ایوب ۳
۳
ایوب او روزی‌یَ کی بدونیا بمو نفرین کونه
۱ بأزین ایوب به گب بمو و او روزی‌یَ کی بدونیا بمو نفرین بوکوده ۲ و بوگفته:
۳ «سیا ببه او روزی کی بدونیا بموم
و او شبی کی می مار مرَ شکم اوسأده.
۴ کأشکی هو روز ظولمأت ببه!
کأشکی خودا بوجورٚ جأ اونَ نیدینه
و هیچ نوری اونَ دئنتأوه.
۵ کأشکی تاریکی و ظولمأت اونَ بپوشأنه
و اونٚ جور همیشه ابر بِئسه
و کسوف اونَ بترسأنه.
۶ او شبَ تاریکی و توندٚ ظولمأت#۳:۶ توندٚ ظولمات ینی ظولماتٚ غلیظ بیگیره
و جُزٚ روزأنٚ سال نبه
و ماهأنٚ دورون بحیساب نأیه.
۷ ببه کی او شبٚ دورون هیکس نتأنه زأیدارَ به
و اونٚ دورون هیکس ذوقٚ اَمرأ فریاد نزنه.
۸ اوشأنی کی نفرین کودنٚ وأسی همیشه حاضریدی، او روزَ نفرین بوکونید،
اوشأنی کی لِویاتانٚ#۳:۸ افسانه‌یأنٚ میأن بمو کی لِویاتان ایتأ هیولا بو، پیله پیچ واپیچٚ لأنتی مأنستن، کی دریا دورون زندگی کودی و سمبلٚ خرابَ کودن و هرج و مرج بو. انتریکَ کودنٚ رِه ماهریدی.
۹ ستاره‌یأنی کی صُبٚ سر شفق زنیدی تاریکَ بید،
او شب نورٚ رافا بِئسه ولی نأیه
و صُبٚ سیفیده‌یَ نیدینه.
۱۰ چره کی می مارٚ رحمٚ درأنَ دئنوٚسته،
و سختی‌یَ می چومأنٚ جأ قایم نوکوده.
۱۱ «چره او زمأتی کی بدونیا بموم نمردم،
و وختی رحمٚ جأ بیرون اَمون دوبوم جان ندَم؟
۱۲ چره می مار مرَ خو ز‌انویأنٚ سر بنَه
و کشَ گیفته کی شیر بده؟
۱۳ چونکی اگه اَطو بوبوسته‌بی تا هسأ آرامشٚ اَمرأ درازَ کشه‌ییم
و خوفتیم و ایستراحت کودیم،
۱۴ دونیا پادشایأن و مشاورأنٚ ورجأ
کی خوشأنٚ رِه قصرأنی چأکودیدی کی هسأ ویرأنیدی،
۱۵ و یا حاکمأنی ورجأ کی زر دأشتیدی
و خوشأنٚ خانه‌یأنَ نقره جأ پورَ کودید.
۱۶ یا چره وأرگأده زأکٚ مأنستن خاکٚ جیر نوشوم،
زأکی کی هیوخت نورٚ رنگَ نیده؟
۱۷ اویه شرورٚ آدمأن، اذیت و آزار کودنٚ جأ دس اوسأنیدی
و اوشأنی کی خسته ایسید ایستراحت کونیدی.
۱۸ اویه اسیرأن آرامشٚ اَمرأ همدیگرٚ مره زندگی کونید
و صاب‌کارأنٚ داد و فریادَ نیشنأویدی.
۱۹ کوجه‌دأنه و پیله‌دأنه اویه ایسَه‌ییدی
و نوکرأن خوشأنٚ اربابٚ دسٚ جأ آزاد ایسید.
۲۰ «چره روشنایی، سختی بکشه آدمأنَ فأدَه به
و زندگی، زرخٚ جانأنَ؟
۲۱ کی خوشأنٚ مرگَ آرزو کونیدی ولی نیأفیدی،
کی ویشتر جٚه قایمٚ بوسته گنجأن، اونٚ دونبأل ایسید
۲۲ کی قبرٚ یأفتنٚ وأسی شادَ بید
و خوشحالی مره ذوق کونیدی.
۲۳ چره نور کسی‌یَ فأدَه به
کی اونٚ رأ قایمَ بوسته
و خودا اونٚ دور و ورَ دٚوٚسته.
۲۴ چره کی آه کشئن، می نانه
و می گریه زاری آبٚ مأنستن فیوِه.
۲۵ چره کی اونچی کی اونٚ جأ وحشت دأشتیم می سر بمو،
اونچی کی اونٚ جأ ترسه‌ییم مِره ایتفاق دکفته.
۲۶ آرام و قرار نأرم،
مِره آرامش وجود نأره، بلکی فقط پریشانی.»
Currently Selected:
ایوب ۳: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
