متّی ۴

عیسی ایمتحان بوستن

۱ بأزین روح‌القدس عیسایَ ببرده بیابانٚ دورون تا شیطأن اونَ وسوسه بوکونه. ۲ عیسی چهل شب و روز بو کی روزه گیفتنٚ وأسی هیچی نوخورده‌بو و اونَ ویشتأ کوده. ۳ هو وخت شیطأن بمو عیسی ورجأ و بوگفته: «اگه خودا پسری، اَ سنگأنَ بوگو نان بیبید.» ۴ عیسی وأگردسته بوگفته: «خودا کلامٚ دورونی بینیویشته بوبوسته کی:

‹اینسأن فقط نان خوردنٚ اَمرأ زنده نی‌یه،

بلکی به هر کلمه‌یی کی خودا فرمأیه.›#۴‏:۴ تثنیه بابٚ ۸، آیه ۳ »

۵ بأزین شیطأن اونَ اورشلیمٚ شهر ببرده، اونَ معبدٚ بولندی جور بدأشته ۶ و بوگفته: «اگه خودا پسری، خودتَ جٚه اَ بوجور تأود بیجیر، چونکی خودا کلامٚ دورونی بینیویشته بوبوسته کی: ‹خودا خو فرشته‌یأنَ دستور دهه کی ترَ خوشأنٚ دسأنٚ میأن بیگیرید و ونألید کی تی پا ایتأ سنگَ بوخوره.›#۴‏:۶ مزمور ۹۱، آیه ۱۱ و ۱۲»

۷ عیسی جواب بده: «اَنَ کی بوگفتی دوروسته ولی هَطویم بینیویشته بوبوسته کی ‹خوداوند، تی خودایَ ایمتحان نوکون.›#۴‏:۷ تثنیه بابٚ ۶، آیه ۱۶»

۸ بأزین ایوار دِه شیطأن عیسایَ ببرده ایتأ کوهٚ جور کی خیلی بولند بو و تومامی دونیا مملکتأنَ و اوشأنٚ شکوه و جلالَ اونَ نیشأن بدَه ۹ و بوگفته: «اگه مرَ سجده و پرستش بوکونی، همه‌یٚ اَشأنَ ترَ فدم.» ۱۰ عیسی بفرمأسته: «می جأ دورَ بو، اَی شیطأن! چونکی بینیویشته بوبوسته:

‹وأستی خوداوند، تی خودایَ پرستش بوکونی

و فقط اونَ عیبادت بوکونی.›#۴‏:۱۰ تثنیه بابٚ ۶، آیه ۱۳»

۱۱ او وخت شیطأن عیسایَ ولَ کوده و فرشته‌یأن بموییدی و اونَ خدمت بوکودیدی.

عیسی خو خدمتَ شروع کونه

۱۲ وختی عیسی بیشنأوسته کی یحیایَ بیگیفتیدی، وأگردسته اوستانٚ جلیلٚ میأنی. ۱۳ بأزین عیسی ناصره شهرَ ترکَ کوده بوشو شهرٚ کفرناحوم کی دریاچه‌یٚ جلیلٚ کنار و زِبولون و نفتالی ناحیه‌یأنٚ دورون نهَه‌بو، و هویه بِیسه. ۱۴ اَطویی اونچی کی اِشعیای نبی زبانٚ جأ بوگفته بوبوسته‌بو، حقیقت پیدا کوده کی:

۱۵ «زِبولون و نفتالی،

ناحیه‌یأنی کی دریا مسیرٚ دورونی او طرفٚ اُردُنٚ روخان نهَه‌ییدی

و جلیلی کی خیلی غیرٚ یهودیأن زندگی کونیدی،

۱۶ اوشأنی کی تاریکی دورون ایسَه‌بید

و هو سرزیمینٚ دورونی مرگٚ سایه اَمرأ ساکن بید،

ایتأ پیله روشنایی بیده‌ییدی و اونٚ نور اوشأنٚ رِه بتأبسته.»#۴‏:۱۶ اِشعیا بابٚ ۹، آیه ۱ تا ۲

۱۷ هو وخت عیسی شروع بوکوده به موعظه و اعلام کودنٚ اَنکی: «وأستی توبه بوکونید، چونکی آسمانٚ پادشایی نزدیکه!»

عیسی اوّلی شاگردأن

۱۸ وختی عیسی جلیلٚ دریاچه کنار رأ شوئون دوبو، دو‌تأ برأرَ بیده کی ایتأ نام شمعون معروف به پطرس بو و اویتأ نام آندریاس. اوشأن دامٚ ماهیگیری‌یَ دریاچه دورون تأودَه‌ییدی، چونکی ماهیگیر بید. ۱۹ عیسی او دو نفرَ بوگفته: «می دونبألسر بأیید تا شمرَ مردومٚ دیلٚ صیاد چأکونم.» ۲۰ هو لحظه خوشأنٚ تورأنَ ولَ کودیدی و عیسی دونبألسر بوشوییدی. ۲۱ عیسی ایپچه کی جُلُوتر بوشو، دوتأ برأرٚ دیگرَ بیده، یعقوب و یوحنا کی خوشأنٚ پئر زِبدی اَمرأ لوتکا میأنی ایسَه‌بید و خوشأنٚ تورأنَ آمادَه کودَن دیبید. عیسی اوشأنَ دوخوأده خو ورجأ. ۲۲ اوشأنم بی‌معطلی لوتکایَ و خوشأنٚ پئرَ ولَ کودیدی و عیسی دونبألسر بوشوییدی.

عیسی مریضأنَ شفا دهه

۲۳ عیسی جلیلٚ همه جایَ گردستی و اوشأنٚ کنیسه‌یأنٚ دورونم تعلیم دَیی و خوروم خبرأنٚ آسمانٚ پادشایی‌یَ اعلام کودی و تومامی‌یٚ مردومأنٚ مریضی‌یأن و ناخوشی‌یأنَ شفا دَیی. ۲۴ عیسی نام و نیشأن سرتاسرٚ سوریه بپیچسته و همه‌یٚ کسأنی کی درد و جورواجورٚ مرضأن ویا پلیدٚ روح دأشتیدی و اوشأنی کی ایفلیج و یا غشّی بید اونٚ ورجأ اَوردیدی و عیسی اوشأنَ شفا دَیی. ۲۵ ایتأ عالمه مردوم جٚه جلیلٚ اوستان، دِکاپولیسٚ منطقه، اورشلیمٚ شهر و یهودیه اوستان و جٚه او طرفٚ اُردُنٚ روخان عیسی دونبألسر رأ دکفتیدی، بوشوییدی.

Currently Selected:

متّی ۴: گیلکی (رشتی)

Highlight

Copy