ایوب ۳۱
۳۱
ایوبٚ آخرین دفاع
۱ «می چومأنٚ اَمرأ عهد و پیمان دٚوٚستم؛
پس چوطو تأنم ایتأ جوانٚ لاکوی‌یَ فندرم؟
۲ می سأم جٚه خودایی کی او بوجور ایسَه،
و می ارث و میراث جٚه قادرٚ مطلق کی آسمانٚ جور ایسَه، چی تأنه ببه؟
۳ ینی گیرفتاری شرورأنٚ سأم نی‌یه؟
و بلا، بدکارأنٚ ارث نی‌یه؟
۴ ینی اون، می رأیأنَ نیدینه،
و تومامٚ می قدمأن نیشمره؟
۵ «اگه دورُغٚ اَمرأ رأ بوشوم،
و می پایأن فریب دَئنٚ وأسی توندَ گیفتی،
۶ ببه کی به قائده ایمتحان ببم،
کی خودا بیدینه کی من عیب و ایرادی نأرم!
۷ اگه می قدمأن کجَ بوسته و جٚه رأ بدر بوشو،
یا می دیل، می چومأنٚ دونبالسر رأ دکفته،
یا ایتأ لکه می دسأنَ بچسبسته،
۸ ببه کی من بکارم و اینفرٚ دیگر بوخوره،
و ببه کی می محصول ریشه جأ بکنده ببه!
۹ «اگه می دیل ایتأ زنأکٚ وأسی گول بوخورده،
یا می همساده درٚ ورجأ اونٚ زنأکٚ رِه یاواشه رافا بِئسم،
۱۰ پس ببه کی می زنأی، اینفرٚ دیگرٚ آردَ آسیاب بوکونه،
و دیگرأن اونٚ اَمرأ بوخوسید!
۱۱ چره کی او کار بد بو؛
و گوناهی کی وأستی موجازات بوبوسته‌بی؛
۱۲ آتشی‌یَ مأنستی کی سوجأنه و همه چی‌یَ فٚوٚره،
و تومامٚ می محصولَ ریشه جأ کندی.
۱۳ «اگه می غولام و یا می کنیزٚ داد فئنرسم،
او وختی کی می جأ شاکی بید،
۱۴ و بأزین خودا می ضد ویریزه، چی وأ بوکونم؟
وختی می جأ وأزخوأست کونه، چوطو وأ اونَ جواب بدم؟
۱۵ خودایی کی مرَ رَحِمٚ دورونی خلق بوکوده، اونم خلق نوکوده؟
مگه اَمأن دوتأیَ، اینفرٚ رَحِمٚ دورون خلق نوکوده؟
۱۶ «اگه موحتاجٚ آدمأنٚ دیلٚ ناجه‌یَ اوشأنٚ جأ دریغ بوکودم
و ویوه زنأکأنٚ چومأن می رافا ایسَنٚ جأ کم‌سو بوبوسته
۱۷ اگه می لقمه‌یَ تنهایی بوخوردم،
و اونَ یتیمٚ اَمرأ سأم نوکودم -
۱۸ در حألی کی جوانی جأ یتیمأنَ، ایتأ پئرٚ مأنستن پیلَه کودم،
و جٚه او وختی کی بدونیا بموم، ویوه زنأکأنَ رأنمایی بوکودم -
۱۹ اگه بیدم کی اینفر لیباس نأشتنٚ جأ مردن دره
یا ایتأ موحتاجٚ آدم کی لیباس نأره،
۲۰ و دیلٚ و جانٚ اَمرأ مرَ برکت ندَه،
جٚه اَ خأطر کی می گوسفندأنٚ پشمَ اونَ فأدم تا سرما جأ در اَمأن ببه،
۲۱ اگرم یتیمٚ رو دس درازَ کودم،
چره کی محکمه دورون دوس و رِفِق می جأ حمایت کودیدی،
۲۲ ببه کی می بازو می شانه جأ بکفه،
و می ساعد، آرنجٚ جأ دورسفه!
۲۳ چره کی خودا بلا جأ وحشت دأرم،
و نتأنم اونٚ عظمتٚ ورجأ تاب بأورم.
۲۴ «اگه زرَ اعتماد بوکودم،
و نابٚ زرَ بوگفتم: ‹تو می امنیتی›
۲۵ اگه می ایتأ عالمه مال و منالٚ وأسی شادی کودیم،
و جٚه اَنکی می دسٚ اَمرأ خیلی زیاد جمَ کودم، خوش بوبوسته‌بیم،
۲۶ اگه آفتابٚ شبق زِئنَ فندرستم،
یا روشنٚ مهتاب کی دوأرستَن‌دره
۲۷ و می دیل قأیمکی گول بوخورده‌بو،
و پرستشٚ وأسی می دسٚ اَمرأ اوشأنٚ رِه ماچی اوسه کودم،
۲۸ اَ کارأنم گونایأنی بید کی وأستی موجازات بیبید
چره کی خودایٚ موتعالَ اینکار کودیم.
۲۹ «اگه می دوشمنٚ گیرفتاری وأسی شادی بوکودم،
یا جٚه بلایی کی اونٚ دامنَ بیگیفته خوشحالی بوکودم -
۳۰ می زوانٚ گوناه کودنٚ جولُویَ بیگیفتم
و اونٚ جانَ نفرین نوکودم -
۳۱ اگه می خیمه آدمأن نوگفتید:
‹کیسه کی اونٚ خوراکٚ جأ سِئرَ نوبوسته‌بی؟› -
۳۲ غریبٚ آدم، شبَ کوچه میأن صُب نوکوده،
چره کی می خانه در، رأ دوارٚ وأسی واز بو -
۳۳ اگه الباقی آدمأنٚ مأنستن می تقصیرَ قایمَ کودم
و می گونایَ می دیلٚ دورون جیگا بدَم،
۳۴ چره کی پیله جماعتٚ جأ ترسه‌ییم،
و طایفه‌یأنٚ خوارَ کودن مرَ به وحشت تأودَه،
جوری کی می دَهنَ دٚوٚستم، و خانه جأ بیرون نوشوم،
۳۵ «اَی کاش اینفر بِئسه کی می گبأنَ بیشنأوه!
اهأن، می مُهر آماده‌یه؛
ببه کی قادرٚ مطلق مرَ جواب بده،
و می شاکی خو ادعایأنَ طومارٚ دورون بینیویسه!
۳۶ ایطمینأن بدأرید کی اوشأنَ می چأنَ گیفتیم،
و تاجٚ مأنستن می سرٚ رو نَییم.
۳۷ تومامٚ می قدمأنٚ وأسی اونَ حیساب پس دَییم،
و اِمّیرٚ مأنستن اونَ نزدیکَ بوستیم.
۳۸ «اگه می زیمین می ضد ایجگره بزه،
و اونٚ شیارأن کس‌کسٚ اَمرأ گریه بوکودیدی،
۳۹ اگه اونٚ محصولَ موفت بوخوردم،
و رعیتأنٚ جانَ فیگیفتم،
۴۰ ببه کی تمشأن، گندمٚ عوض بیرون بأیید،
و واش، جوبٚ عوض!»
ایوبٚ گبأن تومامَ بوسته.
Currently Selected:
ایوب ۳۱: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
