لوقا ۱
۱
مقدّمه
۱ عالیجناب تِئوفیلوس، هَطو کی دأنیدی، خیلی‌یأن تلاش بوکودیدی تا او پیله‌دأنه ایتفاقأنی‌یَ کی اَمی میأن دکفته بینیویسید، ۲ دوروست هوطویی کی جٚه اوّل، عیسی شاگردأن، خوشأنٚ چومأنٚ اَمرأ بیده‌ییدی و مأموریت دأشتیدی کی او پیغامَ اعلام بوکونید و اَمرَ فأرسأنه‌یید. ۳ منم کی جٚه اوّل تومامی اَ ایتفاقأنَ دقّتٚ اَمرأ بررسی بوکودم، صلاح بیدم کی اَ پیشامدأنَ شمرَ، عالیجناب تِئوفیلوس، ترتیبٚ اَمرأ بینیویسم، ۴ تا او چیزأنٚ حقیقتٚ جأ کی تعلیم بیده‌ییدی، وأخبرَ بید.
فرشته یحیی بدونیا اَمونَ پیشگویی کونه
۵ او وختأن کی هیرودیس یهودیه پادشا بو، ایتأ کاهن زندگی کودی، زکریا نام، جٚه هارونٚ خاندان، کی ابیا‌یٚ کاهنٚ گروهٚ میأن خدمت کودی. اونٚ زن، اِلیزابِتم، هارونٚ تبارٚ جأ بو. ۶ زکریا و الیزابت، خودا ورجأ دوروستکارٚ آدمأن بید و خودا همه‌تأنٚ دستورأنَ تومام و کمال ایطاعت کودیدی ۷ ولی اوشأن زأکی نأشتیدی، چونکی اِلیزابِتٚ رِه زأی نوبوستی و هر دوتأن پیر بید.
۸ ایوار کی زکریا گروهٚ خدمتٚ نوبت بو و اون، خودا حوضور کاهنی خدمتَ انجام دَئن دوبو، ۹ کاهنأنٚ رسمٚ جأ قرعه‌کشی بوبوسته و قرعه زکریا نام دکفته کی بشه خوداوندٚ معبدٚ دورون و بخور بوسوجأنه. ۱۰ هَطویی کی بخور سوجأنَن دوبو، تومامٚ مردوم بیرون دوعا کودن دیبید. ۱۱ کی ایوأرکی خوداوندٚ فرشته، اونٚ ورجأ ظاهیرَ بوسته و بخورٚ آتشدانٚ راستٚ دس بِیسه. ۱۲ زکریا کی اَ منظره‌یَ بیده، جا بوخورده و بترسه. ۱۳ فرشته وأگردسته بوگفته: «زکریا، نوأ ترسئن! تی دوعا خودا ورجأ مستجاب بوبوسته. تی زنای، الیزابت، ایتأ پسر تِره زأیه کی اونٚ نامَ وأستی یحیی دوخوأنی. ۱۴ تِره شادمانی و خوشی اَوره و خیلی‌یأن، اَ زأکٚ بدونیا اَمونٚ وأسی خوشحالَ بیدی، ۱۵ چونکی خوداوندٚ ورجأ، اون پیله کس به. اون نوأستی هیوخت شراب و هر چیزی کی آدمَ مستَ کونه‌یَ لب بزنه. هَطویم او وختی کی بدونیا اَیه روح‌القدسٚ جأ پورَ به ۱۶ و خیلی جٚه ایسرائیلٚ قومٚ مردومأنَ خوداوند، خوشأنٚ خودا طرف وأگردأنه. ۱۷ اون، ایلیاسٚ روح و قودرتٚ اَمرأ، خوداوندٚ جأ پیشتر اَیه تا پئرأنٚ دیلَ زأکأنٚ طرف فاکٚشأنه و سرکشٚ آدمأنَ دوروستکار و حکیم چأکونه تا همه‌تأنَ خوداوندٚ اَمونٚ وأسی آمادَه کونه.» ۱۸ زکریا، فرشته جأ وأورسه: «چوطو وأستی باور بوکونم؟ هم من پیرم و هم می زنای.» ۱۹ فرشته، زکریا‌یَ بوگفته: «من جبرائیلم کی خودا حوضور ایسم. اون مرَ اوسه کوده کی تی اَمرأ گب بزنم و اَ خوروم خبرَ ترَ فدم. ۲۰ هسأ دِه لال بی و نتأنی گب بزنی تا تی زأی بدونیا بأیه، چونکی می گبأنَ کی خو موقرر بوبوسته وخت ایتیفاق دکفِه باور نوکودی.»
۲۱ مردومأنی کی زکریا رافا ایسَه‌بید، تعجب بوکودید کی چره اون معبدٚ دورون اَنقدر بِیسه. ۲۲ وختی زکریا معبدٚ جأ بیرون بمو و نتأنستی اوشأنٚ اَمرأ گب بزنه، همه‌تأن بفهمستیدی کی معبدٚ دورون ایتأ رویا بیده، چونکی فقط ادا و ایشاره کودی و گب زِئنٚ قودرتَ نأشتی.
۲۳ زکریا وختی خو کاهنی خدمتٚ دوره‌یَ تومامَ کوده، وأگردسته بخانه. ۲۴ بأزین اونٚ زنای، الیزابت، شکم اوسأده و پنج ماه خو خانه میأن بِیسه کی مردومٚ چومأنٚ جأ دور ببه ۲۵ و گفتی: «خوداوند مِرِه اَ کارَ بوکوده. اَ روزأن مرَ لطف بوکوده کی زأی نأشتنٚ وأسی آدمأنٚ ورجأ خجالت نکشم.»
خودا فرشته، جبرائیل، عیسی مسیحٚ تولدَ پیشگویی کونه
۲۶ الیزابت شیش ماه شکم دأشتی کی خودا خو فرشته، جبرائیلَ اوسه کوده شهرٚ ناصره، کی اوستانٚ جلیلٚ میأن نهَه‌بو ۲۷ کی بشه ایتأ باکره دُخترٚ ورجأ کی مریم نام دأشتی. مریم یوسفٚ نامزد بو کی داوودٚ نبی خاندانٚ شین بو. ۲۸ فرشته بوشو مریمٚ ورجأ و بوگفته: «سلام ترَ گم اَی کسی کی خودا ترَ لطف بوکوده. خوداوند تی اَمرأ‌یه.»
۲۹ مریم فرشته گبأنٚ جأ پریشأنَ بوسته و نفهمسته کی او سلامٚ معنی چیسه. ۳۰ ولی فرشته وأگردسته بوگفته: «مریم، نوأ ترسئن. خودا ترَ لطف بوکوده. ۳۱ تو شکم اوسأنی، ایتأ پسر زأیی کی اونٚ نامَ وأستی ‹عیسی› بنی. ۳۲ اون، پیله کس به و ‹خودای موتعالٚ پسر› دوخوأده‌به و خوداوند، اونٚ جد، داوودٚ نبی، پادشایی تختَ اونَ فده. ۳۳ اون تا اَبد یعقوبٚ خاندانَ فرمانروایی کونه. اونٚ پادشایی هیوخت تومامٚ بوستنی نی‌یه.» ۳۴ مریم، فرشته جأ وأورسه: «چوطویی ممکن به؟ من تا به هسأ هیچ مردأکٚ اَمرأ رابطه نأشتیم.» ۳۵ فرشته، مریمَ بوگفته: «روح‌القدس ترَ نازل به و خودای موتعالٚ قوّت تی سر سایه تأوده و هَنٚ وأسی او زأی موقدّس و خودا پسر دوخوأده به. ۳۶ وأ بدأنی، الیزابتم کی تی قوم و خویشه پیری میأن شکم اوسأده و اونٚ زأکم پسره. هَطویه، اونی کی گیدی اونٚ رِه زأی نیبه، اَسأ شیش ماه شکم دأره. ۳۷ چونکی هیچ کاری نی‌یه کی خودا نتأنه انجام بده.» ۳۸ مریم فرشته‌یَ بوگفته: «من قوبیل دأرم، من خوداوندٚ کنیزم. هَطویی کی تو می باره بوگفتی، ایتفاق دکفه». بأزین فرشته جٚه اونٚ ورجأ بوشو.
مریم، اِلیزابِتٚ اَمرأ مولاقات کونه
۳۹ او روزأن، مریم ویریشته و عجله اَمرأ بوشو اِلیزابِتٚ ورجأ کی ایتأ جٚه یهودیه کوهستانٚ شهرأنٚ میأن زندگی کودی. ۴۰ وختی فأرسه زکریا خانه، اِلیزابِتَ سلام بوگفته. ۴۱ هَطو کی الیزابت مریمٚ سلامَ بیشنأوسته، اونٚ زأی، اونٚ رحمٚ میأن تکان بوخورده و اِلیزابِتم روح‌القدسٚ جأ پورَ بوسته ۴۲ و صدای بولندٚ اَمرأ بوگفته: «تو تومامٚ زنأکأنٚ میأن موبارکی و موبارکه او زأی کی تی رحمٚ میأن نهَه. ۴۳ من کیسم کی می خوداوندٚ مار بأیه مرَ بیدینه؟ ۴۴ هَطو کی تی سلامٚ صدا می گوشَ فأرسه، زأی می رحمٚ دورون شادی جأ تکان بوخورده. ۴۵ خوش بحالٚ اونکی کی باور بوکوده کی هر چی خوداوند اونَ بوگفته، انجام بٚه.»
مریمٚ سرود
۴۶ مریم جواب بده:
«تومامٚ می جان و دیلٚ اَمرأ خوداوندَ ستایش کونم،
۴۷ و می روح، خودا وأسی، کی مرَ نجات دهه، به ذوق اَیه،
۴۸ چونکی اون مرَ کی اونٚ کوجه‌دأنه کنیزم لطف بوکوده.
بأزین تومامٚ نسلأن مرَ موبارک دوخوأنیدی،
۴۹ چونکی قادرٚ مطلق کی اونٚ نام، قدوس ایسه مِره پیله‌دأنه کارأن انجام بدَه.
۵۰ اونٚ رحمت پوشت در پوشت کسأنی‌رِه ایسه کی اونٚ جأ ترسیدی.
۵۱ خودا خو قودرتَ نیشأن بدَه
و اوشأنی کی خوشأنٚ دیلٚ میأن غرور دأشتیدی تار و مارَ کوده؛
۵۲ زورگویأنَ تختٚ جأ بیجیر بأورده؛
و فروتنٚ آدمأنَ سربولندَ کوده.
۵۳ گرسنه‌یأنَ خوروم چیزأنٚ اَمرأ سِئرَ کوده
ولی مال و منال‌دارأنَ دسٚ خالی اَمرأ اوسه کوده.
۵۴ اون خو رحمتٚ اَمرأ خو خادم، ایسرائیلَ حمایت بوکوده،
۵۵ هَطویی کی اَمی اجداد،
ایبراهیم و اونٚ زأکأنَ اَبدی وعده‌یَ بدَه‌بو.»
۵۶ مریم حدودٚ سه ماه اِلیزابِتٚ ورجأ بِیسه و بأزین وأگردسته خو خانه.
یحیی بدونیا اَمون
۵۷ الیزابتٚ زایمانٚ وخت فأرسه و خو پسرَ بدونیا بأورده. ۵۸ وختی اونٚ همساده‌یأن و فک و فامیلأن وأخبرَ بوستیدی کی خوداوند چی پیله‌دأنه لطفی اونَ بوکوده، همه‌تأن اونٚ اَمرأ شادی بوکودید.
۵۹ ایتأ هفته بعد، مردوم بموییدی کی او زأکَ ختنه بوکونید و خوأستید کی اونٚ پئرٚ نام، زکریا‌یَ اونٚ رو بنید ۶۰ ولی الیزابت قوبیل نوکوده و بوگفته: «زأکٚ نام وأستی یحیی ببه.» ۶۱ اوشأن اِلیزابِتَ بوگفتیدی: «تی خاندانٚ میأنی هیکس اَ نامَ نأشتی» ۶۲ و ایشاره اَمرأ اونٚ پئر زکریا جأ وأورسه‌ییدی: «تی نظر چی‌یه؟» ۶۳ زکریا اوشأنٚ جأ ایتأ لوحٚ چوبی بخوأسته و اونٚ رو بینیویشته: «اَنٚ نام یحیی‌یه» و اوشأن همه‌تأن تعجب بوکودیدی. ۶۴ ایدفعه‌یی زکریا به گب بمو و خودایَ ستایش بوکوده. ۶۵ تومامی‌یٚ همساده‌یأن بترسه‌ییدی و اَ خبر سرتاسرٚ یهودیه کوهستانأنٚ میأنی پخشَ بوسته. ۶۶ همه‌یٚ کسأنی کی اَ ماجرایَ ایشنأوستیدی، خوشأنٚ دیلأنٚ میأن فیکر کودیدی و گفتیدی: «اَ زأی چی خوأیه ببه»، چونکی خوداوندٚ دس اونٚ اَمرأ بو.
زکریا نبوّت
۶۷ اونٚ پئر، زکریا، روح‌القدسٚ جأ پورَ بوسته و اَطویی نبوّت بوکوده:
۶۸ «موبارک ببه خوداوند، ایسرائیلٚ خودا،
کی خو قومٚ کومک بمو و اوشأنَ آزادَ کوده.
۶۹ خو خادم، داوودٚ پادشا خاندانٚ جأ،
ایتأ قودرتمندٚ منجی‌یَ بولندَ کوده،
۷۰ هَطویی کی جٚه قدیمان خو موقدّسٚ پیغمبرأنٚ زوانٚ اَمرأ اَ وعده بدَه‌بو،
۷۱ کی اَمرَ جٚه دوشمنأن و اوشأنی کی اَمی جأ نیفرت دأریدی، نجات بده،
۷۲ و اَمی پئرأنٚ اَمرأ رحمتٚ مره رفتار کونه
کی خو موقدّسٚ عهد و پیمانَ به یاد بأوره،
۷۳ او عهدی کی اَمی پئر، ایبراهیمٚ اَمرأ دٚوٚسته‌بو
۷۴ کی اَمرَ دشمنٚ دسٚ جأ آزادَ کونه،
و عنایت بوکوده کی اونَ بدونٚ ترسٚ مره
۷۵ تا وختی کی زنده ایسیم، پاکی و خُبی اَمرأ عیبادت بوکونیم.
۷۶ و تو، می زأی یحیی، خودایٚ موتعالٚ پیغمبر دوخوأده‌بی،
چونکی خوداوندٚ جُلُو رأ شی
کی رأیَ اونٚ اَمونٚ رِه آمادَه کونی،
۷۷ و اونٚ قومَ وأخبرَ کونی کی اوشأنٚ گونایأنٚ ببخشه بوستنٚ اَمرأ نجات یأفیدی،
۷۸ چونکی اَمی خودا رحمت و دیل‌سوجأنئنٚ وأسی ایسه
کی خورشید صُبٚ دم آسمانٚ جأ اَمی وأسی طلوع کونه،
۷۹ تا اوشأنی‌یَ کی تاریکی و مرگٚ سایه دورون ایسَه‌ییدی، دتأوه
و اَمرَ صلح و سلامتی طرف هیدایت بوکونه.»
۸۰ اَ زأی هَطو پیلَه بوستی و خوداوندٚ روحٚ اَمرأ قوی بوستی و تا روزی کی بنی‌ایسرائیلٚ رِه ظاهیرَ بوسته، بیابانٚ میأن ایسَه‌بو.
Currently Selected:
لوقا ۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media