ایوب ۲۴
۲۴
۱ چره قادرٚ مطلق، وخت و زمأت، داوری کودنٚ رِه موشخص نوکونه،
و چره خوداشناسأن هیوخت او روزأنَ نیدینیدی؟
۲ بعضیأن خوشأنٚ زیمینٚ مرزأنَ پس و پیش کونیدی،
و هَطویم مردومٚ گله‌یأنَ دوزأنیدی و بریدی چرا.
۳ یتیمأنٚ اولاغأنَ فورأنیدی،
و وِئوه زنأکأنٚ ورزأیَ گرویی گیریدی.
۴ فقیرٚ آدمأنَ جٚه اوشأنٚ رأ سر بیرون تأودیدی،
و تومامٚ بیچاره‌یأنی کی زیمینٚ سر ایسَه‌ییدی خوشأنَ جیگا دهیدی.
۵ اوشأن وحشی خرأنٚ مأنستن صارا دورون
خوشأنٚ کارٚ وأسی بیرون شیدی کی خوراک بیأفید،
و خوشکٚ زیمین اوشأنٚ زأکأنَ خوراک فأده.
۶ مزرعه دورون گندمأنَ جمَ کونیدی،
و انگور دأنه‌یأن کی بجا بمأنسته، شرورأنٚ انگور باغٚ جأ اوچینیدی.
۷ لیباس دونکوده و جان برئنده، شبَ سر کونیدی،
و سرما دورون هیچی نأریدی کی خوشأنَ دشأنید.
۸ کویأنٚ وارشٚ جأ هیستَ بیدی،
و جٚه اَ خأطر کی سرپنایی نأشتید، صخره‌یأنَ کشه گیریدی.
۹ یتیمٚ زأی، مارٚ سینه جأ دوزأنیدی،
و فقیرأنٚ زأی گرویی وأسی اسیرَ به.
۱۰ لیباس دونکوده و جان برئنده جٚه هر طرف سرگردأنیدی،
و ویشتأیی شکمٚ اَمرأ دسته بوکوده محصولَ خوشأنٚ کولٚ سر نیهیدی بریدی.
۱۱ جٚه زیتونٚ دارأنی کی تترج نهَه‌ییدی، روغن گیریدی؛
لبأنٚ تشنه اَمرأ، چاچه دورون انگورأنَ لقد زنیدی.
۱۲ کسأنی کی مردَن دریدی، اوشأنٚ آه و ناله ایشنأوسته به
و زخمی بوبوسته آدمأن، ایجگره زنیدی و کومک خوأییدی،
ولی خودا، آدمأنٚ ناجورٚ کارأنَ توجه نوکونه.
۱۳ «ایسَه‌ییدی کسأنی کی نورٚ ضد آشوب بپا کونیدی،
و اونٚ رأیأنَ نشنأسیدی،
و اونٚ رأ دورون نِیسید.
۱۴ آدم‌کوش، خروس خوأن ویریزه
کی فقیر و بیچاره‌یَ بوکوشه،
و شب، دوزدٚ مأنستن به.
۱۵ زناکارٚ آدمٚ چوم غروبٚ وأسی رافا ایسه
و گه: ‹هی چومی مرَ نیدینه›
و خو دیمَ پوشأنه.
۱۶ ظولمأتٚ میأن نقب زنیدی شیدی خانه‌یأنٚ دورون
و روز، خوشأنَ جیگا دهیدی؛
اوشأن، روشنایی اَمرأ غریبه‌یید.
۱۷ تومامٚ اوشأنٚ رِه ظولمأت صُبٚ مأنستنه،
چره کی ظولمأتٚ ترسأنَ شنأسیدی.
۱۸ «آبٚ سر کخٚ مأنستنیدی؛
اوشأنٚ سأم زیمینٚ جأ لعنت بوبوسته‌یه،
و هیکس اوشأنٚ انگور باغٚ دورون نشه.
۱۹ هوطو کی خوشکسالی و گرمش ورفٚ آبَ دوزأنه،
هَطویم مورده‌یأنٚ دونیا گوناهکارأنَ.
۲۰ رَحِم اوشأنَ جٚه خأطر بره،
و کلم اوشأنَ نوشٚ جان کونه
دِه هیکس اوشأنٚ یاد نأوره
پس شرارت دارٚ مأنستن وأوِه به.
۲۱ «زنأکی‌یَ کی اونٚ رِه زأی نیبه، ظلم کونیدی،
وِئوه زنأکأنَ خُبی نوکونید.
۲۲ ولی خودا خو قودرتٚ اَمرأ ظالمأنَ جٚه بین بره؛
وختی اون ویریزه، هیکس خو زنده مأنستنٚ جأ ایطمینأن نأره.
۲۳ اَشأنَ ایطمینأن فأده و امنیتٚ دورون زندگی کونیدی،
ولی خو چومأنٚ اَمرأ اوشأنٚ رأهَ پایه.
۲۴ ایپچه زمأت سربولندَ بیدی و بأزین جٚه بین شیدی؛
خوارَ بیدی و دیگر کسأنٚ مأنستن میریدی
و گندمٚ خوشه‌یأنٚ مأنستن وأوِه بیدی.
۲۵ اگه اَطویی نی‌یه، کی تأنه بگه کی دورُغ گفتَن درم،
و نیشأن بده کی می گبأن هیچی نی‌ییدی؟»
Currently Selected:
ایوب ۲۴: گیلکی (رشتی)
Highlight
Share
Copy
Want to have your highlights saved across all your devices? Sign up or sign in
© 2010-2019 Gilak Media
