یونس ۱
۱
یونسٚ نافرمانی خوداوندٚ جأ
۱ ایتأ روز خوداوندٚ کلام، یونسَ کی اَمِتّای زأی بو، نازلَ بوسته و بفرمأسته: ۲ «ویریز بوشو نینوا، او پیله‌دأنه شهرٚ دورون، و اونٚ مردومٚ‌ره اعلام بوکون کی اوشأنٚ شرارتٚ جأ خبر دأرم.» ۳ ولی یونس ویریشته و بخوأسته خوداوندٚ حوضورٚ جأ، به سرزیمینٚ ترشیش#۱:۳ تَرشیش ایتأ جٚه شهرأنٚ اسپانیای مدرن بو کی ایطرفٚ دیگر بو، فرار بوکونه. هَنٚ وأسی، به بندرٚ یافا بوشو و اویه ایتأ کشتی‌یَ بیده کی شویی تَرشیش. خو کرایه‌یَ فدَه و سوارَ بوسته تا ملوانأنٚ اَمرأ بشه تَرشیش و اَطویی خوداوندٚ جأ فرار بوکونه.
۴ ولی خوداوند ایتأ پیله‌دأنه باد، دریا سر اوسه کوده و کولاکی بوبوسته کی کم بمأنسته‌بو کشتی بِشکَفه. ۵ ملوانأن بترسه‌ییدی و هر کدام خوشأنٚ خودا ورجأ فریاد بزه‌ییدی و کومک بخوأستیدی. بأزین کشتی بارَ دریا میأن فوکودیدی تا کشتی سُبوکَ به. ولی پیشتر، یونس کشتی ته بوشو، اویه درازَ کشه و بوخوفته و اونٚ خواب سنگینَ بوسته. ۶ ناخدا اونَ نزدیک بوبوسته و بوگفته: «چوطویی تأنی راحت بوخوسی؟ ویریز و تی خودایَ دوخوأن بلکی تی خودا اَمرَ رحم بوکونه و هلاکَ نیبیم.»
۷ ملوانأن همدیگرَ بوگفتیدی: «هسأ ایتأ قرعه تأودیم تا بیدینیم اَ بلا کی وأسی اَمی سر بمو.» پس اَطو بوکودیدی و قرعه یونسٚ نام دکفته. ۸ اوشأن یونسٚ جأ وَورسه‌ییدی: «اَمرَ بوگو کی وأسی اَ بلا اَمی سر بمو. تی کار چیسه؟ جٚه کویه اَمون دری؟ کو سرزیمین و کویدأنه قومٚ شینی؟» ۹ یونس بوگفته: «من عیبرانی‌یم و خوداوند، خودای آسمانی‌یَ پرستش کونم، اونی کی دریا و خشکی‌یَ خلق بوکوده.» ۱۰ اَشأنٚ دیلٚ زاله بترکسته و بوگفتیدی: «اَن دِه چی کاری بو تو بوکودی؟» چره کی دأنستیدی یونس، خوداوندٚ جأ فرار کودن دره چون خودش، اوشأنَ بوگفته‌بو.
۱۱ هو وخت کولاک و طوفان ویشتر و ویشتر بوستی. هَنٚ وأسی، ملوانأن یونسٚ جأ وَورسه‌ییدی: «اَمأن تی اَمرأ چی بوکونیم تا دریا اَمِره آرام بیگیره؟» ۱۲ یونس بوگفته: «مرَ بیگیرید و دریا دورون تأودید تا آرامَ به، چونکی دأنم اَ کولاک می وأسی شمرَ گیرفتارَ کوده.» ۱۳ ولی ملوانأن تلاش بوکودیدی پارو بزه‌ییدی تا کشتی‌یَ به خشکی فأرسأنید امّا نتأنستید، چونکی دریا طوفان به ضدٚ اوشأن ویشترَ بوستی. ۱۴ پس فریاد کونان دوعا بوکودیدی و بوگفتید: «خوداوندأ، تی جأ خوأییم اَمرَ، اَ مردأکٚ وأسی هلاک نوکونی و وَنل کی اَمی دس، ایتأ بی‌گناهٚ خونٚ اَمرأ آلوده به. چونکی اَی خوداوند، هرچی خوأستی، بوکودی.»
۱۵ بأزین یونسَ بیگیفتید، اونَ دریا دورون تأودَه‌ییدی و طوفان تومامَ بوسته و دریا‌یم آرام بیگیفته. ۱۶ ملوانأن اَ پیشامدٚ وأسی خوداوندٚ جأ خیلی بترسه‌ییدی و اونَ قوربانی تقدیم و اونٚ ورجأ نذرأن بوکودید. ۱۷ هو وخت خوداوند ایتأ پیله‌دأنه ماهی‌یَ اوسه کوده تا یونسَ قورت بده و یونس سه روز و سه شب اونٚ شکمٚ میأن بمأنسته.
Currently Selected:
یونس ۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media