متّی ۹
۹
ایفلیجٚ شفا دَئن
۱ بأزین عیسی لوتکا سوارَ بوسته، بوشو خو شهر کی دریاچه اوطرف نهَهبو. ۲ اویه اینفرَ کی ایفلیج بو و رختخوابٚ سر درازَ کشهبو، اونٚ ورجأ بأوردیدی. عیسی اوشأنٚ ایمأنَ بیده و او شخصٚ ایفلیجَ بوگفته: «زأی جان، تی دیلَ قورصَ کون، تی گونایأن ببخشه بوبوسته!» ۳ هو وخت بعضی جٚه دینٚ علما خوشأنٚ ورجأ بوگفتیدی: «اَ مردای کفر گفتَن دره!» ۴ عیسی اوشأنٚ فیکرأنَ بفهمسته و بوگفته: «چره اَ پلیدٚ فیکرأنَ شیمی دیلٚ دورونی رأ دیهیدی؟ ۵ کویتأ گبٚ گفتن آسانتره؟ اَنکی ‹تی گونایأن ببخشه بوبوسته› یا اونکی ‹ویریز، رأ بوشو›؟ ۶ هسأ شِمره ثابت کونم کی اینسأنٚ پسر زیمینٚ سر اَ حقَ دأره کی گونایأنَ ببخشه.» بأزین او شخصٚ ایفلیجَ بوگفته: «ویریز، تی رختخوابَ اوسأن بوشو بخانه.» ۷ اونم ویریشته بوشو خو خانه. ۸ وختی مردوم اَ ماجرایَ بیدهییدی، بترسهییدی و خودایییَ کی اَجور قودرت اینسأنَ فدَهبو، پرستش بوکودیدی.
متّی عیسایَ پیروی کونه
۹ وختی عیسی او شهرَ ترکَ کودَن دوبو، ایتأ مردأکَ بیده کی اونٚ نام متّی بو. متّی جایی کی خراج فیگیریدی نیشتهبو. عیسی اونَ بوگفته: «می دونبألسر بیأ!» متّی ویریشته و اونٚ دونبألسر رأ دکفته بوشو.
۱۰ عیسی، متّی خانه سفره سر نیشتهبو کی ایتأ عالمه باجگیرأن و گوناهکارأن بموییدی و عیسی و اونٚ شاگردأنٚ اَمرأ سفره سر بینیشتیدی. ۱۱ وختی فریسیأن اوشأنَ بیدهییدی، عیسی شاگردأنَ بوگفتید: «چره شیمی اوستاد باجگیرأن و گوناهکارأنٚ اَمرأ غذا خوره؟» ۱۲ عیسی اوشأنٚ گبأنَ بیشنأوسته و بوگفته: «مریضأن طبیب خوأییدی، نه ساق و سالمٚ آدمأن. ۱۳ بیشید و اَ کلامٚ معنییَ بفهمید کی: ‹من رحمت خوأیم، نه قوربانی›#۹:۱۳ هوشع بابٚ ۶، آیه ۶، چونکی نَموم تا دوروستکارٚ آدمأنَ به توبه دعوت بوکونم، بلکی اوشأنی کی گوناهکاریدی.»
سؤال روزه گیفتنٚ وأسی
۱۴ بأزین یحیی شاگردأن، عیسی ورجأ بمویید و وَورسهییدی: «چره اَمأن و فریسیأن روزه گیریمی، ولی تی شاگردأن روزه نیگیردی؟» ۱۵ عیسی وأگردسته بوگفته: «مگر به، مهمانأن عروسی دورونی تا زمانی کی داماد اوشأنٚ اَمرأ ایسَه عزاداری بوکونید؟ امّا زمانی فأرسه کی داماد اَشأنٚ جأ فیگیفته به. هو وخت روزه گیریدی. ۱۶ هیچکی تازه پارچهیَ کهنه لیباسٚ سر پینیک نزنه#۹:۱۶ تازه پارچه منظور اَنه کی هنوز بوشوسته نوبوسته و آب نوشو.، چونکی بأزین او پینیک، لیباسٚ جأ سیوأ به و اونٚ پارهگی بدترَ به. ۱۷ و تازه شرابَ کهنه مشکأنٚ دورونی دونکونیدی، چونکی بأزین مشکأن پارَه بیدی و شراب فیوِه و مشکأن جٚه بین شیدی بلکی تازه شرابَ تازه مشکأنٚ دورون دوکونیدی تا هر دوتأ سالم بمأنید.»
کنیسه رئیسٚ دُختر و ایتأ زنای کی خونریزی دأشتی
۱۸ هَطویی کی عیسی اوشأنٚ رِه گب زِئن دوبو، ایتأ جٚه کنیسه رئیسأن اونٚ ورجأ بمو و عیسی پا جیر زانو بزه و بوگفته: «می دُختر هسأ بمرده. ولی خوأهش کونم بیأ و تی دسَ اونٚ رو بنه تا زنده ببه.» ۱۹ عیسی ویریشته اونٚ اَمرأ بوشو و شاگردأنم اونٚ دونبألسر رأ دکفتید. ۲۰ هو وخت ایتأ زنای کی دوازده سال خونریزی وأسی عذاب کشهیی عیسی پشتٚ سر بمو و اونٚ ردا گوشهیَ دس بزه، ۲۱ چونکی خو ورجأ فیکر کودی: «اگه فقط عیسی ردایَ دس بزنم، شفا گیرم.» ۲۲ عیسی وأگردسته اونَ بیده و بفرمأسته: «دُختر جان، تی دیلَ قورصَ کون. تی ایمأن ترَ شفا بدَه.» هو لحظهیم او زنای شفا بیگیفته. ۲۳ وختی کی عیسی او کنیسه رئیسٚ خانه دورون بوشو و بیده کی مرثیهخوأنأن نی زِئن درید#۹:۲۳ اَ کلمهیٚ یونانی ایشاره کونه به کسأنی کی پول فیگیریدی و عزاداری وأسی نی زنیدی. و مردومأنم شیون کودَن درید، ۲۴ بفرمأسته: «بیشید بیرون، اَ دُختر نمرده. اون خوفته.» ولی اوشأن اونٚ رِه خنده بوکودیدی. ۲۵ وختی مردومأنَ بیرونَ کودیدی، عیسی بودورون بمو و دُخترٚ دسَ بیگیفته و دُختر ویریشته. ۲۶ اَ خبر سرتاسرٚ او منطقه میأن پخشَ بوسته.
دوتأ کور و ایتأ لال شفا گیریدی
۲۷ وختی کی عیسی او محلهیَ ترکَ کودَن دوبو، دوتأ مردأکی کی کور بید اونٚ دونبألسر رأ دکفتید بوشویید و ایجگره زنأن گفتیدی: «اَی داوودٚ پسر، اَمرَ رحم بوکون!» ۲۸ وختی عیسی فأرسه بخانه، او دوتأ مردأی اونٚ ورجأ بموییدی. عیسی اوشأنَ وَورسه: «ایمأن دأریدی کی تأنم اَ کارَ انجام بدم؟» جواب بدَهییدی: «بله، آقا جان.» ۲۹ بأزین عیسی اوشأنٚ چومأنَ دس بزه و بوگفته: «هَطو کی ایمأن دأریدی، شِمره انجام ببه.»
۳۰ هو وخت اوشأنٚ چومأن وازَ بوسته. عیسی اوشأنَ اصرارٚ اَمرأ بفرمأسته: «مواظب بیبید هیکس اَ ماجرا جأ وأخبرَ نبه.» ۳۱ امّا اوشأن بیرون بوشوییدی و او خبرَ تومامٚ او منطقه مردومأنٚ میأن جار بزهیید.
۳۲ هَطویی کی اوشأن بیرون شوئون دیبید، ایتأ دیوزده مردأکَ کی لال بو، بأوردیدی عیسی ورجأ. ۳۳ وختی عیسی، دیوَ اونٚ جأ بیرونَ کوده، او مردأکٚ زبان وازَ بوسته. مردوم تعجبٚ اَمرأ بوگفتید: «ایسرائیلٚ میأنی هیوخت اَطو چی ایتفاق دنکفتهبو!» ۳۴ ولی فریسیأن بوگفتیدی: «اون، رئیسٚ دیوأنٚ کومکٚ اَمرأ دیوأنَ بیرونَ کونه.»
کارگرأنٚ ویشتری لازم ایسه
۳۵ عیسی همهتأ شهرأن و دیهاتأنٚ میأن گردستی و اوشأنٚ کنیسهیأنٚ دورون تعلیم دَیی و آسمانٚ پادشایی خوروم خبرَ اعلام کودی و هر درد و مرضییَ شفا دَیی. ۳۶ وختی عیسی بیده کی مردومأنٚ زیادی اویه جمَ بوستیدی، اونٚ دیل اوشأنٚ رِه بوسوخته، چونکی گوسفندأنٚ بیچوپانٚ مأنستن، آشفته و درمانده بید. ۳۷ بأزین خو شاگردأنَ بوگفته: «محصول زیاده، ولی کارگر کم. ۳۸ پس صاب محصولٚ جأ بخوأیید کی خو محصولٚ درو کودنٚره کارگرأنٚ ویشتری اوسه کونه.»
Currently Selected:
متّی ۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media