متّی ۱۵

۱۵

اونچی کی آدمی‌یَ نجستَ کونه

۱ بأزین ایتأ عده فریسیأن و دینٚ علما اورشلیمٚ جأ بموییدی عیسی ورجأ و وَورسه‌ییدی: ۲ «چره تی شاگردأن بوزرگأنٚ سنتَ به جا نأوریدی؟ اوشأن قبلٚ غذا خوردن خوشأنٚ دسأنَ نوشوریدی!» ۳ عیسی بوگفته: «چره شومأن شیمی سنتٚ حفظٚ کودنٚ وأسی خودا حوکمَ پا جیر نیهیدی؟ ۴ چونکی خودا بفرمأسته: ‹تی پئر و مارَ ایحترام بنه›#۱۵‏:۴ خروج بابٚ ۲۰ آیه ۱۲ و ‹هر کی خو پئر یا خو مارَ ناسزا بگه، وأستی کوشته ببه.›#۱۵‏:۴ خروج بابٚ ۲۱ آیه ۱۷ ۵ امّا شومأن گیدی اگه کسی خو پئر و مارَ بگه: ‹هر کومکی کی تأنستیم شمرَ فدم، وقفٚ خودا بوکودم،› ۶ دِه اون مجبور نی‌یه کی به اَ صورت خو پئر و مارَ ایحترام بنه. شومأن اَطویی شیمی سنتٚ حفظَ کودنٚ وأسی، خودا کلامَ باطیلَ کونیدی. ۷ اَی ریاکارأن! اِشعیای نبی درباره‌یٚ شومأن چی خُب پیشگویی بوکوده کی بوگفته:

۸ ‹اَ قوم خوشأنٚ زوانٚ اَمرأ مرَ ایحترام نیهیدی

امّا اَشأنٚ دیل می جأ دوره.

۹ اوشأنٚ عیبادت کودن بیهوده‌یه،

چونکی اوشأن فقط رسمٚ بشر‌یَ تعلیم دیهیدی.›»#۱۵‏:۹ اِشعیا نبی، بابٚ ۲۹، آیه ۱۳

۱۰ بأزین عیسی او مردومأنَ خو ورجأ دوخوأده و بوگفته: «مرَ گوش بدید و بفهمید: ۱۱ اونچی کی آدمٚ دَهنٚ میأن وارد به، اونَ نجستَ نوکونه، بلکی اونچی کی اونٚ دَهنٚ جأ بیرون اَیه آدمی‌یَ نجستَ کونه.» ۱۲ او وخت شاگردأن اونٚ ورجأ بموییدی و بوگفتیدی: «دأنی کی فریسیأن تی گبأنٚ بیدیل بیگیفتید؟» ۱۳ عیسی بفرمأسته: «هر نهالی‌یَ کی می آسمانی پئر زیمینٚ رو نکاشته‌بی، ریشه‌کن به. ۱۴ اوشأنَ به حالٚ خودشأن بنید. اوشأن کور ایسیدی و کورأنَ رأنمایی کونیدی. هر وختی کی ایتأ کور عصا کشٚ ایتأ کورٚ دیگر ببه، هر دو‌تأ چاه دورون دکفیدی.» ۱۵ پطرس بوگفته: «اَ مٚثٚلَ اَمِره توضیح بدن.» ۱۶ عیسی جواب بدَه: «شومأنم هنوز نفهمستیدی؟ ۱۷ ینی نأنیدی کی هرچی کی دَهنٚ جأ، شکمٚ دورون شه، بأزین دفع به؟ ۱۸ ولی او چیزأنی کی دَهنٚ جأ بیرون اَییدی، جٚه دیل گفته بیدی و هَشأنیدی کی آدمی‌یَ نجستَ کونیدی. ۱۹ چونکی فیکرأنٚ پلید، قتل، زنا، بی‌عفتی، دوزدی، شهادتٚ دوروغ و تهمت، دیلٚ جأ بیرون اَیه. ۲۰ اَ کردکارأنه کی آدمَ نجستَ کونه، نه نوشوسته دسٚ اَمرأ غذا خوردن.»

کنعانی زنأکٚ ایمأن

۲۱ عیسی رأ دکفته بوشو منطقه‌یٚ صور و صیدون. ۲۲ ایتأ روز ایتأ کنعانی زنای کی اویه شین بو، بمو عیسی ورجأ و صدایٚ بولندٚ اَمرأ بوگفته: «آقا جان، اَی داوودٚ پسر، مرَ رحم بوکون! می دُختر دیوزده بوبوسته و خیلی عذاب کشه.» ۲۳ ولی عیسی هیچ جوابی ندَه، تا اَنکی اونٚ شاگردأن جُلُو بموییدی و اونٚ جأ بخوأستیدی: «اونَ اوسه کون بشه، چونکی هَطو ایجگره زنان اَمی دونبألسر اَمون دره.» ۲۴ عیسی جواب بدَه: «خودا مرَ فقط ایسرائیلٚ اویرَ بوسته گوسفندأنٚ وأسی اوسه کوده.» ۲۵ امّا او زنای بمو و اونٚ جُلُو زانو بزه و بوگفته: «آقا جان، مرَ کومک بوکون!» ۲۶ عیسی وأگردسته بوگفته: «زأکأنٚ نانَ فیگیفتن و سگأنٚ جُلُو تأودن کارٚ درستی نی‌یه.» ۲۷ ولی زنای بوگفته: «بله آقا جان، ولی سگأنم جٚه خورده‌یأنی کی خوشأنٚ صاحابٚ سفره‌سر کفه، خوریدی!» ۲۸ بأزین عیسی بفرمأسته: «اَی زن، تی ایمأن پیله‌دأنه‌یه، تی خوأسته براَورده به!» هو لحظه‌یم اونٚ دُختر شفا پیدا کوده.

عیسی دوواره هیزارأن نفرَ سِئرَ کونه

۲۹ عیسی رأ دکفته و دریاچه‌یٚ جلیل کناره دوأرسته بوشو کوه بولندی سر و اویه بینیشته. ۳۰ مردومأنٚ زیادی اونٚ ورجأ بموییدی و خوشأنٚ اَمرأ شلأن و کورأن و ایفلیجأن و گُنگأن و مریضأنٚ زیادٚ دیگرَ بأوردیدی و عیسی پا ورجأ بنَه‌ییدی و اون، اوشأنَ شفا بده. ۳۱ مردوم چون ده‌ییدی کی لالٚ آدمأن به گب بموییدی، ایفیلجأن شفا گیریدی، شلأن رأ شیدی و کورأن دینیدی، هَنٚ وأسی قاقَ بوستیدی و ایسرائیلٚ خودایَ ستایش بوکودیدی.

۳۲ عیسی خو شاگردأنَ دوخوأده و بوگفته: «می دیل اَ مردومٚ رِه سوجه، چونکی الأن سه روزه کی می اَمرأ‌ییدی و چیزی خوردنٚ‌ره نأریدی. نخوأیم اَشأنَ گوشنه اوسه کونم، نوکونه کی رأ میأنی ضعف بأورید.» ۳۳ شاگردأن بوگفتیدی: «اَ بیابانٚ میأنی اَ همه مردومٚ سِئرَ کودنٚ وأسی، نانٚ کافی جٚه کویه تأنیم بأوریم؟» ۳۴ عیسی وَورسه: «چن‌تأ نان دأریدی؟» بوگفتیدی: «هفت‌تأ نان و چن‌تأ کوجه‌دأنه ماهی.» ۳۵ عیسی مردومَ بفرمأسته زیمینٚ سر بینیشید. ۳۶ او وخت هفت‌تأ نان و چن‌تأ ماهی‌یَ فیگیفته، خودایَ شکر بوکوده، اوشأنَ خوردَ کوده و خو شاگردأنَ فدَه و اوشأنم مردومَ فدَه‌ییدی. ۳۷ همه بوخوردیدی و سِئرَ بوستیدی و شاگردأن خورده‌نانأنی کی بمأنسته‌بو جمَ کودیدی و اوشأنٚ اَمرأ هفت‌تأ زیبیل پورَ بوسته. ۳۸ تعدادٚ کسأنی کی غذا بوخوردیدی، غیرٚ زنأن و زأکأن، چار هیزار نفر بید. ۳۹ بأزین کی عیسی مردومَ اوسه کوده بیشید، خودشم قایقَ سوارَ بوسته و بوشو منطقه‌یٚ مَجدل.

Currently Selected:

متّی ۱۵: گیلکی (رشتی)

Highlight

Copy