اون، او دوازده‌تأ رسولَ خو ورجأ دوخوأده و اوشأنَ دوتأ دوتأ اوسه کوده و اوشأنَ قوّت و ایجازه فأدَه کی بتأنید پلیدٚ روحأنَ بیرونَ کونید. ۸ اوشأنَ دستور بدَه: «سفرٚ وأسی جز ایتأ چوب‌دسی شیمی اَمرأ هیچی اونسَنید، نه نان، نه بقچه و نه پول شیمی کمر قئشٚ دورون. ۹ کفش دوکونید، ولی ایضافه پیرهن دونکونید. ۱۰ تا وختی او شهرٚ دورون ایسَه‌ییدی، هو خانه دورون کی جٚه اوّل بوشو بید، بِئسید. ۱۱ و اگه ایجا شمرَ قوبیل نوکونید، یا شیمی گبأنَ گوش نوکونید، وختی جٚه اویه شوئون دریدی، شیمی پا خاکَ بتکأنید، کی اوشأنٚ ضد ایتأ شهادت ببه.» ۱۲ پس اوشأن بوشوییدی و مردومٚ رِه موعظه کودیدی کی وأستی توبه بوکونید. ۱۳ اوشأن خیلی دیوأنَ بیرونَ کودید و خیلی مریضأنَ روغنٚ اَمرأ مسح بوکودید و شفا ببخشه‌ییدی.
یحیی کی تعمید دَیی بوکوشته به
۱۴ پادشا هیرودیس اَ ماجرایَ بیشتأوسته، چره کی عیسی نام مشهورَ بوسته. بعضٚ مردومأن گفتیدی: «یحیی کی تعمید دَیی مورده‌یأنٚ جأ ویریشته و هَنٚ وأسی ایسه کی اَ معجزه‌یأن اونٚ جأ ظاهیرَ به.» ۱۵ بعضی‌یأنم گفتیدی: «ایلیاسه.» ایتأ عیدّه‌یم گفتیدی: «اون پیغمبره، ایتأ قدیمٚ پیغمبرأنٚ مأنستن.» ۱۶ ولی وختی هیرودیس اَنَ بیشتأوسته، بوگفته: «اَن هو یحیایه کی دستور بدَم اونٚ سرَ وَوینید و هسأ مورده‌یأنٚ جأ ویریشته!»
۱۷ چره کی خودٚ هیرودیس دستورٚ اَمرأ اونَ بیگیفتیدی، دٚوٚستیدی و زندأن تأودَه‌ییدی. هیرودیس اَ کارَ هیرودیا وأسی بوکوده. هیرودیا، هیرودیسٚ برأر فیلیپُسٚ زن بو کی اَسأ هیرودیس اونَ ببرده‌بو. ۱۸ یحیی هیرودیسَ گفتی: «جایز نی‌یه کی تو تی برأر زنٚ اَمرأ بیبی.» ۱۹ هَنٚ وأسی هیرودیا خو دیلٚ دورون یحیی جأ کینه دأشتی و خوأستی اونَ بوکوشه، ولی نتأنستی ۲۰ چونکی هیرودیس یحیی جأ ترسه‌یی، چره کی اونَ ایتأ دوروستکار و موقدّسٚ مردأی دأنستی و هَنٚ وأسی اونٚ جأ موحافظت کودی. هر وخت یحیی گبأنَ ایشتأوستی، حیران و پریشأنَ بوستی. ولی بأزم دوس دأشتی اونٚ گبأنَ گوش بده.
۲۱ بیلاخره خوروم موقع فأرسه. هیرودیس خو تولدٚ روزٚ رِه ایتأ پیله مهمانی بپا بوکوده و دربارٚ آدمأن و نظامی فرمانده‌یأن و جلیلٚ پیله کسأنَ دعوت بوکوده. ۲۲ هیرودیا دُختر بمو مجلسٚ دورون و رقص بوکوده و هیرودیس و اونٚ مهمانأنَ خوشحالَ کوده. بأزین پادشا دُخترئکَ بوگفته: «هر چی خوأیی می جأ درخوأست بوکون کی اونَ ترَ فأدم.» ۲۳ هَطویم قسم بوخورده و بوگفته: «هر چی، حتی اگه نیصفٚ می مملکتَ می جأ بخوأیی، ترَ فأدم.» ۲۴ اون بوشو بیرون و خو مارَ بوگفته: «چی درخوأست بوکونم؟» اونٚ مار جواب بدَه: «یحیی سرَ.» ۲۵ دُختر فوری وأگردسته پادشا ورجأ و بوگفته: «تی جأ درخوأست کونم هسأ یحیی سرَ ایتأ موجمأ میأن مرَ فأدی.» ۲۶ پادشا خیلی ناراحتَ بوسته، ولی خو قسم و خو مهمانأنٚ ایحترامٚ وأسی اونٚ خوأسته‌یَ ردَّ نوکوده. ۲۷ پس فوری ایتأ جلاد اوسه کوده و دستور بدَه یحیی سرَ بأوره. اون، زندانٚ دورون یحیی سرَ وأوِه ۲۸ و اونَ ایتأ موجمأ میأن بنَه بأورده دُخترئکَ فأدَه. اونم اونَ فأدَه خو مارَ. ۲۹ وختی یحیی شاگردأن اَ ماجرایَ بیشتأوستید بمویید و اونٚ جسدَ اوسأدیدی و قبرٚ دورون بنَه‌ییدی.
عیسی پنج هیزار مردأکَ سِئرَ کونه
۳۰ رسولأن عیسی ورجأ دورٚ هم جمَ بوستید و هر چی کی بوکوده‌بید و مردومَ تعلیم بدَه‌بید اونٚ رِه واگویا بوکودید. ۳۱ عیسی اوشأنَ بوگفته: «می اَمرأ بأیید بیشیم ایتأ خلوتٚ جیگا ایپچه ایستراحت بوکونید.» چونکی اَنقدر مردوم شوئون اَمون کودیدی کی فرصت نأشتیدی حتی ایپچه نان بوخورید. ۳۲ پس فقط خودشأن، کرجی اَمرأ رأ دکفتید بوشویید ایتأ محل کی ایتأ پیچه دور ببه. ۳۳ ولی شوئونٚ موقع ایتأ عالمه مردومأن اوشأنَ بیده‌ییدی و بشنأختید. پس مردوم همه‌تأ شهرأنٚ جأ پیاده رأ دکفتیدی بوشوییدی هویه و قبلٚ اوشأن فأرسه‌یید او محل. ۳۴ وختی عیسی کرجی جأ پیادَه بوسته، بیده ایتأ عالمه مردوم اویه جمَ بوستید و اونٚ دیل اوشأنٚ وأسی بوسوخته، چره کی بی چوپانٚ گوسفندأنٚ مأنستن بید. پس شروع بوکوده خیلی چیزأن اوشأنَ تعلیم دَئن. ۳۵ غروب دم شاگردأن بموییدی اونٚ ورجأ و بوگفتیدی: «اَیه جٚه همه جا دوره، شبم دکفتَن دره. ۳۶ مردومَ اوسه کون کی بیشید اَ دور و ورٚ دیهأتأن و مزرعه‌یأن خوشأنٚ رِه غذا بیهینید.» ۳۷ عیسی اوشأنَ جواب بدَه: «شومأن خودتأن اوشأنَ غذا بدید.» بوگفتید: «ینی خوأیی بیشیم دویست دینأر نان بیهینیم و اوشأنَ فأدیم کی بوخورید؟» ۳۸ بفرمأسته: «بیشید بیدینید چن‌تأ نان دأریدی؟» پس وأورس وأورس بوکودیدی و بوگفتید: «پِنج‌تأ نان و دوتأ مأیی.» ۳۹ بأزون خو شاگردأنَ بوگفته کی تومامٚ مردومَ دسته دسته سبزه‌یأنٚ سر بینیشأنید. ۴۰ اَطویی مردوم صد نفر صد نفر و پنجاه نفر پنجاه نفر زیمینٚ سر بینیشتید. ۴۱ بأزین پِنج‌تأ نان و دوتأ مأیی‌یَ اوسأده، آسمانَ فندرسته و خودایَ شوکر بوکوده و نانأنَ تیکه تیکَه کوده فأدَه خو شاگردأنَ کی بنید مردومٚ ورجأ؛ دوتأ مأیی‌یم همه‌تأنٚ رِه سأم بوکوده. ۴۲ همه بوخوردید و سِئرَ بوستید ۴۳ و نان و مأیی خورده‌یأنٚ جأ، دوازده‌تأ سبد پورَ بوسته. ۴۴ فقط مردأکأنی کی نان بوخوردید پنج هیزار نفر بید.
عیسی آبٚ سر رأ شه
۴۵ عیسی فوری خو شاگردأنَ وأدأشته کی هوطو کی اون مردومَ اوسه کودَن‌دره کرجی‌یَ سوارَ بید و قبلٚ اون بیشید بیت‌صیدا کی دریاچه او طرف نهَه‌بو. ۴۶ وختی مردومَ رأهی بوکوده، خودش بوشو کوه جور کی دوعا بوکونه.
۴۷ وختی غروب دکفته، کرجی فأرسه‌بو دریاچه وسط و عیسی خوشکی دورون تنها بو، ۴۸ بیده کی شاگردأن عذابٚ اَمرأ پارو زِئن‌دریدی، چره کی باد برعکس اَمویی. تقریباً آخرای شب خروس خوأنٚ نزدیکی عیسی قدم زنأن آبٚ سر بوشو اوشأنٚ طرف و خوأستی جٚه اوشأنٚ کنار دوأره. ۴۹ ولی وختی شاگردأن اونَ بیده‌ییدی کی آبٚ سر رأ شوئون‌دره، خیال بوکودیدی روحه. پس ایدفعه‌یی فریاد بزه‌ییدی، ۵۰ وختی اونَ بیده‌یید، وحشت بوکودید ولی عیسی فوری اوشأنٚ اَمرأ گب بزه و بفرمأسته: «شیمی دیل قورص ببه، منم. نوأ ترسئنید!» ۵۱ بأزین بمو اوشأنٚ ورجأ کرجی دورون و باد بِئسه. اوشأن قاقَ بوسته‌بید ۵۲ چره کی نانٚ معجزه‌یَ کی نفأمسته‌بید هیچ، اوشأنٚ دیلم سختَ بوسته‌بو.
عیسی جنیسارتٚ سرزیمینٚ مریضأنَ شفا دهه
۵۳ وختی فأرسه‌ییدی دریاچه او طرف، جنیسارتٚ سرزیمینٚ دورون بِئسَه‌ییدی و لنگر تأودَه‌ییدی. ۵۴ هَطو کی قایقٚ جأ پیادَه بوستیدی، مردوم فوری عیسایَ بشنأختیدی ۵۵ و بودُو بودُو بوشوییدی تومامٚ او دور و اطرافٚ ناخوشٚ آدمأنَ بنَه‌ییدی تختٚ سر و ببردیدی هر جایی کی ایشتأوستیدی عیسی اویه ایسَه. ۵۶ هر جا عیسی شویی، چی دیهأت، چی شهر، چی مزرعه، مردوم خوشأنٚ مریضأنَ میدانأنٚ میأن نه‌ییدی و اونٚ جأ ایلتماس کودیدی کی وئله اقلٚ کم اونٚ لیباس پره‌یَ دس بزنید؛ و هر کی دس زه‌یی شفا گیفتی.
Currently Selected:
مَرقُس ۶: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
