لوقا ۲۴
۲۴
عیسی ویریشتن جٚه مورده‌یأن
۱ خروس خوأنٚ یکشنبه روزٚ رِه زنأکأن بوشوییدی و عطریات کی تهیه بوکوده‌بید خوشأنٚ اَمرأ ببردیدی عیسی قبرٚ سر ۲ امّا بیده‌ییدی او پیله‌دأنه سنگی کی قبرٚ جُلُو نهَه‌بو ایتأ کنار نهَه. ۳ بأزین بوشوییدی قبرٚ میأن ولی وختی عیسایٚ خوداوندٚ جسدَ پیدا نوکودید، ۴ قاقَ بوسته‌بید و فندرستَن دیبید کی ایدفعه‌یی دوتأ مردای، زنأکأنٚ ورجأ ظاهیرَ بوستید کی اوشأنٚ لیباسٚ جأ نور وارستی. ۵ اوشأن بترسه‌ییدی و خوشأنٚ سرأنَ تأودَه‌ییدی بیجیر. او دوتأ مردأکأن وأگردستیدی اوشأنَ بوگفتیدی: «چره زنده آدمَ مورده‌یأنٚ میأنی وأمجیدی؟ ۶ اون اَیه نِیسَه بلکی مورده‌یأنٚ دونیا جأ ویریشته! هسأ وأستی به یاد بأورید او چیزأنی‌یَ کی وختی جلیلٚ میأن ایسَه‌بو شمرَ بوگفته‌بو ۷ کی چوطویی اینسأنٚ پسر وأستی گوناهکارأنٚ دس تسلیم ببه، مصلوب ببه و سوّم روزٚ رِه مورده‌یأنٚ دونیا جأ ویریزه.»
۸ هو وخت بو کی عیسی گبأن کی اوشأنَ بوگفته‌بو زنأکأنَ به یاد بمو. ۹ بأزین وأگردستید اورشلیم و همه‌یٚ ایتفاقأنی کی دکفته‌بو او یازده‌تأ رسول و دیگرأنٚ‌ره تعریف بوکودید. ۱۰ زنأکأنی کی عیسی قبرٚ سر بوشو بید مریمٚ مجْدلیّه، یوآنّا، مریم یعقوبٚ مار و چن‌تأ زنأکٚ دیگر بید. ۱۱ رسولأن فیکر کودید زنأکأن هذیأن گفتن دریدی و نتأنستیدی اوشأنٚ گبأنَ بأور بوکونید ۱۲ ولی پطرس ویریشته بودُوٚسته بوشو قبرٚ سر، خمَ بوسته و فندرسته امّا جز کفنٚ خالی چیزی نیده. هَطو کی او ایتفاقٚ جأ حیران بو، وأگردسته بوشو بخانه.
عیسی مسیح دوتأ خو پیروأنٚ اَمرأ همرأه بوبوسته
۱۳ هو روز دوتأ جٚه عیسی پیروأن شوئون دیبید عِمائوسٚ دیهأت، کی دوازده کیلومتر جٚه اورشلیم فاصله دأشتی. ۱۴ اوشأن در موردٚ همه‌یٚ او ایتفاقأنی کی دکفته‌بو خوشأنٚ اَمرأ کلٚ گب زِئن دیبید. ۱۵ هَطو کی سرگرمٚ گب زِئن بید، عیسی خودشَ فأرسأنه اوشأنٚ ورجأ و اوشأنٚ اَمرأ همرأه بوبوسته ۱۶ ولی مثلٚ اَنکی اوشأنٚ چومأنٚ جولُویَ ایچی بیگیفته‌بو کی عیسایَ نشنأختید. ۱۷ عیسی اوشأنٚ جأ وأورسه: «راجع به چی گب زِئن دریدی؟» او دو نفر خوشأنٚ جا سر بِیسَه‌ییدی و غم و غُرصه اوشأنٚ دیمٚ رو نمایان بو. ۱۸ ایتأ او دو نفر کی اونٚ نام کِْلئوپاس بو وأگردسته بوگفته: «ینی تو تنها کسی ایسی کی جٚه ایتفاقأنی کی اَ چن روزٚ دورون اورشلیمٚ میأنی دکفته بی‌خبری؟» ۱۹ عیسی وأورسه: «چی بوبوسته مگه؟» اوشأن جواب بدَه‌یید: «عیسی ناصری کسی بو کی خو گفتار و کردارٚ اَمرأ هم خودا ورجأ و هم مردومأنٚ ورجأ ایتأ پیله‌دأنه نبی بو ۲۰ ولی پیله کاهنأن و اَمی پیله‌دأنه آدمأنٚ مذهبی اونَ بیگیفتید و تحویل بدَه‌یید، کی محکوم به مرگ ببه و بأزین اونَ به صلیب فأکشه‌ییدی. ۲۱ اَمأن اومید دأشتیم کی عیسی، وأستی او کسی بوبوسته‌بی کی ایسرائیلَ نجات بده. علاوه بر اون، سه روز ایسه کی جٚه اَ ماجرا گوذره. ۲۲ بعضی جٚه او زنأکأنی کی اَمی اَمرأ همرأه ایسیدی اَمرَ قاقَ کودیدی. اوشأن ایمروز صُب خروس خوأنٚ موقع عیسی قبرٚ سر بوشوییدی، ۲۳ اونٚ جسدَ پیدا نوکودید، وأگردستید بمویید و اَمرَ بوگفتید کی رویا دورونی فرشته‌یأنی بیده‌ییدی کی اوشأنَ بوگفتیدی: ‹عیسی زنده‌یه.› ۲۴ بأزین چن‌تأ اَمی یارأنم اونٚ قبرٚ سر بوشویید، هرچی کی زنأکأن بوگفته‌بید هوطویی بو، ولی عیسایَ نیده‌یید.»
۲۵ بأزین عیسی اوشأنَ بوگفته: «چقدر شومأن نادانیدی. چره شِمرِه سخته کی انبیا گبأنَ ایمأن بأورید؟ ۲۶ نأنستیدی قبلٚ اَنکی مسیح به خو جلال برسه وأستی اَ زحمتأن و سختیأنَ بیدینه؟» ۲۷ بأزین اوّل جٚه موسی کیتابٚ تورات و الباقی پیغمبرأنٚ کیتاب کی در موردٚ خودش بینیوشته بوبوسته‌بو اوشأنٚ رِه گب بزه.
۲۸ هو وخت کی فأرسئن دیبید او دیهأتی کی اوشأنٚ مقصد بو، عیسی ایجور وأنمود بوکوده کی خوأیه خو رأیَ ایدامه بده. ۲۹ ولی اوشأن اصرار و خوأهش بوکودیدی کی: «شب اَمی ورجأ بِیس، چون هوا تاریکَ بوستَن دره». اونم اوشأنٚ خانه بوشو و تا شب اویه بِیسه. ۳۰ وختی اوشأنٚ اَمرأ سفره سر بینیشته، عیسی نانَ اوسأده، خودایَ شوکر بوکوده و هر کودامَ ایتأ تیکه فدَه. ۳۱ هو وخت اوشأنٚ چومأن وازَ بوسته و اونَ بشنأختیدی. بأزین عیسی جٚه اوشأنٚ ورجأ غیبَ بوسته. ۳۲ او دوتأ همدیگرَ بوگفتید: «وختی جٚه موسی کیتاب و الباقی پیغمبرأنٚ کیتابأن اَمی اَمرأ گب زِئن دوبو، بیده‌یی چوطویی اَمی دیلأن به طلاب طلاب دکفته‌بو و ذوق زده بوبوسته‌بیم؟»
۳۳ بأزین فوری وأگردستید بوشویید اورشلیم، عیسی یازده‌تأ رسولٚ ورجأ کی خوشأنٚ دوستأنٚ اَمرأ ایتأ جا جمَ بوسته‌بید ۳۴ و اوشأنَ بوگفتید: «دوروسته، خوداوند زندَه بوسته و شمعونم اونَ بیده.» ۳۵ او دو نفرم تومامٚ ماجرایَ تعریف بوکودید و بوگفتید کی عیسی چوطویی بینٚ رأ اوشأنٚ ورجأ ظاهیرَ بوسته و موقع نانٚ تقسیم کودن اونَ بشنأختید.
عیسی مسیح خودشَ به خو شاگردأن ظاهیرَ کونه
۳۶ هَطویی کی شاگردأن در موردٚ او ایتفاقأن گب زِئن دیبید، عیسی اوشأنٚ میأن ظاهیرَ بوسته و بوگفته: «سلام بر شومأن.» ۳۷ اوشأن وحشت بوکودیدی و فیکر بوکودیدی کی روح بیده‌ییدی. ۳۸ عیسی بفرمأسته: «شمرَ چیسه؟ چره شیمی دیلأن آشفته‌یه و چره نخوأییدی بأور بوکونید کی من خودمم؟ ۳۹ می دس و پایَ فندرید و مرَ لمس بوکونید کی بفهمید من روح نی‌یم، چون روح کی بدن نأره ولی هَطو کی دینیدی من دأرم.» ۴۰ اَ گبأنَ بزه و خو دس و پایَ اوشأنَ نیشأن بدَه. ۴۱ اوشأن اَنقدر ذوق زده بوبوستید کی او چیزأنی کی دِئن دیبید نتأنستیدی باور بوکونید. بأزین عیسی اوشأنٚ جأ وأورسه: «چیزی خوردنٚ رِه دأریدی؟» ۴۲ اوشأن ایتأ تیکه بپخته مأیی‌یَ عیسایَ فدَه‌ییدی. ۴۳ عیسی‌یم مأیی‌یَ اوشأنٚ چومأنٚ ورجأ بوخورده. ۴۴ بأزین بفرمأسته: «شمرَ یاده کی قبلٚ می مردن، وختی شیمی اَمرأ ایسَه‌بوم، بوگفتم کی هرچی کی موسی کیتابٚ توراتٚ دورون و هَطویی‌یم الباقی پیغمبرأنٚ کیتاب و کیتابٚ مزامیر در موردٚ من بینیوشته بوبوسته وأستی ایتفاق دکفه؟ می منظور هَه جور ایتفاقأن#۲۴:۴۴ هَه جور ایتفاقأن ایشاره کونه به عیسی مسیحٚ مرگ و قیام بو.»
۴۵ بأزین عیسی اوشأنٚ ذهنَ وازَ کوده تا خودا کلامٚ نیویشته‌یأنَ#۲۴:۴۵ خودا کلامٚ نیویشته‌یأن ینی موسی تورات، مزامیر و پیغمبرأنٚ دیگرٚ کیتابأن. بفهمید ۴۶ و بفرمأسته: «بینیوشته بوبوسته کی مسیح وأستی رنج بکشه و خو جانَ فدا بوکونه و سومی روزٚ رِه، جٚه مورده‌یأنٚ میأنی ویریزه ۴۷ و به اونٚ نام توبه و آمرزشٚ گونایأن، دونیا تومامٚ میلتأنَ اعلام به و شروع اَ پیغامم وأستی جٚه اورشلیم ببه. ۴۸ همه‌تأنٚ شومأن بیده‌یید و شاهد ایسید کی تومامی‌یٚ او پیشگویی‌یأن ایتفاق دکفته. ۴۹ روح‌القدسَ کی می پئر وعده بدَه‌بو شمرَ فدم. پس تا زمأنی کی خودا قودرت و قوّت#۲۴:۴۹ خودا قودرت و قوّت هو روح‌القدسه کی جٚه آسمان ایمأندرأنٚ نازلَ به. جٚه آسمانٚ جور شمرَ بأیه، وأستی اورشلیمٚ شهرٚ دورون بئسید.»
عیسی مسیح به آسمان صعود کونه
۵۰ بأزین عیسی اوشأنَ تا نزدیکی بِیت‌عَنْیا ببرده و خو دسأنَ آسمانٚ طرف بولندَ کوده و اوشأنَ برکت بدَه. ۵۱ هوطو کی اوشأنَ برکت دَئن دوبو، اوشأنٚ جأ سیوأ بوبوسته و آسمانٚ جور ببرده بوبوسته. ۵۲ عیسی شاگردأن اونَ پرستش بوکودیدی و ذوق و شادی زیادٚ اَمرأ اورشلیمٚ طرف وأگردستید. ۵۳ معبدٚ صحنٚ دورون بوشویید و تومامٚ وخت اویه خودایَ ستایش کودیدی.
Currently Selected:
لوقا ۲۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media