ایوب ۲۹
۲۹
ایوبٚ آخری گبأن
۱ ایوب خو گبأنَ اَطویی ایدامه بدَه:
۲ «کأشکی قبلنأن مأنستن بوبوسته‌بیم،
او روزأنٚ مأنستن کی خودا می هوایَ دأشتی.
۳ او وختی کی اونٚ چراغ می سر تأبستی،
و اونٚ نورٚ اَمرأ تاریکی میأن دوأرستیم
۴ هوطو کی خوروم روزأنٚ میأن بوم،
هو وخت کی خودا دوستی سایه می خانه سر نهَه‌بو،
۵ هو زمأتی کی قادرٚ مطلق هنوز می اَمرأ بو،
و می زأکأن می دور و ور ایسَه‌بید،
۶ او وخت کی می پایَ شیرٚ اَمرأ شوستیم،
و صخره، مِره روغنٚ جأ روخان رأ تأوده‌یی!
۷ «وختی شوییم بیرون، شهرٚ دروازه ورجأ،
و شهرٚ میدانٚ#۲۹:۷قدیمٚ زمأت، شهرٚ دورون ایتأ جا نهَه‌بو کی ریش سیفیدأن اویه نیشتیدی و مردومٚ وأسی داوری و حوکم کودیدی و اوشأنٚ رِه تصمیم گیفتید. دورون می جا سر نیشتیم،
۸ جوانأن مرَ ده‌ییدی و جیگا خوردیدی،
و پیرٚ مردأکأن ویریشتیدی و به پا ایسَه‌یید.
۹ پیله کسأن، گب زِئنٚ جأ دس اوسأدیدی،
و دسٚ اَمرأ خوشأنٚ دَهنَ گیفتیدی.
۱۰ نجیب زاده‌یأنٚ صدا خاموشَ بوسته،
و اوشأنٚ زوان اوشأنٚ نکتالَ بچسبسته.
۱۱ او گوشی کی می جأ ایشنأوستی، مرَ موبارک دوخوأدی،
او چومی کی مرَ فندرستی، می جأ تعریف کودی.
۱۲ چره کی فقیرٚ آدمی‌یَ کی ایجگره زه‌یی، کومک کودیم
و هَطویم یتیمی‌یَ کی یاوری نأره.
۱۳ کسی کی مردَن‌دوبو، مِره دوعای خیر کودی،
و می وأسی ویوه زنأکٚ دیلَ شادی جأ آواز خوأندی.
۱۴ دوروستکاری‌یَ دوکودم و می لیباس بوبوسته؛
عیدالت مِره ردا و دستارٚ مأنستن بو.
۱۵ کورأنٚ رِه چوم بوم،
و شلأنٚ رِه لٚنگ.
۱۶ موحتاجأنٚ رِه پئر بوم،
و غریبه‌یأنٚ حقٚ جأ دفاع کودیم.
۱۷ شرورأنٚ گازأنَ ایشکنه‌ییم،
و شکارَ اوشأنٚ گازأنٚ جأ دوزأنه‌ییم.
۱۸ «فیکر کودیم: ‹می خانه دورون میرم،
و می عمرٚ روزأن فورشٚ دأنه‌یأنٚ مأنستن ویشترَ بیدی.
۱۹ می ریشه‌یأن آبٚ طرف شیدی،
و ایاز می شاخه‌یأنٚ رو شبَ به صُب فأرسأنه.
۲۰ می جلال همیشه می اَمرأ تازه‌یه
و می کمان می دسٚ دورون همیشه نو مأنه.›
۲۱ «مردومأن مرَ گوش دَییدی و می رافا ایسَه‌ییدی،
و ساکیتَ بوستید کی می نصیحتَ بیشنأوید.
۲۲ می گبٚ سر گب نزه‌ییدی،
و می گبأن اوشأنٚ رو آبٚ مأنستن چکه کودی.
۲۳ می وأسی رافا ایسَه‌ییدی هوطو کی وارشٚ وأسی،
و خوشأن دَهنَ وازَ کودیدی هوطو کی بهارٚ وارشٚ وأسی.
۲۴ وختی کی ایطمینأن نأشتیدی، لبخندٚ اَمرأ اوشأنَ تشویق کودیم
و می خوشرویی اوشأنٚ رِه ارزش دأشتی.
۲۵ رأهَ اوشأنٚ وأسی اینتخاب کودیم و رهبری تختٚ سر نیشتیم،
پادشا مأنستن بوم خو لشکرٚ دورون،
کسی مأنستن کی عزادأرأنَ دیلدأری دهه.
Currently Selected:
ایوب ۲۹: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
