مَرقُس ۳
۳
ایتأ مردأکٚ دسٚ شفا گیفتن، شَبّاتٚ روزٚ رِه
۱ عیسی ایوار دِه بمو کنیسه دورون. ایتأ مردای اویه ایسَه‌بو کی اونٚ ایتأ دس خوشکَ بوسته‌بو. ۲ بعضیأن خوشأنٚ نیگا اَمرأ عیسایَ پأستیدی کی اگه شَبّاتٚ روزٚ رِه او مردأکَ شفا بده، ایتأ بهانه بدأرید کی عیسایَ محکوم بوکونید. ۳ عیسی او مردأکَ کی اونٚ دس خوشکَ بوسته‌بو بوگفته: «ویریز، همه‌تأنٚ جُلُو بپا بِئس.» ۴ بأزین اوشأنَ وأورسه: «ینی شَبّاتٚ روزٚ دورون خُبی کودن جایز ایسه یا بدی کودن؟ اینفرٚ جانَ نجات دَئن یا کوشتن؟» ولی اوشأن ساکیت بِئسَه‌یید. ۵ عیسی غیظٚ اَمرأ اوشأنی‌یَ کی اونٚ دور و ور ایسَه‌بید فندرسته و ناراحت جٚه اوشأنٚ سنگدیلی، او مردأکَ بوگفته: «تی دسَ درازَ کون.» اون، خو دسَ درازَ کوده و اونٚ دس سالمَ بوسته. ۶ بأزین فریسیأن فوری بوشویید بیرون و هَطو هیرودیأنٚ اَمرأ مشورت کودیدی کی چوطو عیسایَ بوکوشید.
ایتأ عالمه مردوم عیسی دونبألسر
۷ بأزین عیسی خو شاگردأنٚ اَمرأ بوشوییدی دریاچه طرف. ایتأ عالمه جٚه جلیلٚ آدمأن اونٚ دونبألسر رأ دکفتید. ۸ هَطویم مردومأنٚ زیادی جٚه یوهودیه و اورشلیم و اَدومیه و ناحیه‌یأنی کی اردنٚ روخانٚ او طرف نهَه‌بید و صور و صیدونٚ دور و ور، بموییدی اونٚ ورجأ، چره کی تومامٚ اونٚ کارأنٚ خبرَ بیشتأوستیدی. ۹ اَنقدر جمعیت زیاد بو کی عیسی خو شاگردأنَ بفرمأسته ایتأ لوتکایَ اونٚ رِه حاضرَ کونید کی مردوم اونٚ رو هوجوم نأوردید. ۱۰ چونکی خیلی‌یأنَ شفا بدَه‌بو، تومامٚ اوشأنی کی درد دأشتیدی، هوجوم اَوردید کی بتأنید اونَ لمس بوکونید. ۱۱ هر وخت پلیدٚ روحأن اونَ ده‌ییدی، اونٚ جُلُو خاکٚ سر کفتیدی و فریاد زه‌ییدی: «تو خودا پسری!» ۱۲ ولی اون اوشأنَ حوکم کودی کی هیکسَ نیگید اون کی ایسه.
دوازده‌تأ رسولٚ اینتخاب کودن
۱۳ عیسی بوشو ایتأ کوه جور و اوشأنی‌یَ کی خوأستی، خو ورجأ دوخوأده و اوشأن بمویید. ۱۴ اون، دوازده نفرَ اینتخاب بوکوده و اوشأنَ «رسول» دوخوأده، کی اونٚ اَمرأ همرأه بیبید و بتأنه اوشأنَ موعظه کودنٚ وأسی اوسه کونه ۱۵ و ایقتدار بدأرید کی دیوأنَ بیرونَ کونید. ۱۶ او دوازده نفری کی اینتخاب بوکوده اَشأن بید: شمعون، کی اونَ پطرس نام بنَه؛ ۱۷ یعقوب زِبدی پسر و اونٚ برأر یوحنا کی اوشأنَ «بوآنرجس»، ینی «گورخانه پسرأن» لقب فأدَه؛ ۱۸ آندریاس، فیلیپُس، برتولما، متّی، توما، یعقوب حلفایٚ پسر، تَدّای، شمعونٚ غیور ۱۹ و یهودایٚ اسخریوطی کی عیسایَ خیانت بوکوده.
عیسایٚ مسیح، کی قوّتٚ اَمرأ شیطانَ بیرونَ کونه؟
۲۰ بأزین عیسی بوشو بخانه، ایوار دِه ایتأ عالمه مردوم جمَ بوستید، جوری کی عیسی و اونٚ شاگردأنٚ رِه مجالٚ غذا خوردن نوبو. ۲۱ وختی عیسی فک و فامیلأن اَنَ بیشتأوستید، رأ دکفتید کی اونَ اوسأنید و خوشأنٚ اَمرأ ببرید چره کی گفتیدی: «خو اختیارَ جٚه دس بدَه.» ۲۲ دینٚ علمایم کی اورشلیمٚ جأ بمو بید گفتیدی: «بَعَلزبول#۳:۲۲ «بَعَلزبول» ینی شیطأن. دأره و دیوأنَ، اوشأنٚ رئیسٚ کومکٚ اَمرأ بیرونَ کونه.» ۲۳ پس عیسی اوشأنَ دوخوأده و اوشأنٚ رِه چن‌تأ مٚثٚل بأورده و بوگفته: «چوطو ایمکأن دأره کی شیطأن، شیطانَ بیرونَ کونه؟ ۲۴ اگه ایتأ سلطنت خو ضد سیوأ ببه، نتأنه پابرجا بمأنه. ۲۵ هَطویم اگه ایتأ خانه خو ضد سیوأ ببه، او خانه نتأنه پابرجا بمأنه. ۲۶ شیطأنم اگه خودشٚ ضد ویریزه و سیوأ ببه، نتأنه دوأم بأوره، بلکی اونٚ کار تومامَ بوسته. ۲۷ ینی هیکس نتأنه ایتأ قوی مردأکٚ خانه دورون بشه و اونٚ مال و منالَ بودوزأنه، مگه اَنکی اوّل اونٚ دس و پایَ دٚوٚده. بأزین تأنه اونٚ خانه اسبابأنَ غارت بوکونه.
۲۸ «آمین، شمرَ گم کی تومامٚ گونایأنی کی اینسأن کونه و هر کوفری کی بگه ببخشه به؛ ۲۹ ولی هر کی روح‌القدسَ کوفر بگه هیوخت ببخشه نیبه، بلکی اونٚ جرم اَبدی گوناهه.» ۳۰ عیسی اَ گب اَنٚ وأسی بو کی گفتیدی: «پلیدٚ روح دأره.»
عیسی مار و برأرأن
۳۱ بأزین عیسی مار و اونٚ برأرأن بموییدی. اوشأن بیرون بِئسَه‌ییدی و اینفرَ اوسه کودیدی کی اونَ دوخوأنه. ۳۲ مردومی کی عیسی دور نیشته‌بید، اونَ بوگفتید: «تی مار و تی برأرأن بیرون ایسَه‌ییدی و تی دونبأل گردیدی.» ۳۳ عیسی جواب بدَه: «می مار و می برأرأن کی‌یأنیدی؟» ۳۴ او وخت اوشأنی‌یَ کی اونٚ دور نیشته‌بید فندرسته و بوگفته: «اَشأن می مار و می برأرأنید! ۳۵ هر کی خودا ایراده‌یَ بجا بأوره می برأر، می خأخور و می ماره.»
Currently Selected:
مَرقُس ۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
