متّی ۱۴
۱۴
یحیایٚ تعمیددهنده‌یَ کوشیدی
۱ او وخت عیسی خبرأن، هیرودیسٚ پادشا گوش فأرسه ۲ و اون خو خادمأنَ بوگفته: «اَن یحیایٚ تعمید دهنده‌یه کی جٚه دونیایٚ مورده‌یأن ویریشته و هَنٚ وأسی‌یه کی اَ قودرتأن اونٚ جأ ظاهیرَ به.»
۳ و امّا هیرودیس، هیرودیا اصرارٚ وأسی، کی قبلاً اونٚ برأر فیلیپُسٚ زن بو، یحیایَ دسگیر بوکوده، دٚوٚسته و زندان تأوده‌بو، ۴ چونکی یحیی اونَ گفتی: «تو حق نأری اَ زنأکٚ اَمرأ عروسی بوکونی.» ۵ هیرودیس خوأستی یحیایَ بوکوشه، امّا مردومٚ جأ ترسه‌یی، چونکی اوشأن یحیایَ به پیغمبری قوبیل دأشتیدی.
۶ هیرودیسٚ جشنٚ تولدٚ روزٚ رِه، هیرودیا دُختر، مجلسٚ میأن اَنقدر قشنگ رقص بوکوده کی هیرودیسٚ دیلَ شادَ کوده، ۷ هیرودیسم قسم بوخورده هر چی بخوأیه اونَ فده. ۸ او دُخترم خو مأرٚ انتریکٚ اَمرأ بوگفته: «یحیایٚ تعمیددهنده سرَ ایتأ طبَقٚ رو هَیه مرَ فَدن.» ۹ پادشا ناراحتَ بوسته، امّا جٚه اَ خأطر کی مهمانأنٚ جُلُو قسم بوخورده‌بو، دستور بدَه تا اونٚ خوأسته انجام ببه. ۱۰ بأزین اوسه کوده کی زندانٚ میأنی یحیی سرَ وأوِه‌ییدی ۱۱ و اونَ ایتأ طبقٚ دورون بأوردیدی فدَه‌ییدی دُخترِکَ، اونم اونَ ببرده خو مارٚ ورجأ. ۱۲ یحیی شاگردأن بموییدی و اونٚ جسدَ ببردیدی دفنَ کودیدی و بأزین بوشوییدی عیسایَ خبر بدَه‌ییدی.
عیسی هیزارأن نفرَ سِئرَ کونه
۱۳ وختی عیسی او خبرَ بیشنأوسته، مردومٚ خلوتی لوتکا اَمرأ بوشو ایتأ جایٚ دور افتاده. ولی مردوم وأخبرَ بوستیدی و خوشأنٚ شهرٚ جأ، پیاده اونٚ دونبألسر بوشوییدی. ۱۴ وختی عیسی دریاچه کنار پیادَه بوسته، ایتأ عالمه مردومأنَ بیده و اونٚ دیل اوشأنٚ رِه بوسوخته و اوشأنٚ مریضأنَ شفا بدَه.
۱۵ غروب دم، شاگردأن اونٚ ورجأ بموییدی و بوگفتیدی: «اَیه ایتأ جایٚ دور افتاده‌یه، و دِئر وختم ایسه. مردومَ اوسه کون تا بیشید اَ دور و ورٚ دیهاتأن کی خوشأنٚ‌ره غذا بیهینید.» ۱۶ عیسی اوشأنَ بوگفته: «لازم نی‌یه مردوم بیشید. شومأن خودتأن اَشأنَ غذا بدید.» ۱۷ شاگردأن بوگفتیدی: «چیزی اَیه نأریمی جز پنج‌تأ نان و دوتأ ماهی.» ۱۸ عیسی بفرمأسته: «اوشأنَ می ورجأ بأورید.» ۱۹ او وخت مردومَ بوگفته کی سبزه سر بینیشینید. بأزین او پنج‌تأ نان و دوتأ ماهی‌یَ بیگیفته و آسمانَ فندرسته، خودایَ شکر بوکوده، نانأنَ تیکه‌تیکه بوکوده و شاگردأنَ فدَه و اوشأنم مردومَ فدَه‌ییدی. ۲۰ همه بوخوردیدی و سِئرَ بوستیدی و بقیه‌یٚ خورده نانأنی کی بمأنسته‌بو، جمَ کودیدی و دوازده‌تأ سبد پورَ بوسته. ۲۱ تعدادٚ مردأکأنی کی غذا بوخورده‌بید غیرٚ زنأکأن و زأکأن تقریباً پنج هیزارتأ بید.#۱۴:۲۱ فرهنگٚ یهودٚ میأن فقط تعدادٚ مردأکأنَ ایشمردیدی.
عیسی آبٚ سر رأ شه
۲۲ عیسی بی‌معطلّی خو شاگردأنَ وادار بوکوده قبلٚ اون سوارٚ کرجی بیبید و بیشید اوطرفٚ دریاچه ولی خودش اویه بِیسه و مردومَ اوسه کوده بیشید بخانه. ۲۳ وختی کی مردومَ اوسه کوده، خودش بوشو کوه بولندی سر کی تنهایی دوعا بوکونه. شب فأرسه و اویه تنها ایسَه‌بو. ۲۴ او وخت کرجی ساحلٚ جأ خیلی دورَ بوسته‌بو و اون کولاک و موجانٚ دس اسیر بو، چونکی بادٚ مخالف اَمویی. ۲۵ بینٚ ساعت سه و شیشٚ صُب، عیسی قدم زنأن آبٚ سر اوشأنٚ طرف بوشو. ۲۶ وختی شاگردأن اونَ بیده‌ییدی کی آبٚ سر رأ شوئون‌دره، وحشت بوکودیدی بوگفتیدی: «روحه!» و ترسٚ جأ فریاد بزه‌ییدی. ۲۷ هو لحظه عیسی اوشأنَ بوگفته: «جورأت بدأرید، منم. نوأ ترسئنید!»
۲۸ پطرس جواب بدَه: «آقا جان، اگه خودت ایسی، دستور بدن تا منم آبٚ سر بأیم تی ورجأ.» ۲۹ عیسی بفرمأسته: «بیأ!» او وخت پطرس کرجی جأ بیرون بمو و آبٚ سر عیسی طرف رأ بوشو. ۳۰ ولی چون باد و کولاکَ بیده، بترسه و هوطو کی آبٚ میأن فرو شوئون دوبو، فریاد بزه: «آقا جان، مرَ نجات بدن!» ۳۱ عیسی زود خو دسَ درازَ کوده و اونَ بیگیفته و بوگفته: «اَی کم‌ایمأن، چره شک بوکودی؟» ۳۲ وختی کرجی‌یَ سوارَ بوستیدی، باد بِیسه ۳۳ و شاگردأنی کی کرجی‌یٚ میأن ایسَه‌بید، عیسایَ پرستش بوکودیدی و بوگفتیدی: «رأس رأسی کی تو خودا پسری!»
عیسی جنیسارتٚ دیهاتٚ مریضأنَ شفا دهه
۳۴ وختی کی دریاچه او طرف فأرسه‌ییدی، جنیسارتٚ دیهاتٚ میأن پیاده بوستیدی. ۳۵ او دیهاتٚ آدمأن عیسایَ بشنأختیدی و اونٚ اَمونٚ خبرَ تومامٚ او دور و اَطرافَ فرسأنه‌ییدی و همه خوشأنٚ مریضأنَ اونٚ ورجأ بأوردیدی ۳۶ و عیسایَ ایلتماس کودیدی کی ایجازه بده تا فقط ایتأ گوشه‌یٚ اونٚ ردایَ لمس بوکونید و هر کی‌یم اونٚ ردایَ لمس کودی، شفا گیفتی.
Currently Selected:
متّی ۱۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
متّی ۱۴
۱۴
یحیایٚ تعمیددهنده‌یَ کوشیدی
۱ او وخت عیسی خبرأن، هیرودیسٚ پادشا گوش فأرسه ۲ و اون خو خادمأنَ بوگفته: «اَن یحیایٚ تعمید دهنده‌یه کی جٚه دونیایٚ مورده‌یأن ویریشته و هَنٚ وأسی‌یه کی اَ قودرتأن اونٚ جأ ظاهیرَ به.»
۳ و امّا هیرودیس، هیرودیا اصرارٚ وأسی، کی قبلاً اونٚ برأر فیلیپُسٚ زن بو، یحیایَ دسگیر بوکوده، دٚوٚسته و زندان تأوده‌بو، ۴ چونکی یحیی اونَ گفتی: «تو حق نأری اَ زنأکٚ اَمرأ عروسی بوکونی.» ۵ هیرودیس خوأستی یحیایَ بوکوشه، امّا مردومٚ جأ ترسه‌یی، چونکی اوشأن یحیایَ به پیغمبری قوبیل دأشتیدی.
۶ هیرودیسٚ جشنٚ تولدٚ روزٚ رِه، هیرودیا دُختر، مجلسٚ میأن اَنقدر قشنگ رقص بوکوده کی هیرودیسٚ دیلَ شادَ کوده، ۷ هیرودیسم قسم بوخورده هر چی بخوأیه اونَ فده. ۸ او دُخترم خو مأرٚ انتریکٚ اَمرأ بوگفته: «یحیایٚ تعمیددهنده سرَ ایتأ طبَقٚ رو هَیه مرَ فَدن.» ۹ پادشا ناراحتَ بوسته، امّا جٚه اَ خأطر کی مهمانأنٚ جُلُو قسم بوخورده‌بو، دستور بدَه تا اونٚ خوأسته انجام ببه. ۱۰ بأزین اوسه کوده کی زندانٚ میأنی یحیی سرَ وأوِه‌ییدی ۱۱ و اونَ ایتأ طبقٚ دورون بأوردیدی فدَه‌ییدی دُخترِکَ، اونم اونَ ببرده خو مارٚ ورجأ. ۱۲ یحیی شاگردأن بموییدی و اونٚ جسدَ ببردیدی دفنَ کودیدی و بأزین بوشوییدی عیسایَ خبر بدَه‌ییدی.
عیسی هیزارأن نفرَ سِئرَ کونه
۱۳ وختی عیسی او خبرَ بیشنأوسته، مردومٚ خلوتی لوتکا اَمرأ بوشو ایتأ جایٚ دور افتاده. ولی مردوم وأخبرَ بوستیدی و خوشأنٚ شهرٚ جأ، پیاده اونٚ دونبألسر بوشوییدی. ۱۴ وختی عیسی دریاچه کنار پیادَه بوسته، ایتأ عالمه مردومأنَ بیده و اونٚ دیل اوشأنٚ رِه بوسوخته و اوشأنٚ مریضأنَ شفا بدَه.
۱۵ غروب دم، شاگردأن اونٚ ورجأ بموییدی و بوگفتیدی: «اَیه ایتأ جایٚ دور افتاده‌یه، و دِئر وختم ایسه. مردومَ اوسه کون تا بیشید اَ دور و ورٚ دیهاتأن کی خوشأنٚ‌ره غذا بیهینید.» ۱۶ عیسی اوشأنَ بوگفته: «لازم نی‌یه مردوم بیشید. شومأن خودتأن اَشأنَ غذا بدید.» ۱۷ شاگردأن بوگفتیدی: «چیزی اَیه نأریمی جز پنج‌تأ نان و دوتأ ماهی.» ۱۸ عیسی بفرمأسته: «اوشأنَ می ورجأ بأورید.» ۱۹ او وخت مردومَ بوگفته کی سبزه سر بینیشینید. بأزین او پنج‌تأ نان و دوتأ ماهی‌یَ بیگیفته و آسمانَ فندرسته، خودایَ شکر بوکوده، نانأنَ تیکه‌تیکه بوکوده و شاگردأنَ فدَه و اوشأنم مردومَ فدَه‌ییدی. ۲۰ همه بوخوردیدی و سِئرَ بوستیدی و بقیه‌یٚ خورده نانأنی کی بمأنسته‌بو، جمَ کودیدی و دوازده‌تأ سبد پورَ بوسته. ۲۱ تعدادٚ مردأکأنی کی غذا بوخورده‌بید غیرٚ زنأکأن و زأکأن تقریباً پنج هیزارتأ بید.#۱۴:۲۱ فرهنگٚ یهودٚ میأن فقط تعدادٚ مردأکأنَ ایشمردیدی.
عیسی آبٚ سر رأ شه
۲۲ عیسی بی‌معطلّی خو شاگردأنَ وادار بوکوده قبلٚ اون سوارٚ کرجی بیبید و بیشید اوطرفٚ دریاچه ولی خودش اویه بِیسه و مردومَ اوسه کوده بیشید بخانه. ۲۳ وختی کی مردومَ اوسه کوده، خودش بوشو کوه بولندی سر کی تنهایی دوعا بوکونه. شب فأرسه و اویه تنها ایسَه‌بو. ۲۴ او وخت کرجی ساحلٚ جأ خیلی دورَ بوسته‌بو و اون کولاک و موجانٚ دس اسیر بو، چونکی بادٚ مخالف اَمویی. ۲۵ بینٚ ساعت سه و شیشٚ صُب، عیسی قدم زنأن آبٚ سر اوشأنٚ طرف بوشو. ۲۶ وختی شاگردأن اونَ بیده‌ییدی کی آبٚ سر رأ شوئون‌دره، وحشت بوکودیدی بوگفتیدی: «روحه!» و ترسٚ جأ فریاد بزه‌ییدی. ۲۷ هو لحظه عیسی اوشأنَ بوگفته: «جورأت بدأرید، منم. نوأ ترسئنید!»
۲۸ پطرس جواب بدَه: «آقا جان، اگه خودت ایسی، دستور بدن تا منم آبٚ سر بأیم تی ورجأ.» ۲۹ عیسی بفرمأسته: «بیأ!» او وخت پطرس کرجی جأ بیرون بمو و آبٚ سر عیسی طرف رأ بوشو. ۳۰ ولی چون باد و کولاکَ بیده، بترسه و هوطو کی آبٚ میأن فرو شوئون دوبو، فریاد بزه: «آقا جان، مرَ نجات بدن!» ۳۱ عیسی زود خو دسَ درازَ کوده و اونَ بیگیفته و بوگفته: «اَی کم‌ایمأن، چره شک بوکودی؟» ۳۲ وختی کرجی‌یَ سوارَ بوستیدی، باد بِیسه ۳۳ و شاگردأنی کی کرجی‌یٚ میأن ایسَه‌بید، عیسایَ پرستش بوکودیدی و بوگفتیدی: «رأس رأسی کی تو خودا پسری!»
عیسی جنیسارتٚ دیهاتٚ مریضأنَ شفا دهه
۳۴ وختی کی دریاچه او طرف فأرسه‌ییدی، جنیسارتٚ دیهاتٚ میأن پیاده بوستیدی. ۳۵ او دیهاتٚ آدمأن عیسایَ بشنأختیدی و اونٚ اَمونٚ خبرَ تومامٚ او دور و اَطرافَ فرسأنه‌ییدی و همه خوشأنٚ مریضأنَ اونٚ ورجأ بأوردیدی ۳۶ و عیسایَ ایلتماس کودیدی کی ایجازه بده تا فقط ایتأ گوشه‌یٚ اونٚ ردایَ لمس بوکونید و هر کی‌یم اونٚ ردایَ لمس کودی، شفا گیفتی.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media